¹ Lunyuma lwa amakhuwa kano koosi , Yeso yambukha ingerekha weinyanja ya Galilaya, elwande lwalangwa mbwe , inyanja ya Tiberia. ² Omukanda mukhongo kwa abaandu kwamulonda, khulwo khuba bali nibabwene ebilolero biingi ebia yali nakholeere abalwaye. ³ Yeso yanina khu lugulu ne niyekhala ebwene eyo alala nende abeeka baye. ⁴ Omukholo kwe Siyaudi okwa Pasaka , kwali nikuli ambi. ⁵ Ngolwa Yeso yalola omukanda omukhongo kwa abaandu nikumwichira , yamala arebe Filipo ari , ''Khunakula ena emigati ekiera abaandu bano khulia?'' ⁶ Kario Yeso yalomaloma lino khupima Filipo , khulwo khubera omwene yali namanyire esia yali nachia okhukhola. ⁷ Filipo yamukalusia namubolera ari, ''Emigati ekia edinari mia chibiri sikiakhaera kata buli muundu okhunyola mudidi.'' ⁸ Mulala khu beeka oulangwa , Anderea , omusiani wabwe Simoni Petero , yabolera Yeso , ⁹ '' Khuli ano nende omusiani ouli nemigati kieingano kirano nende ching'eni chibiri , kata kario bino nisina khubaandu baangi?'' ¹⁰ Naye Yeso nabola , ''Mwikhasie abasacha mumikanda.'' Ne obunyasi buungi bwali abuundu awo. Khu kario abasaacha bekhala , abaera elifu chirano. ¹¹ Yeso yabukula migati , ne niyakhamala okhwebasia , yaberesania khu beeka nabo niboseria abaandu , yamala akhole ario khandi nende ching'eni nibanyola ngolwa lienya liali. ¹² Ngolwa abaandu bali nibakhekura boosi , yaboleera abeeka baye ari , ''Busie ebimeka biemigati bioosi bidong'ere , sibuleo esikora.'' ¹³ Bamala babusie bimeka biemigati nibarumbia ebikapu ekhumi nabibiri , ebiarulana khu migati kirano. ¹⁴ Ngolwa baandu balola esiamakana sino esiayali nakholere, baboola , '' Uno mubwadieri niye omunabii owakhoyera okhwicha musialo.'' ¹⁵ Naye Yeso olwa yamanya mbwe abaandu bali neliparo lio okhumukhola omuruki wabwe, yabarulakho nachia mulugulu yeng'ane. ¹⁶ Ingolobe ngolwa yola , abeeka baye bakholomokha munyanja. ¹⁷ Bengira muliaro nibachia Kaparnaumi khubirira munyanja. Esirima siali nisia khadira mubikha bino , naye Yeso yali nasia bechera. ¹⁸ Nayo inyanja yekinga khu mafinda khulwo muyaka mukhongo kwali nikuucha nende amani. ¹⁹ Kata kario nibakhafuka eliaro khulwa ebikha birambi , balola Yeso nakenda khunyanja nasuda ambi nende eliaro , nabo nibadirwa noburi. ²⁰ Naye nababoolera ari , ''Nesie ! Muraria khaba.'' ²¹ Bamala babe nomwoyo kwo okhu mufukirira muliaro , ne mubwangu eliaro liola ebukobero mumaloba ewa bali nibachia. ²² Inyanga yalondakho , omukanda kwa baandu bali nibemere lwande lundi lweinyanja , sibalolakho eliaro liosi , khumalakho elia abeeka baye bali nibaninire , arali Yeso siyali nachire ninabo. ²³ Kata kario , amaro kaandi kamala keche ambi nende abali nibalirire migati, khurula Tiberia. ²⁴ Ngolwa mukanda kwamanyirisia mbu Yeso nabeeka baye sibali awo , abeene bamala bengire mumaro nibachia Kaparnaumi okhukonya