¹ Yeso yachia khulugulu lwa Olives. ² Ichuli mumabwibwi yecha mukhekalu khandi , abaandu boosi bamala bechie : yekhala asi nachaka okhubekesia . ³ Naye Abaandiki nende Bafarisayo balera omukhasi owali nanyolekhane musikhole siobucheke. Bamala bamwemekhe akari womukanda. ⁴ Nibamubolera , ''Omwekesia , omukhasi uno anyolekhane nakhola obucheke . ⁵ Bulano mulilako , Musa arulaka okhukhuya abaandu nga bano nende amakina , ewe oboola sina khulondana ninaye?'' ⁶ Baboola lino khulwo khumutema , kario banyole esio khwedirakho , banyoole khumusitaka , khumalakho Yeso yagunama asi nachaka okhwaandika khu maloba nende olwala lwaye , nabulerere nga omuundu orabaulire . ⁷ Ngolwa bachirira okhumureba marebo , yakingukha niyema nababoolera ,''Oyo akari weng'we ubula sionono , abe owamberi khumulasa likina .'' ⁸ Khandi yagunama asi , nachiririra khu maloba nende olwala lwaye . ⁹ Nibaulira , lino , buli siamulala nakhalakirwa mumwoyo kwaye , bachaaka okhubwao , khurula khu mukhulundu wabwe khula khumudidi . Yeso yenyoola nadong'ere yeng'ane , nende , omukhasi ula niyemere awo . ¹⁰ Olwa Yeso yeema , nibinyolekhana mbwe omuundu yeesi siyaliwo okhumalakho omukhasi oyo , yamureeba , ''Omukhaye baliena bakhalaki bao ? Abulao kata mulala oukhukhalakire musango?'' ¹¹ Yamukalusia namuboolera ari , ''Abulao , Omwami .'' Yeso namuboolera , ''Siesi sikhukhalakira khaba . Bwao norakhola sionono .'' ¹² Yeso yabalomalomera khandi naboola , ''Nesie obulafu bwesialo , oyo ounonda sanakenda musirima arali achia khuba nende obulafu bwo bulamu .'' ¹³ Bafarisayo nibamuboolera , ''Ewe oli khwerusirianga obuloli omwene , obuloli bwao sino bwadieri.'' ¹⁴ Yeso yakalusia nababoolera, ''Kata kario nindekhoolera obuloli bwange omwene , obuloli bwange nobwadieri : khulwo khuba manyire owandarula , nende owanjia , naye eng'we simumanyire ewandarula nende ewanjia . ¹⁵ Mukholanga obukhalaki bwo mubiri : naye esie sikholanga obukhalaki khu muundu yesi . ¹⁶ Kata kario nikhalaka , obukhalaki bwange nobwadieri khulwo khubera sindi sieng'ane, naye ndi khalala nende Baba owanduma . ¹⁷ Kaandikwa mumalako keng'we mbwe obuloli bwa baandu babiri nibwadieri . ¹⁸ Nisie omwene ourusia buloli bwange , naye Baba owanduma akhola buloli bulondana nange.'' ¹⁹ Bamureba nibaboola , ''Baba wao ali ena?'' Yeso yabakalusia , ''Eng'we simumanyire , ne , kata Baba : bibere mbwe mwamanya , mwakhamanyire Baba yesi .'' ²⁰ Yaboola makhuwa kano muimbikhiro ngolwa yachiririra okhwekesia mukhekalu , naye abulao muundu yeesi owa mudira khulwo khuba ebikha biaye biali bisiola . ²¹ Khandi Yeso nababoolera , ''Ndikho mbwao: muchia khungonya , ne kata kario mucha khufwira mubionono bieng'we , ewanjia eng'we simwakhechayo.'' ²² Bayaudi nibarebana , ''Achia okhweira? khulwo khuba aboola mbwe , owachia efwe sikhunyala khwachiayo ? ²³ Yeso nababoolera , ''Eng'we muli ba asi ano, nange ndula akulu. Eng'we muli bomusialo ; Esie sindi womusialo muno. ²⁴ Khu, ako , mbaboolere mbwe mwakhafwe mubionono bieng'we : khulwo khuba nimurasubira mbwe NISIE UNO, muchia khufwira mubionono bieng'we.'' ²⁵ Nibamala nibamureba khandi , ''Niwe wina? Yeso nababoolera , nisie ula owa mbaboolere khurula mukhuchaka. ²⁶ Ndi nebiindu biingi bioboola nende oyaasia akulu weng'we . Khumalakho , oyo owanduma nowadieri : kario mboleranga esialo makhuwa ka mbulire khuniye.'' ²⁷ Sibamanyirisia mbwe yali nabalomalomeranga khulondana nende Samwana. ²⁸ Yeso nababoolera , ''Nimwakhabe nimukingulire Omwana Wo mundu akulu , khu mwakhamanye mbwe NISIE , mbwe khandi sibulao esiakholanga khulwange omwene : khumalakho ngolwa Baba yanjekesia nilwo lwambolanga biindu bino . ²⁹ Naye oyo owanduma ali ninange , Baba siyandekha sieng'ene , khulwo khuba buli lwosi kholanga bilia