¹ Khandi ndeeba mbwe, Nasaye yasukuna abaandu baye? Khaba dawe. Okhuba esie siesi ndi omuisiraili, eyimuo ya Ibraimu, owolwibulo lawa Benjamini. ² Nasaye khasi yasukunakho abaandu baye abayamanya khurula mukhuchaaka. Khasi mumanyire esia maandiko kaboola khulondana nende Eliya? Ngolwa yasaayira Isiraili khu Nasaye naboola ari, ³ Omwami berere abanabii bao, nende okhuyabulula obwali bwao; nesie siengene odongere, ne khandi siesi bakonya obulamu bwange. ⁴ Naye Nasaye yamukalusiamo arie? Ndebikhira abaandu chilifu saba, abasiri okhurakho elikhumbo asi khu sifwanani sia Baali. ⁵ Kata kario ebikha bino khuli nende omukaanda kwadoonga khulondana nende abalobolwe abobukoosia. ⁶ Ne nikali mbwe khulwo bukoosia, khasi bisiiri khulwo bukholi khaba: kario obukoosi khasi bwakhaba obukoosia khaba.Kata emirimo khasi kiakhaba emirimo khaba. ⁷ Ni sina bulano? Isiraili khasi yanyoola esiayakonyango, arali abalobole nibo abanyoola, naye abadongere bofusibwa chimoni. ⁸ Kulondana nende Kori ngolwa kaandikwa mbwe, Nasaye yababeresia Roho wokhukunukha, echimoni chiralola, nende amarwi akarabulira; okhuula inyaanga yino. ⁹ Naye Daudi aboola ari, imeesa yabwe yikholwe esirekekho, nende omuteego, nende esikhalicho, nende omuruungo: ¹⁰ Echimoni chiabwe chiirime, bakhaye okhulola, buli lwoosi emikoongo kiabwe kiguname buli lwoosi. ¹¹ Bulano ndeeba mbwe, begumula khubamale bakwe? Khaba dawe. Naye okhubirira mukhukwa khwabwe, obwonia bwechera abanasialo, bikere babe nende imbalikha. ¹² Bulano nikaba mbwe okhukwa khwabwe nobuyiinda bwesialo, ne okhuberera khwabwe nobuyiinda obwa banasialo; simuno okhwichusibwa khwabwe? ¹³ Nomanoma nang'we banasiolo, Kata nende nindi omurumwa khubanasialo, ngingula oburumikhi bwange: ¹⁴ ninyala mungira yoosi khuberesia imbalikha abo abamabaanga malala ninange, mbwe nyoole okhuonia abandi khunibo. ¹⁵ Khulwo khuba nikakhaba mbwe okhusukunwa khwabwe khurera obusasani bwesialo, okhufukirira khwabwe khunaba sina, arali obulamu khurula mubafu? ¹⁶ Okhuba ebiamo ebiakhurangirira nibiakhaba ebitakatifu, esimeka siosi nesitakatifu: ne omusi nikuba omutakatifu, amasaga kosi kanaba kario. ¹⁷ Ne amasaga kandi nakakhafunakwa, naye ewe , oli omuseituni mureende, wambanisibwe khunibo, alala ninabo osangirane khumusi nende obulayi bwomuseitun; ¹⁸ oresiimira amasaga. Ne niwesiima, khasi niwe obukule esisina arali esisina nisio esikhukingire ewe. ¹⁹ Khu kario onaboola ori, amasaga kafunakwa mbwe nyoole khwambanisibwamo. ²⁰ Nebilayi; kafunakwayo khulwo khurasuubira, ne ewe wemekhebwa mubusubiri. oresiima arali orie. ²¹ Okhuba Nasaye naralekhera amasaga kokhurangirira, wekenderesie wesi khulwokhuralekherwa. ²² Lola bulano obulayi nende obululu bwa Nasaye: khwabo abakwa, obululu; ne khwewe, obulayi, nimuchirira mubulayi bwaye, arali awo mwesi muchia okhalakwa. ²³ Ne boosi nibarachiririra mukhurasuubirira, bachia okhwambanisibwa: okhuba Nasaye anyala okhubambania khandi. ²⁴ Nikakhaba mbwe ewe wakhalakwa khurula khu musaala museituni okwo musiino wambanisibwa mungira irali eya buli lwoosi khumuseituni mulayi; sinokhukhirao muno bala abali khwambanisibwa khumuseituni kwene? ²⁵ Khulwesio abakheerwa, khasi ndekoomba mbwe mukhaye okhumanya ako bwekisi kano, mbw mukhaye okhwelola nga abaandu bamakesi; mbwe mulwande obwomu bwanyoola Abayisiraili okhuula obwolererefu obwa banasialo bubechere . ²⁶ Khukario Isiraili yoosi yichia okhwonisibwa, ngolwa kaandikwa mbwe, omuonia achia khurula Sayuni, naye achia okhukabukhania Yakobo nende obukori bwaye: ²⁷ Okhuba lino nilio elilakaano liange , olwandakharusieo obwononi bwabwe. ²⁸ Okhulondana nende ifanjili, nabasuku khulwo khubeera eng'we: ne okhulondana nende obulobole, nabakheerwa khulwa basabwe. ²⁹ Okhuba ebianwa nende omulaango kwa Nasaye sibikalukhanaanga. ³⁰ Khulwo khuba eng'we mwesi mubikha biabira khasi mwasubiriraanga Nasaye, ne bulano munyolere esisa okhubirira mukhurasuubira khwabwe. ³¹ Kata kario bano boosi sibasuubira, mbwe okhubirira musisa siengwe bosi banyoole esisa. ³² Okhuba Nasaye ababalire boosi mubukhayi, mbwe anyoole khubabonera boosi esisa. ³³ Lola ngabuli obungi bwa makesi nende obumanyirisi bwa Nasaye! obukhalaki bwaye sibumanyikhane, khandi chingira chiaye sichinyolekhana! ³⁴ Ni wina omanyire amapaaro ka Nasaye? kose wina owalikho omukeraki waye? ³⁵ Kose wina owarangirira yamubakho esiindu, anyoole okhurungwa khandi? ³⁶ Khulwaye, khandi khubirira muniyie, khandi khu yie, mulimo ebiindu bioosi: oluyaali lube ninaye buli lwoosi. Amina.