¹ Yeso niyakhalomaloma makhuwa kano , yeecha nende abeeka baye niyambukha omwalo kwa Kedroni ewomukunda kwali , niyengiramo , nende abeeka baye . ² Naye Yuda yesi , owamukhoba , yamanya abuundu ao; okhuba buli sikha Yeso yabukanananga ao nende abeeka baye . ³ Lunyuma Yuda , niyakhamala okhunyola omukanda kwabaandu nende abasikari khurula abakukhani bakhongo nende Bafarisayo , beecha nende chitara nende echitochi nende biraniro . ⁴ Naye Yeso , khulwo khuba amanyire biosi ebiicha khumwekholekhanakho , yeecha imberi , nababoolera , mukonyanga wina? ⁵ Nibamukalusia , Yeso wanasareti ; Yeso nababoolera , nesie . Ne Yuda yesi , owamukhoba , yali yemere alala ninabo . ⁶ Ne lwangu sa ngayababoolera ari nisie , bakalukhira inyuma , nibakwa asi . ⁷ Nabareba khandi , mukonyanga wina? Nibaboola , Yeso wa Nasareti . ⁸ Yeso nakalusia , baboleere mbwe nesie ; nikaba mbwe mukonyanga esie, lekhule bano babwewo; ⁹ Mbwe likhuwa liayabola , liulirire , mbwe abawamba boosi abulao owandakosia . ¹⁰ Lunyuma Simon Petero naali noluganga nalukhwesa narema omukholi womukukhani mukhongo , nakhenga okhurwi khwaye khusacha , omukholi oyo yalangwa Maliko. ¹¹ Yeso naboolera Petero , kalusia oluganga lwao musifuko ; Esikombe sia Baba yamberesie , sikhoya ng'we ? ¹² Bulano abasikari nende omukhongo wabwe nende bakhongo Babayaudi nibadira Yeso , nibamuboya , ¹³ Nibabwao naye nibarangirira khumuira ewa Anasi ; khuba yali omukhwe wa Kayafa , owali mukukhani mukhongo omwaka okwo . ¹⁴ Naye Kayafa oyo, niye ulia owali yaberesia Bayaudi likerako ari , bikhoyere omuundu mulala khufwira baandi . ¹⁵ Ne Simoni Petero nalonda Yeso , nende omweka undi ; omweka oyo yali amanyikhane khu mukukhani mukhongo , niyengira nende Yeso musimenyo sia omukukhani mukhongo . ¹⁶ Naye Petero niyema erwanyi womuliango . Omweka undi oyo narula erwanyi , nalomaloma nende omulindi womuliango , niyengisia Petero mukari . ¹⁷ Omukhana mulindi womuliango namuboolera Petero, wesi soli mulala khubeka bomundu uno? Naboola , sindi khaba . ¹⁸ Ne abakhalabani nende abakhongo baabu bali bemere ao , ewabali bambisie omuliro kwamanda; niboranga okhuba imboo yalikho , ne khandi Petero yesi yemere ninabo yebalakasingia . ¹⁹ Omukukhani mukhongo yamala yareba Yeso khulondana nende abeeka baye , nende amekesio Kaye . ²⁰ Yeso nakalusia , ndalomaloma ebulafu imberi wesialo ; ndekesia musinagogi , nende mukhekalu , ewabayaudi boosi babukanananga ; ne libulao eliandaboola bwekisi . ²¹ Mundeba mbwesina ? Murebe abambulira , ebiandababoolera ; bamanyire ebiandababoolera . ²² Ne niyakhamala khulomaloma , omulala khu barumwa owali yemere ambi ninaye yamukhuya olukhofi , naboola , okalusia orio mukukhani mukhongo ? ²³ Yeso namukalusia , nimboolere ebibi mubole : nikarali kario , esikera wakhuya nisi? ²⁴ Naye Anasi yamuruma , ewamukukhani mukhongo naboyerwe . ²⁵ Naye Simoni Petero yemao niyebalakasianga , nibamuboolera , ewe wesi soli mulala khu beeka baye? Yakana , naboola , sindi mulala khunibo . ²⁶ Omulala khubarumwa bomukukhani mukhongo , nali omwikho wa ulia owa Petero yakhenga khurwi , naboola , sikhubwene wesi noli ninaye mumukunda ? ²⁷ Petero nakana khandi ; awo nawo idaywa nikholiokha . ²⁸ Nibarusia Yeso ewa kayafwa nibamuira munyumba yesikhalako ; ne biali ichuli ; naye abene sibengira munyumba yesikhalako , barola beswasia ; khuba benya balie Pasika . ²⁹ Pilato nachia erwanyi ewabali , naboola , muli nende likhuwa sina limaanu khumundu uno? ³⁰ Bamukalusia nibamuboolera , mbwe sinomukholi wamabi , sikhwakhamurerere khu ewe . ³¹ Bulano Pilato nababoolera ,mumubukule mumuire mumukhalakire okhulondana nende lilako lieng'we . Abayaudi nibamuboolera , sikhufukirirwa nelilako okhwira omuundu ; ³² Mbwe liulirire , elia Yeso yaboola okhumanyisia elifwa lia akhoyeere afwe . ³³ Pilato niyengira munyumba yesikhalako khandi , nalanga Yeso , namureba , newe omwami wa Bayaudi? ³⁴ Yeso nakalusia , kano oboola khulwao mwene , kose bakhuboolere khulondana ninasie ? ³⁵ Pilato namukalusia esie ndi muyaudi ? Esialo siao nende abakukhani bakhongo nibo bakhundererekho ; wakhola sina ? ³⁶ Yeso nakalusia , obwami bwange sinobwesialo sino ; obwami bwange buba obwesialo sino , abarumwa bange bakhalwanire , mbwe khaye khuberesanwa khu Bayaudi ; kho obwami bwange sino obwano . ³⁷ Pilato namuboolera , kario oli omwami? Yeso nakalusia, newe oboola mbwe ndi omwami . Ndebulwa khulwa kano , ne khulwa mulimo kuno ndeecha musialo , mbwe ndusie obuloli khubwadieri . Oyo yesi owabwadieri abuliranga imbosi yange . ³⁸ Pilato namuboolera, owadieri obwadieri nisio sina ? Niyakhamala khubola kano , yarula khandi erwanyi nachira Bayaudi , nababoolera , simbona muniye elikhuwa liosi limaanu . ³⁹ Elilako lieng'u libola mbwe , balekhulire omuundu mulala mupasika ; mufukirira bulano balekhulire omwami wa Bayaudi ? ⁴⁰ Nibaayula bosi khandi , nibaboola , uno khaba , arali Baraba . Naye Baraba yali omwibi .