¹ Lunyuma lwako khwaliwo nende omukholo kwa Bayaudi, naye Yeso yachia Yerusalemu. ² Ne Yerusalemu ebweneyo ambi nende omuliango okwa makondi, khwaliwo nende ediba elialangwa mbwe Bethsaida niliri nende amasaga karano. ³ Omukanda omukhongo kwa balwaye, aboofu ,abalema kose abakwa makara bali nibakona awo. ⁴ Khulwo khuba biriwo ebikha bia malaika yekhanga mumaachi okadubula. Ne oyo yeesi owarangira okhwingira mumaachi, lunyuma lwokhudubusibwa, yaona amalwaye kaye koosi. ⁵ Abwene awo yaliwo omusacha yali niyakhalwala emiaka makhumi kadaru nende munane. ⁶ Ngolwa Yeso yamulola nakonere awo, ne khandi mukhumanyirisia mbwe yali mumbera eyo mubikha birambi, yamureba ari, ''Wenya khuona?'' ⁷ Omulwaye welikara yamukalusia ari, ''Omwami, mbula omuundu owukhunjira mumaachi nikakhadubusibwa, mubikha biamberanga ninjia , omuundu uundi andangiriranga.'' ⁸ Yeso namuboolera ari, ''Bukha, obukule omugodoro kwao obweo.'' ⁹ Mubikha ebiene ebio yanyola okhuona, yamala abukule obuliri bwaye nakenda nachia: ne inyanga yene eyo yali Isabato. ¹⁰ Khu kario Abayaudi bamala baboolere oyo muundu waona, ''Ni inyanga ya Isabato , siofukirirwa okhukinga obuliri bwao dawe.'' ¹¹ Naye yabakalusia ari, ''Oyo oumbonisie niye oumboolere mbwe0, bukula omugodoro kwao wedwikhe okende nobwao.'' ¹² Bamureba khandi ,''Niwina oyo oukhuboolere mbwe bukula obuliri bwao okende nochia? ¹³ Kario, oyo owali naonesebwe siyali namumanyire ebilayi, khulwo khuba Yeso yali niyeyiibire nabwereo , khubirira mumukanda okwa baandu kwali awo. ¹⁴ Ebikha nibiakhabirao, Yeso yanyola omuundu oyo muhekalu, ne namuboolera, ''Lola omalire okhuona! Orakhola esionono khandi, wichukhana esindu sindi simanu siakhunyola.'' ¹⁵ Kario omundu oyo yamala abweo, ne naboolera Abayaudi mbwe ni Yeso niye wali namuonisie. ¹⁶ Ne okhulondana nende akeene kano, Bayaudi bamusandia Yeso, khulwo khubera yali nakholerenge ebindu bino inyanga ya Isabato. ¹⁷ Naye Yeso yabakalusia nababoolera ari, ''Baba wange alikho akhola emirimo khulwa bulano, Siesi , ndikho khola emirimo.'' ¹⁸ Khulwo khubera kano , Abayaudi bakonya muno okhumwira , khulwo khuba siyali nafunake sa Isabato yong'ane , arali yali nalangire Nasaye Simwana, niye keranisie khu Nasaye. ¹⁹ Yeso yabakalusia nababolera ari, ''Mubwadieri, mubwadieri, Omwana siyakhakhola siosi omwene, arali kalia akalola Simwana nakhola, naye Omwana yesi nilwo olwaakhola. Khulwo khuba Baba yamukhera ²⁰ Omwana , khandi amwekesianga buli sindu esia ye omwene akhola, naye khandi achia okhumumanyia emirimo mikhongo okhukhira kino, mbwe munyole okhuukisibwa. ²¹ Khulwo khuba ngolwa Simwana alamusia abafu nababeresia obulamu, nilwo olwa Omwana yesi aberesanianga obulamu khu yesi owakhera. ²² Khulwo khuba Sefwe siayasianga omundu yesi dawe, arali yaberesia obukhalaki bwemisango bwoosi Omwana ²³ Khu kario buli omundu anyale okhumuria Omwana , ngolwa amuria Simwana. Oyo