¹ Kario Yeso olwayamanya mbwe Bafarisayo bali nibamalire okhuulira mbwe alikhunyola abeeka baangi nende hubatisia, abaandu baangi khukhira Yohana ² khumalakho Yeso mwene siabatisianga, arali abeeka baye, ³ yarula Yudea nakalukha Galilaya. ⁴ Ne biali mbwe abirire mu Samaria. ⁵ Khu kario yola mulukongo lwa Sikari mudookho lia Samaria, ambi nende indalo ya Yakobo yali niyaberesia Yosefu omwana waye. ⁶ Eisebere ya Yakobo yali abweneao. Yeso yamala yekhale ambi nende isebere eyo khulwo bujong'u bwolukendo. Ne biali mubikha bia esidere musaa chisasaba. ⁷ Omukhasi Musamaria yecha okhudaya amaachi, ne Yeso namubolera, ''Jama umbe maachi ng'we.'' ⁸ Khulwo khuba abeeka baye bali nibachire mudokho okhukula ebiakhulia. ⁹ Naye omukhasi Musamaria namubolera ari, ''Bikenda birie, ewe Muyaudi, usabe amaachi , esie mukhasi Musamaria?'' Khulwo khuba Abayaudi sibakholeranga alala nende Abasamaria. ¹⁰ Ne Yeso namukalusia namubolera ari, ''Wakhamanyire esianwa sia Nasaye, nende ulia ouli okhusabanga amaachi, newe wakhamusabire, naye yakhakhubere amaachi ko bulamu.'' ¹¹ Ne omukhasi oyo namubolera ari, ''Omwami, obula indo yokhudaira khandi obwina noburambi. Orusirie ena amaachi ko bulamu? ¹² Khaba si oli omukhongo okhukhira baba wefwe Yakobo , owaruberesia eisebere ino eyayang'wechangamo alala nende abaana baye nende emiruko kiaye?'' ¹³ Yeso namukalusia namubulera ari, ''Ulia yesi oung'wa khumachi kano ananyola obuluo khandi, ¹⁴ arali ulia yesi oung'wa amaachi kamuberesia sananyola obuluo khandi. Ne kario, amaachi kamuberesia kanekhola eisebere mukari mwaye, nikakhulukusia mubulamu burabwayo dawe.'' ¹⁵ Omukhasi namubolera ari, ''Omwami, mberesie amaachi ako mbwe ndaranyola obuluo khandi nende okhuchirira khwicha ano khudaya amaachi.'' ¹⁶ Naye Yeso namubolera, ''Chia, olange omusacha wao, mani okalukhe ano.'' ¹⁷ Naye omukhasi oyo namubolera ari, ''Mbula omusacha.'' Yeso namukalusia, ''Obolere obwadieri , 'Mbula omusacha,' ¹⁸ khulwo khuba wakhamala okhuba nende abasacha barano, ne kata kario owoli ninaye mubikha bino yesi khasi nomusacha wao. Obolere obwadieri.'' ¹⁹ Omukhasi oyo namubolera ari, ''Omwami, ndola mbwe oli munabii. ²⁰ Basefwe balamiranga khulugulu luno, naye eng'we mubolanga mbwe Yerusalemu niwo abuundu wa baandu bakhoyera okhulamira.'' ²¹ Yeso namubolera ari, ''Subirire mukhaye, mbwe ebikha biicha ebia simunamulama Sefwe khulugulu luno kose kata Yerusalemu. ²² Mulamanga siamuramanyire. Efwe khulamanga owakhumanyire, khulwokhuba obuonia burula khu Bayaudi. ²³ Kata kario, ebikha biicha, ne nibio bino, ebia balaami bobwadieri bachia okhumulama Sefwe muroho nende obwadieri, khulwo khuba Sefwe alikho akonya abaandu nga abeene abo bamulame. ²⁴ Nasaye niRoho, ne balia bamulama bakhoyera okhumulama muroho nende obwadieri.'' ²⁵ Omukhasi oyo namubolera ari, ''Manyire mbwe Messiya alikho yeecha oyo oulangwa Kiristo. Omwene oyo namala yeecha, yakharufunulire amakhuwa koosi.'' ²⁶ Yeso namubolera ari, ''Nisie omwene oyo, oulomalomanga ninawe.'' ²⁷ Mubikha biene ebio abeeka baye bamala bakalukhe. Ne baukisibwa muno ngolwa yali nalomalomanga nende omukhasi, arali