¹ Naye omuundu oundi yali omulwaye , yalangwa Lasaro , owa Bethania ,elidookho lia Maria nende omukhana wabwe Marita . ² Yali Maria oyo owedisia amafura kesing'ari khu makulu ko Omwami , ne niyeya amakulu kaye nende elifwiri liaye , owo musiani wabu Lasaro yali omulwaye . ³ Abakhana babu bamurumira , nibaboola , Omwami lola , ulia , owawakhera alwala . ⁴ Olwa Yeso yabulira ako , yabola , obulwaye buno sinobwelifwa , arali khulwoluyali lwa Nasaye , mbwe Omwana wa Nasaye akinguliremwo ⁵ Naye Yeso yakhera Marita , nende omukhana wabwe , nende Lasaro . ⁶ Olwa yali nabulire mbwe Lasaro nomulwaye , yakhindao khulwechindalo chibiri abuundu awo . ⁷ Ne lunyuma naboolera abeeka baye ari , khuchie khandi Buyudea ⁸ Abeki baye nibamubolera bari, Omwami, Abayaudi ambi ano benyere okhukhuya nende makina, khandi wenya khuchiayo. ⁹ Yeso nakalusia ari, sichilimo echisaa ekhumi nende chibiri muludalo. Omuundu nakenda esidere, siyegimula khaba, khulwa khuba alola obulafu bwesialo. ¹⁰ Naye omuundu nakenda esiro, yegumula, okhuba obulafu bumubulamo. ¹¹ Ebindu bino yaboola, nolunyuma nababoolera ari, omwicha wefwe Lasaro akonere, naye njia, mbwe mubusie mundolo. ¹² Naye abeki baye nabo nibaboola bari, Omwami, nakona anaba ebilayi. ¹³ Naye Yeso yalomalomera khu lifwa liaye, nabo bapara mbwe yali alomalomere obulukha muchindolo. ¹⁴ Ne yeso nabakakisiria ari, Lasaro afwire. ¹⁵ Ne ndi musangafu khulweng'we mbwe khasi ndabereyo khaba, mbwe munyale khusubirira khusubirira; arali khakhumuchire. ¹⁶ Naye Tomasi oulangwa mbwe Didimo naboolera abeki basie ari, khakhuchie fwesi khufwe ninaye. ¹⁷ Ne Yeso niyeecha, yanyola mbwe yali akonere mung'ani chinyanga chine. ¹⁸ Bulano Betania yali ambi nende Yerusalemu, oburambi bwa maili chibiri. ¹⁹ Abayaudi bangi bechera Marita nende Maria, okhubesasira khulwo omusiani wabwe. ²⁰ Naye Marita, olwayabulira mbwe Yeso yechaanga, yeecha khumubukananira, naye Maria niyekhala niyedemberesia munyumba. ²¹ Ne Marita naboolera Yeso ari, Omwami, oba mbwe wali ano, omusiani wefwe khasi yakhafwire. ²² Naye manyire mbwe kata ebikha bino, sioosi esiosaba Nasaye, anakhuberesia. ²³ Yeso namuboolera ari, omusiani wengwe anabukha khandi. ²⁴ Marita namuboolera ari, manyire mbwe yakhabukhe khandi mubulamukhi bwo oludalo lumalirikha. ²⁵ Yeso namuboolera ari, esie nesie obulamukhi, nende obulamu, oyo ousubiramo, kata nafwa, alimenya khandi. ²⁶ Naye oumenya niyasubiriremo, kata nafwa siyakhafwa khaba. osubirira kano? ²⁷ Namuboolera ari, ee, Omwami; subirira mbwe newe Kirisito, omwana wa Nasaye, oukhoye yeeche musialo. ²⁸ Niyakhamala khuboola ario, yarulao, nalanga Maria mukhana wabwe masididie, namuboolera ari, omwami yakheecha, ne akhulanga. ²⁹ Kori ngolwa yabulira ako, yabukha lwangu niyeecha owa yali. ³⁰ Yeso naye yali asiri abuundu wa marita yamubukananira. ³¹ Abayaudi bali naye munyumba, nibamwesasiranga, olwababoona narula lwangu erwanyi, bamulondakho nibapara mbwe achia