¹ Mukhuchaaka Likhuwa yaliwo, naye likhuwa yabechaanga alala nende Nasaye, ne Likhuwa yali Nasaye. ² Omwene oyo yaliwo mukhuchaaka alala nende Nasaye. ³ Ebindu bioosi biakholwa khulwaniye, arali niye sibulao sioosi esiakhekholekhe. ⁴ Muye nimwo omwa obulamu bwali, ne obulamu buno bwali obulafu obwa abaandu. ⁵ Nabwo obulafu bwadukhaanga musirima, nasio sirima sisianyala okhubukhira dawe. ⁶ Yarulirao omundu owarumwa khurula khu Nasaye, owalangwa mbwe Yohana. ⁷ Omwene oyo yeecha nga omuloli , khulwo burumbusi obwo bulafu, mbwe boosi banyoole okhusubira khubirira khuniye. ⁸ Uno siali obulafu bwene obwo, arali omuloli nende omurumbusi owobulafu bwene obwo. ⁹ Obulafu obwo bwadieri, obukhoserianga abaandu boosi, bwali nibwichire musialo. ¹⁰ Yaali musialo, ne khandi sialo siakholwa khubirira muye, kata kario esialo sisiamumanya dawe. ¹¹ Yeecha khubalia abaye, ne beene abo simala bamufukirira. ¹² Ne boosi abamufukirira, abo abasubirira mulira liaye, yababeresia obunyali obwo okholwa abaana ba Nasaye. ¹³ Abeene bano sibebulwa khulwa mabanga dawe, kata khulwa elienya eliomubiri, kata elienya liomuundu, arali elienya elia Nasaye. ¹⁴ Ne Likhuwa yekhola omubiri, namenya mwifwe, ne nikhulola oluyali lwaye, oluyali lulia ngolwa omwaana muderwa owarula owasefwe, niyechulemo obukosia nende obwadieri ¹⁵ Yohana yarumbula obuloli khuye, mudoboosi nabola ari, ''Uno niye owandalomalomengekho owiicha lunyuma lwange, ouli noluyaali okhukhira, khulwo khuba yandangirira okhubao.'' ¹⁶ Kario khurulana khubwichufu bwaye, efwe fweesi khwanyola okhunina khurula khu bukosia khuchia khubundi. ¹⁷ Khulwo khuba malako kaberesanwa khubirira khu Musa. Obukosia nende obwadieri bweecha khubirira khu Yeso Kirisito. ¹⁸ Siyaliwo owamala okhumulola Nasaye: oyo Nasaye yeng'ane, arali oyo ouli alubafu wasamwana, oumalire okhurumanyia Nasaye. ¹⁹ Buno nibwo obuloli bwa Yohana yaboola, ebikha bia bayahudi baruma bakukhani nende Balawi khurula Yerusalemu, mbwe bachie bamurebe mbwe ''Ewe oli wina?'' ²⁰ Naye yeyama, oburekana dawe, niyebola ari ,''Sinesie Kirisito khaba.'' ²¹ Nibamureba khandi, ''Mbwe ne oli wina? Niwe Eliya? Naye , niyekana ari siniye, khandi nibareba bari, ''Oli munabii? Kario yakana ari, ''Khaba.'' ²² Bamala bamurebe khandi, ''Mbwe niwe wina, khuyirire abo barurumire makalusio? Welomalomakho orie omwene? ²³ Naye nabola mbwe, ''Nesie lidoboosi, lirangirisia musichimi: Mukololosie ingira yo Omwami, ngolwa munabii Isaya yaboola.'' ²⁴ Ne abarumwa balala khu Bafarisayo , ²⁵ Bamala bamureebe bari, ''Khulwasina oli khubatisianga norali Kiristo, Eliya kose munabii?'' ²⁶ Yohana yabakalusia, nababolera ari, ''Esie mbatisia nende amachi. Ne kario aliwo owemere mwing'we owa muramanyire. ²⁷ Omwene oyo niye owicha lunyuma lwange, owesie ndarakwanirwa kata okhubolola echisia chiebilaro biaye dawe.'' ²⁸ Amakhuwa kano kekholekha ela Bethania, ingerekha ewa Yorodani ayo Yohana yali nabatisianga. ²⁹ Inyanga yalondakho Yohana yalola Yeso