abulao yesi owamureba , ''Mbwe okonyanga sina? kose Khulwasina olomalomanga ninaye?'' ²⁸ Khu kario mukhasi oyo yamala alekhe isiongo yae, nakalukha mudookho lia Samaria, nabolera abaandu, ²⁹ ''Mwiche, mulole omuundu oumbolere amakhuwa kange koosi kandakhola. Omwene uno siafwana khuba niye Kiristo?'' ³⁰ Abandu barula mudookho nibamala nibamwichira. ³¹ Mubweyango bwene obwo, abeeka baye bali nibamwelombaga bari, ''Omwekesia, liakho esindu.'' ³² Naye yababoolera ari, ''Esie ndi nebiakhulia biokhulia ebiamuramanyire.'' ³³ Khu kario abeeka barebana, Niyaliwo omuundu wali namurerere esiokhulia siosiosi?'' ³⁴ Yeso nababoolera, ''Ebiakhulia biange nikhukhola elienya lia oyo owanduma nende okhusirisia emirimo kiaye. ³⁵ Eng'we simubolanga, 'Kisisiri miosi kindi kinne khu likesa liule'? Mbabolera, lingale mulole chindalo, khulwobera ebikese biangale biolere okhukeswa! ³⁶ Oyo oukesa anyola omurungo khandi abusianga ebiamo khulwo bulamu buralibwayo dawe, kario mbwe omuraki nende omukesi banyole osangalira khalala. ³⁷ Khu kario lukado lubolwangwa mbwe, omuraki araka no oundi akesa, 'nolwa dieri. ³⁸ Ebarumire mukese ebiamurakholere mirimo. Abaandi bakholera emirimo, kario mwesi mumalire okhwingira mumirimo kiabwe.'' ³⁹ Omukaanda mukhongo kwa Basamaria mudookho elio bamusubirira , khurulana nende likhuwa liobuloli bwomukhasi, ''Ambolere amakhuwa kange koosi kandakhola.'' Khulwesio, Abasamaria nibecha ⁴⁰ ewayali, bamusaya amede okhuba ninabo, namalayo chinyanga chibiri. ⁴¹ Obuungi bwabwe bamusubira khulwe likhuwa liaye. ⁴² Kario bamala baboolere omukhaye oyo mbwe, ''Sikhusubira sa khulwobuloli bwao bwong'ane, efwe abeene khwakhaulira, ne khandi khumanyire mbwe uno obwadieri nomuonia wesialo.'' ⁴³ Lunyuma lwenyanga echio chibiri, yarulayo nachia Galilaya. ⁴⁴ Kata kario , Yeso omwene yali nabolere ari omunabii abulanga oluyali ewabwe. ⁴⁵ Olwayola Galilaya, Abagalilaya bamwingisia nende omwoyo kwoosi, khulwo khuba bali nibabwene bioosi ebiayali nakholere Yerusalemu musiserero. ⁴⁶ Khandi yakalukha Kana yaGalilaya, ewayali nakalukhasie amaachi khuba ifini. Yaliwo omundu mulala omukhongo owomwana waye yali omulwaye eria Kaperenaumu. ⁴⁷ Niyaulira mbwe Yeso yali niyolere Galilaya khurulira Buyudea, yamuchira nende okhumusaba mbwe achie ninaye anyole okhuonia omwana waye, owali nakhirirwe ambi nende okhufwa. ⁴⁸ Kata kario Yeso yamubolera, ''Noralola ebilolero nende akamakana siwakhasubira.'' ⁴⁹ Oyo owoburuki namusaba ari, ''Omwami , khuchie khwakanire omwana wange nasiri okhufwa.'' ⁵⁰ Yeso yamubolera mbwe, ''Bwao. Omwana wao nomulamu.'' Omundu oyo yasubira elikhuwa lia Yeso yamubolera, yamala abweo. ⁵¹ Ngolwa yali nachia, abakholi baye bamwakanira, nibamubolera mbwe omwana waye nomulamu. ⁵² Yamala abarebe ebikha biayaoneramo. Bamukalusia bari, ''Ekulo ebikha bia esaa saba musidere okuyendero kwamulekhere.'' ⁵³ Abwene ao simwana yamanyirisia mbwe nibio ebikha bia Yeso yali namubolere mbwe, ''Omwana wao nomulamu.'' Kario ye mwene khalala nende boosi beinyumba yae basubira. ⁵⁴ Sino nisio silolero siakhabiri esia Yeso yakhola niyakharulanga Ebuyudea nachia Galilaya.