¹ Lunyuma lwechinyanga chidaru, khwali nende esiserero mu Kana ya Galilaya, ne ng'ina Yeso yaliwo. ² Yeso nende abeeka baye bali nibalangirwe musiserero. ³ Ngolwa ifini yababwera, Ng'ina Yeso yamuchiira namubolera ari, ''Babwererwe ifini.'' ⁴ Naye Yeso yamureeba ari, ''Mukhaaye, khulwa sina nonjichira? Ebikha biange bisiri okhuula.'' ⁵ Naye Ng'ina yamala abolere abakhalabani ari, ''Mukhole lioosi elia anababolera.'' ⁶ Bulano khwali nende chindamu chisasaba echielikina echia maachi, akabekhonyeraanga mumikholwa kie Siyaudi ekiokhwosania, buli indamu yali inyala okhuchiamo chisiongo chibiri kose chidaru echia maachi. ⁷ Yeso yababoleera ari ''Ichusie chindamu echio nende amaachi.'' Bechusia chioosi ngolwa babolerwa. ⁸ Abwene awo yabolera abakhalabani ari, ''Mudaye mani muyirire omwemeresi weng'we.'' Ne bakhola bario. ⁹ Omwemeresi wesiserero yabilakho amaachi kali nikamalire okhwekalukhania ifini, okhumalakho siali namanyire ewa yali nirulire kario abakhalabani bali nibadayire amaachi bamanya. Yamala alaange omwene siserero, ¹⁰ namureeba ari, ''Buli muundu aberesanianga ifini indayi mukhuchaaka khwo mukholwa namalirisia nende inyaangu mukhumala abaandu nibajong'ere. Khumalakho ewe osiri obikhire ifini indayi okhula bulano?'' ¹¹ Esilolero siamberi sino Yeso yasikhola Kana ya Galilaya, abwene awo niyekesia oluyali lwaye, ne abeeka baye nibamusubirira ¹² Lunyuma lwakano, Yeso, Ng'ina, bamwanang'na, khalala nende abeeka baye bachia Kaparnaum, ne nibamenyayo khulwenyanga chindidi. ¹³ Mundalo echio Pasaka ya Bayaudi yali ambi, kho Yeso yachia Yerusalemu. ¹⁴ Olwa yengira muhekalu yanyola abachurusi beching'ombe, nende amakondi, nende amakaburuku, ne balia abobukhala bwokhukalukhania esende bali nibekhalemo. ¹⁵ Yamala akhwaniye omusarita kwebifundikho mani nabarusia boosi khurula muhekalu, khalala nende chimbusi neching'ombe. Yasalania amatongolo kabachurusi, nafumamia echimesa chiabwe. ¹⁶ Ne khu bakusi bamakaburuku, yalagira mbwe, ''Bakarusie erwanyi. Yakame okhuikhola inyumba ya Baba nga esiro.'' ¹⁷ Abeeka baye bechulisia mbwe kaandikwa, ''Embalikha ye inyumba yao sinanyungubasia' ¹⁸ Kario abo abeSiyaudi bobunyala bamala bamurebe bari, ''Nisilolero sina esia orwekesia , khukano koli okhola?'' ¹⁹ Yeso yabakulusia ari, ''Nyaasie lihekalu lino, nange ndaliemekha khandi munyanga chidaru.'' ²⁰ Abo abeSiyaudi bobunyala nibabola, ''Ihekalu ino yombakhwa khulwemiika makhumi kane nende kisasaba, nawe onaliemekha munyanga chidaru?'' ²¹ Kata kario, yali nalomalomeranga lihekalu liomubiri kwaye. ²² Ne niyakhalamusibwa okhurula mubafu, abeeka baye bechulisia mbwe yaboola lino, khu kario basubira amaandiko nende likhuwa lia Yeso yali nalomalome. ²³ Ngolwa yali Yerusalemu muisangalo ya Pasaka, abaangi basubira mulira liaye ngolwa babona bilolero biayakhola. ²⁴ Naye Yeso siyabesika khulwo khuba yabamanya boosi, ²⁵ Khandi kario siyenya obuloli khurula khuyesi, khulwokhuba yamanya bilia ebiri mumundu.