¹ ''Mubwadieri , mubwadieri , mbaboolera , ula orengira khubirira mumuliango kwesidwoli sia makondi , naye anina okhubirira buleka yindi , omuundu oyo nomwibi khandi no mung'usi . ² Oyo owingira khubirira mu muliango nomwayi wa makondi . ³ Khumwene oyo , omwemeresi amalanga amufungulira muliango . Amakondi kaulira lidoobosi liaye , naye alanga amakondi kaye khulira nakemirira okhurula erwanyi . ⁴ Niyakhamala okhukarusia kosi erwanyi , akarangirira imberi , naye makondi kamala kamulonde , khulwo khuba kamanyire lidoobosi liaye . ⁵ Naye omurende sikakhamulonda , naye khumalakho kana mwirukha , khulwo khubera sikamanyire lidoobosi liabakeni.'' ⁶ Olukado luno , Yeso yababoolera , naye khumalakho sibanyoola okhumanyirisia kalia akayali nababoleranga . ⁷ Yeso khandi nababoolera ari , ''Mubwadieri , mubwadieri , mbaboolera , ''Nisie omuliango kwa makondi . ⁸ Oyo yesi owandangirira nomwibi khandi mung'usi , ne kario amakondi sikabarekeresia khaba . ⁹ Nesie omuliango : omuundu yesi niyengira khubirira khwesie , anaonisibwa : naye khandi anengira narula nende okhunyola olwayiro . ¹⁰ Omwibi siyechanga arali mbwe yebe , yere nende okhunyasia . Esie ndecha mbwe babe nobulamu khandi babe ninabwo mubwichufu . ¹¹ Nesie omwayi mulayi : Omwayi mulayi arusianga obulamu bwaye khulwa makondi . ¹² Naye oyo owo khurungwa , orali omwayi mwene makondi , naloola isolo niicha niyerukha alekha makondi , ne isolo imala idira khandi isaakula amakondi . ¹³ Omwene oyo yerukhanga khulwo khubera nomukhosi wokhurungwa oradeberera makondi . ¹⁴ Nesie omwayi mulayi , ne khandi manyire amakondi kange , naye kosi kamanyire . ¹⁵ Ngolwa Baba amanyire , nilwo lwa siesi mumanyire , naye esie mberesania obulamu bwange khu makondi . ¹⁶ Ne ndi na makondi kandi karali kesidwoli sino , kosi khoyera okarera , naye kanaulira lidoobosi liange , ne khunaba nesidwoli silala nende omwayi mulala . ¹⁷ Niko kakira Baba nakheera , khulwo khubera mberesania obulamu bwange , khuumale mbubukule khandi . ¹⁸ Abulao muundu obubukula khurula khwesie , nesie omwene obuberesania. Ndi nobunyali bwo khuberesania , ne khandi ndi nobunyali bwo khububukula khandi . Nyola elilako lino khurula khu Baba wange .'' ¹⁹ Obukabukhani bwarulirao khandi akari wa Bayaudi khulondana nende mekesio kano . ²⁰ Obuungi bwabwe baboola mbwe , ''Uno alimo sikhieno , khandi nomulalu , khusina mumurekeresie ? ²¹ Balala khunibo nibaboola mbwe , ''Kano sinamakhuwa karula mu mundu ulimo sikhieno khaba . Sikhieno sisinyala okhubwikhula chimoni chia omwofu? ²² Mubikha ebio omukholwa kwo khurebwakho mukhono kwali kubekho mu Yerusalemu , biali chinyanga chieimboo. ²³ Naye yali nakendanga mubweru bwa Solomoni . ²⁴ Khandi Bayahudi bamala beeche nibamubodokhana chimbeka chiosi , nibamuboolera bari , ''Ochia khurukhola khukhae okhusubira khula lina? Nibiri mbwe niwe Kiristo , rubolere mubwakhakhu.'' ²⁵ Yeso nabakalusia ari , ''Ndababoolera , ne simwamala musubire , emirimo kia kholanga mulira lia Baba , ekiene nobuloli bulondana nange . ²⁶ Ne kata kario khaba simusubira , khulwo khubera simuli makondi kange . ²⁷ Amakondi kange kabuliranga lidoobosi liange : khandi kaamanyire , naye kanondanga . ²⁸ Mbaberesianga obulamu burabwayo khaba, sibakhabone lifwa , naye khandi abulao ouchia khubarusia khu mukhono kwange . ²⁹ Baba , owa bamberesia nomukhongo khukhira boosi , khandi sialiwo omuundu unyala khubarusia mumukhono kwa Baba . ³⁰ Esie nende Baba khuli sindu silala . ³¹ Khandi Bayaudi babukula amakina nibali nelichomo lio khumukhuya . ³² Yeso nabakalusia nababolera ari , emirimo mingi milayi kiandakhabekesia khurula khu Baba : Nimulimo sina khwekio , kwamudakha khukhuya makina? ³³ Bayaudi nibamukalusia nibamuboolera , ''Khumulimo kwosi mulayi khaba sikhukhuya makina , arali khulondana nende okhwekerania khwao khu Nasaye , ewe omuundu , oli khwekhola Nasaye.'' ³⁴ Yeso nabakalusia ari , ''Sikaandikwa mumalako keng'we mbwe , ''Ndaboola , ''Eng'we muli runasaye ''? ³⁵ Nikakhaba mbwe yabalanga runasaye , balia belikhuwa lia Nasaye liechera maandiko sikakhafunakwa ³⁶ Muli khuboleranga ulia owa Nasaye yakabula namuruma musialo , 'Oli khwekerania khu Nasaye : khulwo khubera mbolere , mbwe ndi Omwana wa Nasaye'? ³⁷ Nikakhaba mbwe sindi okhukhola emirimo kia Baba , murasubira . ³⁸ Ne nikali mbwe ndi okikhola , kata nimurasubira esie , subire mumirimo , mbwe munyoole okhumanya , mani musubire mbwe Baba ali mukari mwange , nange mukari mwaye . ³⁹ Batema omukwakho khandi , naye kata kario yabeibakho khurula khu mukhono kwabwe . ⁴⁰ Yamala abweo khandi khubira Yorodani khula abuundu wa Yohana yachakira okhubatisia , naye namenya eyo . ⁴¹ Abaandu baangi bamwichira , ne nibamuboolera mbwe , ''nobwadieri Yohana siyakholakho ebilolero biosi , naye khumalakho amakhuwa koosi ka Yohana yabola khulondana nende omundu uno nikobwadieri.'' ⁴² Obuungi bwa baandu bamala bamusubire eyo .