¹ Khwali nende Mufarisayo owalangwa Nikodemo, omwemeresi weSiyaudi. ² Omusacha uno yechera Yeso musiro namubolera, ''Rabbi omwekesia, khumanyire mbwe oli omwekesia owarula ewa Nasaye , khulwo khuba abulao ounyala khukhola akamakana kokholanga , Nasaye narali naye.'' ³ Yeso yamukalusia nabola ari, ''Mubwadieri, mubwadieri omuundu narebulwa ekhabi liokhubiri, khasianyala okhubona obwami bwa Nasaye.'' ⁴ Nikodemo namureba, ''Binyalikha birie omuundu okhulire okhwibulwa khandi? Si anyala okhwingira ekhabi liakhabiri munda yang'ina, khandi anyole okhwibulwa, binyalikhana?'' ⁵ Yeso yamukalusia ari ''Mubwadieri, mubwadieri omundu narebulwa mumaachi nende mu Roho, si anyala okhwingira mubwami bwa Nasaye. ⁶ Silia siebulwa mumubiri nomubiri, ne silia siebulwa mu Roho ni roho. ⁷ Oraukisibwa nende eliakhubolere, ''Mbwe okhoyerwa khwibulwa khandi.'' ⁸ Omuyaka kuuchanga mumbeka chiosi ,ne siwakhamanya ewakurula nende aakuchia. Kario nilwo lwali oyo wibulwa mu Roho.'' ⁹ Nikodemo namukulusia ari, ''Kano kakhekholekha karie?'' ¹⁰ Yeso namukalusia namubolera ari, ''Oli omwekesia mu Israeli, ne khandi somanyire makhuwa kano? ¹¹ Mubwadieri mubwadieri, khubolera, efwe khulomalomanga esia khumanyire, nikhurusiria obuloli kalia kakhubwene. Ne khumalakho simufukirira obuloli bwefu. ¹² Nikakhaba mbwe khubolere ebindu bilondana nende esialo, ne siosubira, onasubira orie nikhubolera khulondana nende ebindu biomwikulu? ¹³ Abulao owamala okhunina mwikulu arali oyo owekha khurula mwikulu_ Omwana wo OMundu. ¹⁴ Ngolwa Musa yakingula esifwanani sie injukha musichimi, kario nilwo olwa Omwana wo Mundu achia okhukingulwa, ¹⁵ mbwe balia boosi bamusubirira banyole obulamu burabwayo dawe. ¹⁶ Khulwobera Nasaye yakhera muno esialo, yarusia Omwana waye muderwa , mbwe ulia yesi oumusubira arafwa, arali anyole obulamu buralibwayo dawe. ¹⁷ Khulwo khuba Nasaye hasiyaruma Omwana waye musialo mbwe sikhalakirwe, arali sinyole okhuonisibwa muniye. ¹⁸ Ulia yesi oumusubira siakhalakirwa, arali oyo ourasubira yamala okhukhalakirwa khulwo khuba siasubira mulira lia Omwana wa Nasaye muderwa . ¹⁹ Sino nisio sifunane siobukhalakirwi: Obulafu bwecha musialo , ne abaandu nibakhera esirima okhira obulafu khulwo khuba ebikhole biabwe biali bimayanu. ²⁰ Khulwo khuba yeesi oukhola obumayanu siakheranga obulafu, ne khandi siyakhecha owa obulafu buli, mbwe kario ebikhole biaye birabakalwa. ²¹ Kata kario, oyo oukholanga akobwadieri yechanga obulafu buli mubwakhakhu , kario bilolekhane mbwe bikholerwe mu Nasaye.'' ²² Lunyuma lwakano, Yeso nende abeeka baye bachia mumaloba Kebuyudea. Yamenya khulwenyanga khalala ninabo ebwene eyo nabatisianga. ²³ Yohana yesi yali nabatisianga Ainoni ambi nende Salimu khulwokhuba amaachi maangi kali nikanyolekha ebweneyo. Abaandu bali nibamwichiranga nababatisia, ²⁴ khulwo khuba Yohana yali narasukunwa musiboye. ²⁵ Ne amaingani karulirawo akari khu balala ba abeeka ba Yohana nende omuyahudi mulala khulondana nende omukholwa kwokhwosania. ²⁶ Bamuchira Yohana nibamubulera, ''Omwekesia, ula owa wabere naye ingerekha indi yomwalo kwa Yorodani, owa wabolere obuloli bwaye, lola alikhubatisia, ne baandu boosi bali khumuchira.'' ²⁷ Yohana yabakalusia ari, ''Omuundu siyakhanyala okhunyola sindu sioosi naraberesibwe khurula mwikulu. ²⁸ Eng'we abeene munyala khurusia obuloli mbwe ndaboola, ''Mbwe khasindi Kiristo , okhumalakho ndarumwa imberi waye mbwe murangirire.' ²⁹ Omukhana ochia okhudekha abechanga owa mwene siserero. Naye omulolera womwene siserero, ngolwa yemanga namurekeresia owesiserero, asangaliranga muno lidoboosi liomwene siserero. Kho kario, isangalo yange yolerere. ³⁰ Akhoyera okhukingulwa yemede , nange kario ndeduduye. ³¹ Oyo ourula akulu ali akulu webindu bioosi. Oyo ourula musialo nowomusialo ne khandi alomalomanga akomusialo. Ne oyo ourula mwikulu ali akulu webindu bioosi. ³² Akholanga obuloli khubiria biabwene nende ebiaulire, khumalakho abulao ofukirira obuloli bwaye. ³³ Ulia ofukirire obuloli bwaye arwekesie mbwe Nasaye nowobwadieri. ³⁴ Khulwo khuba oyo owa Nasaye arumire alomalomanga makhuwa ka Nasaye. Khandi siaberesaninga Roho musikero. ³⁵ Oubere Baba yakhera Omwana ne yalekhula ebindu bioosi mumukhono kwaye. ³⁶ Yesiyesi ousubirira muMwana ali nende obulamu burabwayo dawe, ne yesi ouleka narasubira muMwana siachia obulola obulamu, arali oburima bwa Nasaye buli akulu wabwe.''