namwichira, namala naboola ari, ''Lole , Likondi lia Nasaye elichia okhurusiao echimbi chiesialo! ³⁰ Omwene uno niye owa ndalomalomengekho, mbwe ulia owiicha lunyuma lwange , nomukhongo okhukhira, khulwo khuba yandangirira okhubao.' ³¹ Sindakhamumanyire, ne kario biaali birio mbwe anyale okhufunulwa khu Israeli, kakera ndeecha nende libatisia eliamaachi.'' ³² Yohana yarusia obuloli, naboola ari: ''Ndalola Roho niyeekha mufwaani yeliusi khurula mwikulu, namala namwemakho. ³³ Sindali nimumanyirisia dawe, arali ulia owanduma okhubatiisia mumaachi yali niyamboleere ari, ''Ulia owawakhabone Roho niyeekha namudong'akho, niiye owakhabatisie nende Roho Mulafu.' ³⁴ Malire okhubona khandi ndusia obuloli mbu uno no Omwana owa Nasaye.'' ³⁵ Khandi, inyanga yalondakho, ngolwa Yohana yali niyemere nende babiri khubeeka baye, ³⁶ Balola Yeso nakendanga, ne Yohana nabola ari; ''Lole Likondi lia Nasaye!'' ³⁷ Abeeka baye babiri ngolwa baulira nabola kano bamala bamulonde Yeso. ³⁸ Kario Yeso olwa yabalola nibamulonda yabareba ari, ''Ni sina esia mukonyanga?'' Bamukalusia,'' Rabbi'' ''Omwekesia'' , ''wamenya ena? ³⁹ Yamala ababoleere, ''Mwichi mulole.'' Kho kario bamala bachie bamanyirisie owa yali namenyaanga: ne nibaonga ninaye inyanga eyo, khulwo khuba biali musaa chine echia ichuli. ⁴⁰ Mulala khu abo abali nibaulire Yohana nalomaloma yamala namulonda Yeso, yali Anderea, mwanang'ina Simoni Petero. ⁴¹ Omwene oyo yarangirira okhubukanana nende mwanang'ina Simoni, namala namubolera ari, ''Khunyolere Messiah'' nilikalukhanisibwa ''Kiristo''. ⁴² Yamala amurere khu Yeso, naye Yeso yamulingera namala namubolera ari, ''Niwe Simon omwana wa Yohana, Onalangwa Kefas'' nilikalukhanisibwa ni ''Petero''. ⁴³ Inyanga yalondakho,ngolwa Yeso yali nadakha okhurula khuchia Galilaya, yabukanana nende Filipo namala namubolera ari, ''Nonde.'' ⁴⁴ Naye Filipo mwene oyo yali omuundu khurula Bethesaida, Edokho lia Anderea nende Petero. ⁴⁵ Filipo yanyola Nathaniel namubolera ari, ''Ula wa Musa yandiikakho mumalako, nende banabii, khumunyolere: Yeso omwana wa Yosefu, okhurula Nasareti.'' ⁴⁶ Naye Nathaniel namubolera ari, ''Sindu silayi sioosi siakharula Nasareti?'' Ne Filipo namubolera ari, ''Icha olole.'' ⁴⁷ Yeso yamulola Nathaniel namwichira , ne nalomaloma kano khulondana naye, ''Mulole mwiIsraeli owa bwadieri, oubula obubacha mukari mwaye!'' ⁴⁸ Naye Nathaniel namureba ari, ''Umanyire orie?'' Ne Yeso namukalusia ari, Filipo nasiakhulanga, ''Ngolwa obere niwikhale asi wo musaala , Esie khubwene.'' ⁴⁹ Nathaniel namubolera ari, ''Rabbi, oli Omwana wa Nasaye! Newe Omuruki wa Israeli!'' ⁵⁰ Naye Yeso yamukalusia namubolera ari, ''Khulwo khuba khuboleere mbwe khubwene niwikhale asi wo musaala, 'bulano osubira? Wicha okhulola ebindu bikhoongo ebikhira lino.'' ⁵¹ Yamala nababoleera khandi ari , ''Mubwadieri mubwadieri, mbaboleera mbwe , muchia okhuboona likulu nilikukhe, naye abamalaika ba Nasaye nibanina nende okhwikha khu Omwaana wa omuundu.''