¹ Mufukirire oyo oli mudekheere mulisuubira, arali nende obuyiingani obwo khumukhalakira. ² Omuundu mulala asuubira mbwe anyala khulia biindu biosi: oundi naye, oli mudekhere alia eliani liong'ene. ³ Oyo olia aralekeresia oyo oralia; naye oyo oralia arakhalakira oyo olia: okhuba Nasaye yamufukirira. ⁴ Oli wina ewe okhalakiranga omusumba wowasio? Yeemaanga kose akwichaanga imberi womukhongo waye mwene. Kario, anemekhebwa: okhuba Nasaye anyala khumukhola yeema. ⁵ Omuundu mulala abukula indaalo ndala okhukhira yindi: naye oundi abona mbwe chindaalo chioosi chifwanana. Lekha buli mulala yebulire mwene mumapaaro Kaye. ⁶ Oyo ofumia nakingula indaalo ayikiingulira Omwami; naye oyo arakiingula akhola ario mumwami. Oyo olia, alia mumwami, okhuba yebasiaanga Nasaye, naye oralia akahayaanga Khulia munasaye, yesi yebasiaanga Nasaye. ⁷ Okhuba abulao owemenyeraanga, khandi abulao owefwiraanga. ⁸ Okhuba nikhumenya, khumenyeraanga Omwami; ne kata nikhufwa, khufwiraanga mumwami: kho nikhumenya, kose nikhufwa, khuli abomwami. ⁹ Okhuba okhuula ao Kirisito yafwa, khandi nabukha mubafu, naba mulamu, mbwe abe Omwami wabafu nende abalamu. ¹⁰ Ne khulwa sina okhalakira musiani weng'we? Kose sina sikera nojaara omusiani weng'we? okhuba fweesi khwakheeme imberi wesisaala sia Kirisito esia obukhalaki. ¹¹ Okhuba kaandikwa mbwe, Omwami aboola ari, olwamenyere, buli likhumbo liakhasigamire, naye buli lulimi lwakhafukirire Nasaye. ¹² Kho buli mulala khwefwe yakhaberesanie amakhuwa Kaye khu Nasaye. ¹³ Kho khurachiririra okhukhalakanirana: arali okakisie lino, mbwe abuleo orerao owasie esiokhwegumulakho kose esikera owasio yakwa. ¹⁴ Manyire, khandi ngakisirwa nende Omwami Yeso, mbwe sibulao esiindu siraali silafu siene, arali oyo obukula esiindu khukhaya khuba silafu, khuye sinisilafu. ¹⁵ Naye omusiani weng'we nasinyisibwa nende ebiakhulia biao, simuli khukeenda mubukheeri. Khulwe biakhulia oranyasia ula owa Kirisito yafwira. ¹⁶ Orafukirira ebikhole bio bilayi bilomalomwakho mubibi: ¹⁷ Okhuba obwaami bwa Nasaye khasi ni khulia nende khungwa khaba; arali bulondana nobulungifu, nende omuleembe nende isangaalo mu Roho mulafu. ¹⁸ okhuba oyo okhalabanira Kirisito mubiindu bino afukirirwa nende Nasaye, najamisia abaandu. ¹⁹ Khu kario khuloonde ebiindu bireera muleembe, nende bila ebikiingula owasio. ²⁰ Oranyasia emirimo kia Nasaye khulwa biakhulia. Ebiindu bioosi nebilafu, arali nebimaanu khu ula oli nende bukanakani. ²¹ Khasi nibilayi olie inyama, kose ong'we ifini, kose siosi esikera omusiani weng'we yegumule, kose asinyisibwe, kose akholwe omudekheere. ²² Oli nende lisuubira? Ba ninalio khulwewe mwene imberi wa Nasaye. Ali neisaangalo oyo orekhalakiraanga omwene khu sila esiafukirire. ²³ Naye oli nobukanakani anakhalakirwa nalia, okhuba khasi alia mulisuubira: okhuba siosi esirarulana khulisuubira nesionoono.