Yeso. ²⁵ Nibakha munyola elwande lweinyambukho lweinyanja , bamureba bari , ''Omwekesia , wechere eno lina? ²⁶ Yeso yabakalusia , ari , ''Mubwadieri , mubwadieri , simuli khungonya khulwo khuba mwabwene ebilolero , arali mbwe mwalire migati mwekura. ²⁷ Mura kholeranga mirimo siakhulia sibiya , arali mukholere siakhulia siria sio bulamu burabwayo khaba , esia Omwana wo mundu achia khuba beresia , khulwo khuba Baba Nasaye yamala okhumurakho esibalikho.'' ²⁸ Nabo nibamureba mbwe , ''Khukhole sina , khu khunyale okhukhola emirimo kia Nasaye? ²⁹ Yeso yabakalusia nababoleera ari , ''Kuno nikwo omulimo kwa Nasaye : Mbwe musubire mu oyo owayaruma.'' ³⁰ Kario nibamubolera , ''Nisilolero sina esiocha okhukhola , mbwe khubone mani khunyole okhusubira? Nisina esio khola? ³¹ Basefwe balichanga manna musichimi , ngolwa kaandikwa , 'Yababeresia omugati khurula mwikulu balie.'' ³² Naye Yeso nabakalusia ari , ''Mubwadieri , mubwadieri , khaba siyali Musa owa baberesia mugati khurula mwikulu , arali ni Baba wange niye ouli khu baberesianga omugati kwo bwadieri khurula mwikulu. ³³ Khulwo khuba omugati kwa Nasaye nokwo orula mwikulu nikwikha musialo nende okhuberesania obulamu.'' ³⁴ Khu kario bamala bamubolere , ''Omwami , ruberesie omugati kuno buli lwoosi.'' ³⁵ Yeso nababoolera , ''Nesie omugati kwo bulamu: oyo yesi owicha khwisie khaba sianabona injala , khandi ulia yesi ousubirira khaba sanaba nende obuluo. Ne khandi malire okhubaboolera ³⁶ mbwe kario mumalire okhumbona , naye simusubira. ³⁷ Oyo yesi owa Baba amberesia ananjichira , naye oyo yeesi ounjichira sindakha musukuna khaba. ³⁸ Khulwo khuba sindekha khurula mwikulu , okhwicha khukhola lienya liange , arali elienya lia oyo owanduma. ³⁹ Naye lino nilio lienya lia Baba owanduma , mbwe balia boosi bayamberesia , ndarakosia kata mulala , khumalakho boosi balamusibwe khunyanga yobumalirikhi . ⁴⁰ Khu kario lino nilio lienya lia Baba , mbwe ulia muundu yeesi oubwene Omwana namala amusubire , abe nobulamu oburabwayo khaba , nange ndakhamulamusie khunyanga yo bumalirikhi.'' ⁴¹ Abayahudi bamala babe namabuburo khuye , khulwo khuba yali nababolere ari, ''Nisie omugati kwekha khurula mwikulu.'' ⁴² Khandi bamala barebane mbwe , ''Uno siniye Yeso omwana wa Yosefu , owa simwana nende ng'ina khubamanyire? Bikenda birie bulano abole mbwe ,' Ndekha khurula mwikulu'?'' ⁴³ Yeso nabakalusia nababoolera ari ,''Mulekhe mabuburo akari weng'we . ⁴⁴ Abulao omuundu wakhecha khwisie Baba nara mugamire , oyo owanduma , nange ndakha mulamusie khunyanga yobumalirikhi. ⁴⁵ Kaandikwa mubanabii , 'Boosi bakhabe nibekesebwe nende Nasaye .' Ulia yesi owa khabulira nende okhweeka khurula khu Baba yechanga khwisie. ⁴⁶ Sikali mbwe omuundu yesi yamala okhumubona Baba , arali oyo ourula ewa Nasaye _ yabona Baba . ⁴⁷ Mubwadieri , mubwadieri , oyo yeesi ousubira ali nobulamu burabwayo khaba. ⁴⁸ Nesie omugati kwobulamu. ⁴⁹ Baseng'we balia manna musichimi , nabo nabafu khulwa bulano. ⁵⁰ Kuno nikwo omugati kwekha khurula mwikulu , mbwe omuundu anyole okhukulia , naye arafwa . ⁵¹ Nisie omugati mulamu okwekha khurula mwikulu : omuundu yesi nalia omugati kuno , aba anamenya obulamu burabwayo : ne omugati okwanjia oberesania nomubiri kwange khulwo bulamu bwesialo . ⁵² Bayaudi badirwa nende lirima beene khu beene nibaingana , nibaboola , ''Omuundu uno yakharuba arie omubiri kwaye mbwe khulie?'' ⁵³ Khandi Yeso nababoolera ari , ''Mubwadieri , mubwadieri , nimuralia omubiri kwa Omwana Womundu nende okhung'wa amabanga kaye , mubula obulamu mukari mweng'we . ⁵⁴ Ula yesi oulia omubiri kwange nende khung'wa amabanga kange ali nobulamu burabwayo , naye khandi ndakha mulamusie inyanga yobumalirikhi . ⁵⁵ Khulwo khuba omubiri kwange nesiakhulia siadieri, naye amabanga kange sing'webwa siadieri. ⁵⁶ Oyo oulia omubiri kwange nende okhung'wa amabanga kange adong'anga mukari mwange , nange mukari mwaye. ⁵⁷ Ngolwa Baba ouli mulamu yanduma , nange ngolwa menyanga khulwa niye , kario oyo oundia , yesi anamenya khubirira khwisie . ⁵⁸ Kuno nikwo omugati kwekha khurula mwikulu : okukabukhane nende kwa baseng'we balia ne nibafwa. Oyo yeesi oulia omugati kuno achia okhumenya obulamu burabwayo khaba .'' ⁵⁹ Kano koosi Yeso yakaboola musinagogi nali mukhwekesia Kaperinaumi . ⁶⁰ Kario baangi khu beeka baye abaulira mekesio baboola , ''Amakhuwa kano namadinyu : niwina ounyala okhukaulira?'' ⁶¹ Ngolwa Yeso yamanyirisia mukari mwaye mbwe abeeka baye bali namabuburo khu lino , yabareba ari , ''Likhuwa lino libasinyisie?'' ⁶² Ne biakhafwane birie nimwakhabone Omwana Womundu nanina nakalukha ewa yali mukhuchaka? ⁶³ Nei Roho niyo iberesanianga obulamu : omubiri sikuli nobukhala khu lioosi . Amakhuwa kababoolere niroho , ne khandi niko obulamu . ⁶⁴ Kata kario , baliwo balala khweng'we abarasubira. ''Khulwo khuba Yeso yamanya khurula mukhuchaka abo abarakhasubire , nende oyo owakhamukhobe . ⁶⁵ Yameda okhubaboolera ari , ''Nikhubera liene lino , ndamala okhuboola mbwe abulao ounyala khwicha khwisie Baba naramunyalire.'' ⁶⁶ Khulwa liene lino , abaangi khu beeka baye bamulekha , oburakenda ninaye khandi. ⁶⁷ Khulwesio Yeso yamala arebe abo ekhumi na babiri , ''Mwesi mwenya okhubwao?'' ⁶⁸ Simoni Petero yamukalusia namuboolera ari , ''Omwami niwina oundi owa khunyala okhuchira? Oli nende amakhuwa kobulamu , ⁶⁹ Naye efwe khwasubira khandi khumanyire mbwe niwe Kiristo , Omwana wa Nasaye mulamu .'' ⁷⁰ Yeso nakalusia nababoolera , ''Sinesie owa balobola , eng'we ekhumi nababiri , naye mulala khwing'we ne sikhieno?'' ⁷¹ Lino yalomaloma khu Yuda Isikarioti omwana wa Simoni : omulala khu ekhumi nababiri oyo owa khamukhobe .