¹ Abakheerwa, obwekoombi bwo mwoyo kwange nende elisaayo khu Nasaye khulondana nende Isirayili nilio mbwe, banyoole okhuonisibwa. ² Obuloli bwange khunibo buli mbwe bali nende esinani khu Nasaye, arali mungira eyirali eyobumanyirisi. ³ Khulwanibo khukorwa obulungifu bwa Nasaye, khulwo khuteema okhukasia obulungifu bwabwe bene, sibeduduyisie khu obulungifu bwa Nasaye. ⁴ Okhuba kirisito niye obulamukhi bwelilako liobulungifu khu oyo yesi osubira. ⁵ Okhuba Musa aboola khu bulungifu buloondana nende lilako, ari omuundu oyo okhola ebiindu ebio anabimenyera. ⁶ Ne obulungifu bwelisuubira bulomalomaanga buri, oraboola mumwoyo kwao, mbwe wina onabukha achie mwikulu? Abwene ao nokhukalusia Yeso khurula akulu: ⁷ Kose ni wina ooneekha emagoombea? Abwene ao nokhubusia Kirisito khurula mubafu. ⁸ Ne libola lirie? Elikhuwa lili ambi ninawe, kata mumunwa kwao, nende mumwoyo kwao: elio, nelikhuwa lielisuubira, eliakhuyaalanga. ⁹ Mbwe nochia okhurumbula Yeso nomunwa kwao, nosubira mumwoyo kwao mbwe Nasaye yamulamusia khurula mubafu, oliwonisibwa. ¹⁰ Okhubirira mumwoyo omuundu asubiraanga okhunyoola obulungifu; naye mumunwa arumbulaanga nanyoola obuonia. ¹¹ Okhuba eliandiko liboola liri, oyo omusubiramo sialidirwa nende echisono. ¹² Okhuba obwaukhani bubulao akari womuyaudi nende omuyunani: okhuba Nasaye mulala oyo khuboosi nomunyali khuboosi abamulangirira. ¹³ Okhuba oyo yeesi olangirira elira liomwami anaonisibwa. ¹⁴ Ne banamulaanga barie ula owabarasuubira? Ne banasuubira barie mu ula awabasiabulira? ¹⁵ Ne banayaala barie, nibararumirwe? Kori ngolwa kaandikwa mbwe, namalayi karie amakulu aka bala abayalaanga ifanjili eyo muleembe, nibarera amakhuwa malayi kebiindu bilayi. ¹⁶ Ne boosi sibasuubira muyifanjili. Okhuba Isaaya aboola ari, Omwami, niwina owasuubira amkhuwa kefwe? ¹⁷ Okhuba obusubiri bwichaanga mukhubulira, khandi okhubulira likhuwa lia Nasaye. ¹⁸ Naye ndeeba mbwe, khasi babulira khaba? Yee nobwadieri, oluyoka lwabe lwoli buli abuundu musialo, ne amakhuwa kabwe nikoola muchimbeka chiesialo chiosi. ¹⁹ Ne ndeeba mbwe, Isiraili khasi yamanya khaba? Imbeeri Musa aboola ari, ndabasinyisia mudirwe nende ikhiinda khu baandu barayera, khandi ndabasinyisia nende oluya lusiru. ²⁰ Naye Isaaya nomukakaafu, naboola ari, ndanyolwa nende bala abaraangonya; ndamanyisibwa khu bala abarangoonya. ²¹ Ne khu Isiraili aboola ari, oludalo lulamba ndabambula amakhono kange khu baandu besileka nende abakhayi.