¹ Ne ngolwa Yeso yali nabira, yaloola omuundu mwofu khurula okhwibulwa khwaye . ² Abeeka baye bamureba , ''Omwami , niwina owakhola chimbi , omuundu uno , kose abebusi baye , khuniyebulwa omwofu?'' ³ Yeso nabakalusia ari , ''Omuundu uno siyakhola chimbi , kata abebusi baye , biekhola birio mbwe emirimo kia Nasaye kinyole okhwelolosia . ⁴ Khoera okhukhola emirimo kia ula owanduma nisisiri esidere , esiro silikho siicha siomundu aranyala okhukhola omulimo . ⁵ Esie nisiri musialo , Nisie obulafu bwo musialo .'' ⁶ Lunyuma lwa Yeso okhuboola makhuwa ako , yafucha mare khuloba , nakhola lidosi lia mare, namala niyoma echimoni chiaye nende lidosi rilia . ⁷ Namala namuboolera ari ,'' Chia weyosie mulidiba lia Siloamu'' sifunane sielira lino ''owarumwa'' . Kario , omuundu oyo yachia yeyosia , mani yakalukha naboona . ⁸ Abamenyeranwa bo mundu oyo nende balia boosi , abali nibamumanya nga omwofu , barebana mbwe , ''Uno siniye owekhalenge nasabirisia? ⁹ Abaandi baboola mbwe ,'' Niye '' , Nabaandi nibaboola mbwe siniye, khumalakho afwanana ninaye.'' Naye omwene niyeboola mbwe , ''Nisie .'' ¹⁰ Nibamureba khandi , ''Chimoni chiao chifungukhe chirie? ¹¹ Yabakalusia ari , ''Omuundu ulangwa Yeso , akasisie lidosi nambakha khu chimoni namboolera mbwe, 'Chia mudiba lia siloamu weyosie . Njire nindeyosia , awo niwo anjakire okhuboona.'' ¹² Nibamala bamureba mbwe , ''Aliena? Yabakalusia ari akorerwe owali. ¹³ Bamala barere omuundu oyo , owali mwofu khu Bafarisayo . ¹⁴ Naye yali inyanga ya Isabato , niyo ya Yeso yanyooba lidosi namubwikhula chimoni . ¹⁵ Khandi kario Abafarisayo boosi nibamureba ngolwa anyolere okhubwikhulwa chimoni . Namala nababoolera ari , ''Abakhire lidosi khu moni chiange , Nimala chiosia , naye bulano mbona .'' ¹⁶ Abalala khu Bafarisayo nibabola , ''Omuundu uno siwa Nasaye khaba , khulwo khuba salindanga Isabato khaba .'' Nibaandi nibaboola bari , ''Binyalikhana birie omwononi okhukhola ebia makana nga bino biri ? Obukabukhani bwarulirao akari wabwe . ¹⁷ Khandi nibareba oyo owali mwofu mbwe , ''Ewe obolakho sina khu oyo ukhuonisie chimoni chiao ? Nabakalusia ari , '' nomunabii .'' ¹⁸ Kario , Abayaudi sibamala basubire mbwe yali omwofu , mani yali nanyolere okhuona , okhula balange abebusi baye . ¹⁹ Bamala barebe abebusi baye , ''Uno niye omwana weng'we yebulwa nali mwofu? Binafwana birie mbwe bulano alikho abona? ²⁰ Abebusi baye bakalusia nibaboola bari , ''Khumanyire mbwe uno niye omwana wefwe , owebulwa nali omwofu . ²¹ Khumalakho , ngolwa anyolere khuchaka khuboona , efwe sikhumanyire , omwene nomukhulundu mumurebe , anyala yelomalomera.'' ²² Abebusi balomaloma bario , khulwo khubera baria Abayaudi , sifune siali mbwe Bayaudi bali nibamalire okhufukirisania mbwe omundu yesi oweyama mbwe Yeso niye Kiristo , yerusibwe khurula Musinagogi . ²³ Khulwo khubera ebiene bino , nibio biakera abebusi baye nibaboola mbwe , ''Omwene nomukhulundu , mumurebe .'' ²⁴ Balanga khandi Omuundu oyo owali mwofu , nibamuboolera bari , Beresia Nasaye oluyali . Efwe khumanyire mbwe omuundu oyo nomukholi wechimbi'' ²⁵ Omuundu oyo nabakalusia ari , ''Esie simanyire nali omukholi wechimbi , manyire sindu silala : Ndabere omwofu , ne khulwa bulano ndikho mboona.'' ²⁶ Khandi nibamureba bari , ''Nisina esia akhukholere? Afungule arie chimoni chiao? '' ²⁷ Naye nabakalusia mbwe , ''Malire okhubabolera , nang'u simuulire . Khulwa sina mudakha khuulira khandi? Mwenya mwesi khuba abeeka baye?'' ²⁸ Bamala bamwalabire nende khumunyeka , Omalire okhuba omweka waye , efwe khuli balondi ba Musa . ²⁹ Khumanyire mbwe Nasaye yalomaloma nende Musa , naye sikhumanyire owa muundu uno arula .'' ³⁰ Omundu oyo yabakalusia nababolera , ''Lino nelikhuwa liukisia , mbwe simumanyire owarula , ne kata kario abwikhule chimoni chiange . ³¹ Khumanyire mbwe Nasaye sia auliranga abakholi bechimbi khaba , ne , kario omuundu nali omulami wa Nasaye , nikhandi akholanga lienya liaye , amuuliranga . ³² Khurula esialo nisibao bisiaulirikhana mbwe omuundu yesi yamala abwikhule chimoni chia ulia yebulwa nali omwofu . ³³ Bibere mbwe omundu uno siarula khu Nasaye , siayakhakholere esindu khaba .'' ³⁴ Bamukalusia nibamuboolera bari , ''Ewe webulwa muchimbi , ne , bulano wenya khurwekesia? Bamala bamusukune erwanyi . ³⁵ Yeso yabulira mbwe bamusukune erwanyi wa Isinagogi . Ne , niyali niyakha munyoola , yamureba ari , ''Osubira mu Mwana wa Nasaye? ³⁶ Yakalusia nareba , ''Omwami , aliena , musubirire? '' ³⁷ Yeso yamuboolera ari , ''Omalire khumuboona , niye oulomalomanga ninawe .'' ³⁸ Naye naboola mbwe , ''Omwami , subira '', namala namwinamira . ³⁹ Yeso naboola ari , ''Khulwa bukhalaki esie ndecha musialo sino , mbwe kata kario abo abaraboona banyole okhubona , naye abo ababoona babe boofu .'' ⁴⁰ Balala khu Bafarisayo abali ninaye baulira makhuwa kano , ne , bamala bamurebe bari , ''Fwesi khuli boofu?'' ⁴¹ Yeso nababoolera ari , ''Mubere boofu , mwakhaumire echimbi , ne , khulwo khubera muboola , mbwe mubona , kario echimbi chieng'we chidong'a nichiriwo .''