khusirindwa khulira. Olwa Maria yeecha owa Yeso yali, ³² niyakhamuloola, yakwa mumakulu kaye, namuboolera ari, Omwami, oba mbwe wali ano, omusiani wefwe khasi yakhafwire khaba. ³³ Olwa yeso yamuboona nalira, alala nende Abayaudi abeecha ninaye, yabesasira mumwoyo nende khunyasibwa. ³⁴ Nareba ari, mwamurere ena? Nibamuboolera bari, Omwami, icha olole. ³⁵ Yeso yalira. ³⁶ Abayaudi nibaboola bari lolakho kori ngolwa yali yamukheera. ³⁷ Abaandi nibaboola bari, omuundu uno owekula echimoni chia abaofu, abao siyakhamukayire khufwa? ³⁸ Yeso khandi nali okhuchunisibwanga mumwoyo yeecha khusirindwa. Liali liulukhu, naye likina lirerebwakho. ³⁹ Yeso yaboola ari, rusiekho likina. Marita omukhana wabwe mufu, namuboolera ari, Omwami, ebikha bino aunya: okhuba yakhamala chindalo chine nafwire. ⁴⁰ Yeso namuboolera ari, sibaboolere mbwe nimusubirira munaloola oluyali lwa Nasaye? ⁴¹ Nibamala nibarusiayo elikina ala owa omufu yali narerewo, Ne Yeso nakingula chimoni akulu, naboola ari, Baba, khubira orio mbwe umbuliranga, ⁴² Ne manyire mbwe ombuliranga buli lwosi: Ne khulwa khubera abaandu bemere ano mboolere kene kano, mbwe bamanye mbwe wanduma. ⁴³ Niyakhamala khuboola kene ako, yalira nende lidoobosi likhongo, naboola ari, Lasaro, rula erwanyi. ⁴⁴ Naye owali nafwire nabukha, naboyerwe makhono nende makulu nende ingubo yomubirindwa: obweni bwaye nibuboyerwe nende sitambaya. Yeso nababoolera ari, mubmubolole, abe omulekhule. ⁴⁵ Naye abayaudi baangi abali becheere Maria, nibakhamala khubona aka Yeso yakhoola, bamusubiriramo. ⁴⁶ Naye abaandi barulao nibachira Abafarisayo, nibababoolera aka Yeso yali akholeere. ⁴⁷ Abakukhani bakhongo nende Bafarisayo nibakhola omukhung'ano, nibarebana bari khukhole sina? Okhuba omuundu uno akhoola ebiamakana bingi. ⁴⁸ Nikhumulekha yengene, abaandu boosi banamusubiramo: naye Abaruumi baneecha babukule esimenyo siefwe nende esialo siefwe. ⁴⁹ Arali mulala khunibo, olangwa mbwe Kefa, owali mukukhani mukhongo omwaka okwo, nababoolera ari, mukorerwe liosi, ⁵⁰ kose simumanyire mbwe bienyekhana, omuundu mulala khufwira baandu, mbwe sialo sioosi sikhaye khusasikha. ⁵¹ Ne kano siyeboolera omwene: nabere omukukhani mukhongo omwaka okwo, yarusia obunabii ari, Yeso akhoyere afwire sialo esio. ⁵² Sinimusialo esio sionge'ne, arali mbwe abusie alala abaana ba Nasaye abasalana mubialo. ⁵³ Ne okhuchaka ludalo olwo bakhola mukhunga'no mbwe bamwire. ⁵⁴ Yeso siyachiririra okhukenda niyelolesia khu bayaudi; arali yaachia musialo esili ambi nende luumirira, mu lidookho lilangwa mbwe Ephraim, nachiririra nende abeeka baye. ⁵⁵ Naye pasaka ya Bayaudi yali ambi, ne abaangi barula musialo nibachia Yerusalemu pasika niisiri khuula, khulwo khwelabia, ⁵⁶ Ne nibakonya Yeso, nga baboolanira beene nibemere muikhekalu, mbwe mupara aneecha musiserero sino? ⁵⁷ Ne boombi abakukhani bakhongo nende Abafarisayo bali nibabisisie likhuwa mbwe niyakhabao omumanyire owali, aboole, bamale bamukule.