¹ Pilato namala nabukula Yeso , namukhuya emisarita . ² Abasikari nibasinga ingara ya mabwa , nibara khumurwe kwaye , nibamufwasia ingubo ya nebokha . ³ Nibabola , ayebwe luyali , omwami wa bayaudi ; ne nibamupama chikhofi . ⁴ Pilato khandi nabechakho , nababoolera , lole , murera khweng'we , mumanye mbwe sindola elimaanu muniye . ⁵ Ne Yeso narula , afwalire ingara ya mabwa , nende ingubo yanebokha , ne Pilato nababoolera , lole uno niye omuundu mwene . ⁶ Ngolwa bakukhani bakhongo nende balindi bamuboona , baayula nibaboola , ''Abambwe , abambwe .'' Pilato nababoolera , mumubukule , muchie mumubambe ; arali sindola limaanu muniye . ⁷ Abayaudi nibamukalusia , khuli nelilako , khulondana nende lilako elio akhoyere afwe , okhuba yekhola omwene omwana wa Nasaye . ⁸ Pilato olwayabulira imbosi eyo , yamala naria muno ; ⁹ Khandi naachia munyumba yesikhalako , nareba Yeso , orula ena ? Naye Yeso siyamukalusia . ¹⁰ Pilato namuboolera , solomaloma nange ? , okororwe mbwe ndi nende obunyali bwo khukhubamba , khandi ndi nende obunyala bwo khukhulekhula ? ¹¹ Yeso nakalusia , obula obunyali bwoosi khwesie , arali noberesebwa khurula akulu; khu kario oyo owandera khu ewe ali nende esionono sikhongo . ¹² Okhuchaka awo Pilato yakonyeresia khumulekhula ; naye bayaudi bayokera nibaboola , nolekhula omuundu uno yaachia , sooba oli omwicha wa Kaisari ; yesi owekhola omwene omuruki aba ayingana nende Kaisari . ¹³ Pilato niyakhamala okhubulira imbosi eyo , yarusia Yeso niyekhala musisala siesikhalako abuundu alangwa muluyaudi mbwe , Gabbata. ¹⁴ Biali ebikha bio okhwekhwanisiria Pasika , ambi saa chisasaba ; naboleera abayaudi , lole omwami weng'we . ¹⁵ Naye baandu nibachiririra okhuuba sioka , amalweo , amalweo , abambwe . Pilato nababoleera , mbambe omuruki weng'we ? Abakukhani bakhongo nibaboola , khubula omuruki arali Kaisari . ¹⁶ Namala nabalekhulira abambwe , nibabukula Yeso , nibabwao naye . ¹⁷ Ne nakingire omusalaba kwaye yairwa abuundu alangwa mbwe Abuundu Wesianganga , eyalangwa Muluibrania Goligota; ¹⁸ Ewabamubamba, alala nende abaandu baandi babiri , mulala buli lwande naye Yeso nali akari . ¹⁹ Pilato niyandiika esimanyiro , nara khumusalaba , esibola mbwe YESO WA NASARETI OMURUKI WABAYAUDI. ²⁰ Abayaudi baangi basoma obwandike buno ; okhuba wa Yeso yabambirwa biali ambi nende lidookho ; ne biandikwa muluibrania , luyunani , nende lulatini . ²¹ Abakukhani bakhongo babayaudi nibaboolera Pilato , siwandika mbwe , omuruki wa Bayaudi ; arali mbwe yaboola , Ndi muruki wabayaudi . ²² Pilato nakalusia , akanyandikire malire okhwandika . ²³ Naye abaliindi , nibakhamala khubamba Yeso , babukula echingubo chaye , nibareresia ebimeka bine , buli mulindi simeka alala nende elikoti liaye ; naye elikoti liabula omusono , yalukhwa yosi khurula akulu . ²⁴ Nibabolerana beene khubeene , khurairandula , arali khuyubire ikura , mbwe inaba eyawina ; liulirire liandiko , eliboolwa, bakabane ebiefwalo biange , Ne khulwa obweyango bwange boba chikura . Ebiindu bino abasikari nibamala nibakhola . ²⁵ Nabo beema ambi nende omusalaba kwa yeso ng'ina mwana , nende omukhana wabwe ng'ina , Maria mukhasi wa Kiliopa , nende Maria Magadalena. ²⁶ Yeso niyakhamala khulola ng'ina , naye omweka ulia owayakhera yemere ambi ninaye , yaboolera ng'na ari , mukhasi , lola omusiani wao . ²⁷ Ne naboolera , omweka ari , lola mao , nokhurula ebikha ebio omweka oyo yamubukula namuira mudala liaye . ²⁸ Olunyuma lwakano , Yeso niyakhamanya mbwe makhuwa koosi kekholekhane , amandiko kanyale khulirira , yaboola ari , mbulira buluo . ²⁹ Ne awo khwaliwo nende esikombe sichulemo isiki ; nibara esiponji musiki, nibara khulusala lurambi , nibamura khumunwa . ³⁰ Nibakhamala okhuyira isiki khumunwa kwaye , yaboola ari kabwere , niyenamia omurwe , nakhalaka omwoyo . ³¹ Ne khulwo obera yali indalo yabayaudi yokhwerekekhera , ne khulwokhuba emibiri sikiali kidong'e khumisalaba indalo ya Isabato [okhuba isabato yali indalo ikhulundu] bamwekweda Pilato mbwe babafunake makulu , manu bamale barusibweyo . ³² Abalindi nibeecha nibabafunaka amakulu babiri balia abali nibabambirwe ninaye . ³³ Olwaboola khu Yeso , nibanyoola mbwe amalire okhufwa , sibafunaka makulu kaye khaba . ³⁴ Naye omulala khu balindi owali nende elifumo yamufumira mumbafu mwaye , abweneao amabanga nende amachi nikarula . ³⁵ Naye owalola yali nobuloli , khandi buloli bwaye bwali obwadieri; ne amanyire mbwe aboola obwadieri , mbwe munyale khusubirira . ³⁶ Ebiindu bino biekhoola mbwe eliandiko liulirire , elikumba liaye khasi liakhafunakwe. ³⁷ Khandi liandiko lindi liboola , bakhalingire oyo owabafumira. ³⁸ Lunyuma lwa kano Yosefu wa Arimatia , ouli omweka wa Yeso , oremanyisia khulwo khuuria bayaudi , yareba Pilato mbwe anyole khubukula mubiri kwa Yeso ; ne Pilato namufukirira niyecha , nabukula mubiri kwa Yeso . ³⁹ Khandi Nikodemo yesi yeecha , ulia owechera Yeso musiro , narera amafura nende obubani , ebiyera chiratili imia . ⁴⁰ Nibabukula omubiri kwa Yeso , nibakuboya muchingubo chia obukusi nende obubani , mungira yabayaudi basikhirangamo . ⁴¹ Ne abuundu owabamubambira khwaliwo nende omukunda , ne mumukunda omwo khwalimo nende esirindwa siyakha esio muundu yeesi yali asiasikhwamo . ⁴² Nibamala nibamuramo Yeso omwo khulwo khwerekekhera indalo yabayaudi ; okhuba esirindwa siali ambi awo