ouraria Omwana , khaba siyaria Sefwe owamuruma dawe. ²⁴ Mubwadieri , mubwadieri , oyo yeesi ouulira elikhuwa liange nasubira oyo owanduma , ali nobulamu burabwayo ne khandi sialikhalakirwa, arali amalire okhubira mulifwa nachia mubulamu. ²⁵ Mubwadieri , mubwadieri, mbabolera mbwe ebikha biicha, ne khandi nibio bino, ebia abafu bachia okhuulira edoboosi lia Omwana wa Nasaye, naye abo abaulira banamenya. ²⁶ Ngolwa Sefwe alinobulamu mukari mwaye, nilwo lwayaberesania Omwana, mbwe kario abe nobulamu mukari mwaye, ²⁷ Naye khandi Sefwe yaberesia Omwana obunyali bwo khukhalaka omusango , khulwo khuba nomwana owa omundu. ²⁸ Muraukisibwa nende lino, khulwa khuba ebikha bicha bia balia boosi bali muching'ani bachia okhuulira lidoboosi liaye. ²⁹ Ne bachia okhurula erwanyi: balia abakhola amalayi khubulamusibwi bwo bulamu, naye balia abakhola amabi khubulamusibwi bwo khukhalakirwa omusango. ³⁰ Esie sieng'ane sinyala okhukhola esindu sioosi khaba. Ngolwa mbulira, nilwo olwakhalaka, ne obukhalaki bwange nobwa abweene khulwo khubera singonyanga elienya liange omweene, arali elienya lia ula owanduma. ³¹ Esie nindekholera obuloli omweene , obuloli bwange sibuba bunaba obwa bwadieri. ³² Aliwo ourusianga obuloli bulondana ninange, nange manyire mbwe obuloli bwa akhola khwisie nobwa bwadieri. ³³ Mwarumanisie khu Yohana, naye yarusisie obuloli bwo bwadieri. ³⁴ Naye obuloli bwa nyola siburula khu muundu khaba , kario mbolanga ebindu bino mbwe munyole okhuonisibwa. ³⁵ Yohana yabere itara yadukha nilolesia obulafu, naye eng'we mwabere nimusangalira okhuba mubulafu obwo mubikha bididi. ³⁶ Kata kario ndi nende obuloli bukhongo obukhira obwa Yohana , khulwo khuba emirimo ekia Baba yamberesia okhusirisia, ekia ndi okholanga, ekiene nobuloli buyera mbwe Baba yanduma. ³⁷ Baba owanduma omwene yamala okhurusia obuloli bwange. Eng'we musiaulirakho lidoboosi liaye kata okhubonakho ifwani yaye mubikha biosi khaba. ³⁸ Khaba simuli nende elikhuwa mukari mweng'we, khulwo khubera simusubira mu ulia owayaruma. ³⁹ Mukonyeresianga mumaandiko khulwo khubera mupara mbwe obulamu burabwayo buli muniko, khumalakho amaandiko keene kano akanomanomangakho, ⁴⁰ Ne khandi simuli abaangu bokhunjichira mbwe munyole obulamu. ⁴¹ Esie sinyolanga oluyali khurula khu baandu , ⁴² Ne kario bamanyire, mbwe mubula obukheri bwa Nasaye mukari mweng'we. ⁴³ Esie ndecha mulira lia Baba , ni simufukirira khaba. Oundi niyechukhana yecha mulira liaye omwene , muchia okhumufukirira. ⁴⁴ Munasubira murie, eng'we bafukiriranga oluyali lurula khubasieng'we , ni simukonya oluyali lurula khu oyo ouli Nasaye yeng'ane? ⁴⁵ Murapara mbwe njia khubayasia imberi wa Baba. Oyo oubayasia niye Musa, oyo owamusubiramo. ⁴⁶ Kaba mbwe mwasubira Musa, siesi mwakhasubire , khulwo khuba koosi akayaandika kaanomanomakho esie. ⁴⁷ Nikakhaba mbwe simusubira aka yaandika , munasubira murie amakhuwa kange?