¹ Indalo yokhurangirira eya idominika , Maria Magadalena yauna , esirima nisisiriwo , olwayola khusirindwa , nanyola elikina nilirusibweyo. ² Yerukha nachia ewayali Simoni Petero , nende ulia omweka owa Yeso yali yakhera , nababoolera , murusisie omwami musirindwa , ne khukororwe ewa mumurere ? ³ Petero narula , nende omweka uundi ulia , nibeecha khusirindwa . ⁴ Kho berukhira alala ; ne omweka uundi ulia yabiramo Petero , narangirira okhula khusirindwa . ⁵ Olwa yagunama , okhulingera mukari , yalola echingubo chamang'iniesi chikonere awo ; ne siyengiramo khaba . ⁶ Ne olwa Simoni owali namulondanga yola , yengira musirindwa , ne naloola chingubo echo echamang'iniesi chikonere awo . ⁷ Nende ifungo , eyali khumurwe kwaye , eyirali alala nende chingubo chamang'iniesi , arali biboyerwe alala biong'ene indulo . ⁸ Omweka uundi oyo yesi owali arangirire khwicha khusirindwa , yoola ne nasubira . ⁹ Bali basiri khumanya amaandiko mbwe akhoyere abukhe mubafu . ¹⁰ Abeeka nibabwao mumadala kabwe khandi . ¹¹ Naye Maria yachirira okhwema erwanyi wesirindwa naliranga ; ne ngolwa yachirira khulira , yagunama asi nalinga musirindwa . ¹² Yaloola abamalaika babiri muchingubo chindafu bekhale , omulala namurwe , nowundi namakulu , owomubiri kwa Yeso kwali nikurerwe . ¹³ Nibamureba , mukhasi ewe , oliranga sina ? Nabakalusia , okhuba babukule omwami wange , ne ngororwe ewabamurere . ¹⁴ Niyakhamala khuboola ario , yakalukhana inyuma , naloola Yeso niyemere , oburamanya mbwe niye . ¹⁵ Yeso namureba , omukhasi , oliranga sina ? Okonyanga wina ? Nolwa yakaala mbwe nomulimi , yamuboleera , omukhongo wange , nikaba mbwe omurusisie ano , mboolere owomurere , mubukule . ¹⁶ Yeso nalanga , Maria , nakalukhana , namuboolera , Raboni ; nikhwo khuboola mbwe , ''omukhongo wange''. ¹⁷ Yeso namuboleera , orandirakho ; okhuba siri okhuburukha khuchia ewa Baba ; arali chia khubakherwa befwe obaboolere mbwe njia ewa Baba , nende Baba weng'we ; khandi Nasaye wange ouli Nasaye weng'we . ¹⁸ Maria Magadalena yeecha nababoolera abeeka ari yakhalola omwami , ne yakhamuboolera makhuwa ako . ¹⁹ Indalo yene eyo ingolobe , niyiri indalo yokhurangirira eyeidominika , emiliango nikisiri nikikale ewa abeeka bali khulwo okhuria abayaudi , Yeso yeecha niyema akari wabwe nababoolera , emirembe kibe khweng'we . ²⁰ Niyakhamala khuboola ario , yabekesia amakhono kaye nende mumbafu mwaye . Abeeka nibamala nibasangala , khulwa khumulola Omwami . ²¹ Yeso nababolera khandi , omulembe kube khweng'we ; ngolwa Baba yanduma , siesi baruma . ²² Niyakhamala khuboola ario , yabafurakho muyia , nababoolera , munyole Omwoyo Mulafu . ²³ Oyo owa munalekhera chimbi chiaye analekherwa , naye oyo owamuralekhera chimbi chiaye sanalekherwa khaba . ²⁴ Naye Tomasi omulala khubeeka olangwa mbwe Didimo , siali alala ninabo nga Yeso yeecha . ²⁵ Abeeka baandi nibamuboolera bari , 'Khwakhalola Omwami.' Naye nababoolera , okhuula ngandaloola nechimoni chiange amafumire kemisumari , khandi ndirekho nolwala lwange mulubafu lwaye khasindasubira . ²⁶ Olunyuma lwa chindalo munane abeeka boosi nibali mukari , ne Tomasi yesi yali alala ninabo ; Yeso yeecha , emiliango nikisiri nikikale , niyema akari wabwe , naboola , emirembe kibe khweng'we . ²⁷ Naboolera Tomasi , "Reera olwala lwao , khandi olinge makhono kange ; khandi orere mukhono kwao , obabasie mulubafu. lwange ; olekhe khukanakana arali osubirire . ²⁸ Tomasi namukalusia namuboolera , ''Omwami wange khandi Nasaye wange.'' ²⁹ Yeso namuboolera , ''Tomasi , okhuba wakhandola , bulano wakhasubirira ; nabeyikhabi abo abasubiriranga nibarabwene . ³⁰ Khandi bwadieri Yeso yakhola ebilolero biingi imberi wa abeeka baye , ebirandikwa musitabo sino . ³¹ Naye kano kaandikwa , munyole khusubirira mbwe Yeso niye Kiristo , Omwana wa Nasaye ; ne mbwe mukhusubira munyole okhuba nobulamu khubirira mulira liaye .