ebimukheresia.'' ³⁰ Ngolwa Yeso yameda okhuboola amakhuwa kano , buungi bwa baandu bamala bamusubirire . ³¹ Yeso naboolera Bayaudi abo bamusubira ari , ''Eng'we nimuchiririra mulikhuwa liange , abwene awo , munaba abeeka bange bobwadieri : ³² Ne , munamanya obwadieri , nabwo obwadieri bunabakhola okhuba balekhule .'' ³³ Nabo nibamukalusia bari , ''Efwe khuli bolwibulo lwa Ibrahimu , naye khurabakho barumwa bomuundu yesi yesi , oboola orie , ''Mbwe munakholwa balekhule ?'' ³⁴ Yeso nabakalusia ari , Mubwadieri , mubwadieri , mbaboolera , Oyo yesi ukhola sionono , nomurumwa wasio . ³⁵ Naye omurumwa si amenyanga munyumba chinyanga chioosi : khumalakho omwana amenyanga chinyanga chioosi . ³⁶ Khu kario , Omwana nabakhola okhuba balekhule , munaba balekhulwe bobwadieri . ³⁷ Manyire mbwe muli bolwibulo lwa Ibrahimu : ne kata kario mukonya okhunjira , khulwo khuba likhuwa liange libula obweyango mukari mweng'we . ³⁸ Nomanomanga kalia akambwene khurula khu Baba : naye eng'we mukholanga kamubwene khu baseng'we.'' ³⁹ Bamukalusia nababoolera bari , ''Ibrahimu nisefwe .'' Naye Yeso nababoolera , ''Mubere abaana ba Ibrahimu , mwakhakholere emirimo kilondana nende Ibrahimu . ⁴⁰ Ne khulwa bulano mukonya khunjira , omuundu ubaboolere obwadieri bwambulire khurula khu Nasaye . ⁴¹ Mukholanga ebikhole bia seng'we . Nabo nibakalusia nibamuboolera , Efwe sikhwebulwakho mubucheke : khuli nende Sefwe mulala , ouli Nasaye.'' ⁴² Yeso nababoolera ari , ''Nasaye abere mbwe niseng'we , mwakhakherere , khulwo khuba ndarula khu Nasaye , sindecha khulwange omwene , arali niye owanduma. ⁴³ Khulwa sina simumanyirisia amakhuwa kange ? Nikhubera simunyala okhuulira amakhuwa kange . ⁴⁴ Eng'we muli abaseng'we sietani , ne mukheresebwa okhukhola amenya ka seng'we . Yali omwiri khurula mukhuchaka , khubera siyemanga mubwadieri khulwo khuba obwadieri sibuli mukari mwaye . Nalomaloma obubacha , abechanga alomaloma eimera yaye khulwo khuba nimubacha khandi niye simwana obubacha . ⁴⁵ Naye , khulwo khuba mbaboolera obwadieri , khaba simuli okhusubira . ⁴⁶ Niwina khweng'we owakhambolakho esionono? Nikali mbwe mbolanga obwadieri khulwa sina simusubirira? ⁴⁷ Oyo ouli wa Nasaye auliranga amakhuwa ka Nasaye , khu kario eng'we simu kauliranga , khulwo khuba simuli aba Nasaye .'' ⁴⁸ Bayaudi nibamala nibamukalusia bari , ''Efwe sikhuboolanga obwadieri mbwe oli Musamaria naye khandi olimo sikhieno? ⁴⁹ Yeso nabakalusia , esie mbula sikhieno , khumalakho mberesianga Baba wange siribwa , naye eng'we simumberesia siribwa khaba . ⁵⁰ Esie singonyanga oluyali lwange omwene : aliwo mulala ukonyanga nakhalaka . ⁵¹ Mubwadieri , mubwadieri , mbaboolera , omuundu yeesi niyelinda mulikhuwa liange , khaba siyakhalole elifwa khaba.'' ⁵² Naye Bayaudi nibamuboolera bari , ''Bulano khwakhamanya mbwe olimo sikhieno . Ibrahimu nende abanabii bafwa : naye ewe oboola mbwe , ''Omuundu yesi nalinda likhuwa liao sanaboona lifwa khaba .' ⁵³ Ewe soli mukhongo khukhira sefwe Ibrahimu nende banabii bafwa, oli khwekingula khwekhola wina? ⁵⁴ Yeso nakalusia ari , ''Esie nindekingimisia omwene , okhwekingimisia khwange nebikhaya : ni Baba niye oungingulanga _ oyo owa mubolanga mbwe ni Nasaye weng'we . ⁵⁵ Eng'we simwamumanya khaba : nange mumanyire . Nimboola , mbu sindamumanya , mba ndaba nga eng'we , ababacha . Ne kata kario , esie mumanyire khandi nindanga likhuwa liaye . ⁵⁶ Seng'we Ibrahimu sangalira okhuboona ludalo lwange , niyakhalubona , yali musangafu muno .'' ⁵⁷ Khandi Bayaudi nibamuboolera , ''Ewe osiri khusia emiaka makhumi karano , noboola mbwe wamubona Ibrahimu?'' ⁵⁸ Yeso nababoolera , Mubwadieri , mubwadieri , mbaboolera , Ibrahimu nasiabao , NDALIWO.'' ⁵⁹ Badola makina okhumulasira , arali Yeso yekisa namala narula erwanyi weikhekalu .