¹ Ebiindu bino baboleera , murola mwesinyikha . ² Banabarusia muchisinagogi : Ebikha bichaanga mbwe yesi yesi, obeera achia khupara mbwe akholera Nasaye emirimo . ³ Naye ebiindu bino banabakholera okhuba bakororwe Baba , khandi siesi bangorerwe . ⁴ Naye ebiindu bino babolere mbwe ebikha nibiula , mwichulisie mbwe sindababolera khulondana nabio , ne bino sindababolera khurula mukhuchaka , okhuba ndali ninang'we . ⁵ Bulano mbwao njia ewa ulia owanduma , naye abulao khweng'we oundeba , ari ochiaye? ⁶ Ne khulwa khuba ebabolere ebindu bino , emioyo kieng'we kichulemo esibera . ⁷ Kata kario mbabolere obwadieri : Nebiobukhonyi khweng'we mbwe mbweo : okhuba nindarabwao , omukhonyereri sanabechera , naye nimbwao , ndamuruma yeeche khweng'we. ⁸ Ne niyecha anamanyisia esialo esiobwononi , nende esiobwadieri , nende esiobukhalaki . ⁹ Esiobwononi , okhuba sibamusubiriramo : ¹⁰ Esiobulungikhu , okhuba njia ewa Baba , ne simwakhambone khandi : ¹¹ Esiobukhalaki , okhuba omuruki wesialo sino bukhalakirwe . ¹² Ndi nende ebiindu biingi ebiasiri khubabolera , arali ebikha bino simunyala khubiesimirisia . ¹³ Ne kario ye , Roho wobwadieri niyeecha , anabakhonya mubwadieri bwosi: okhuba sanaboola khulondana ninaye mwene : arali liosi elianabulira , nilio elianalomaloma : ne anabamanyia akecha imberi . ¹⁴ Anamberesia oluyali : okhuba ananyola khurula khwesie , nabekesia . ¹⁵ Biosi ebia Baba alininabio nebiange : kho kario ndabola , mbwe anabuukula khubiange na abeekesia. ¹⁶ Mubikha bididi , simuchia khumbona : khandi, mubikha bididi , munambona , okhuba njia ewa Baba . ¹⁷ Naye balala khubeeka baye nibarebana , Sina sino esiali khuruboolera , mbwe ebikha bididi simunambona : khandi , mubikha bididi , munambona : okhuba njia ewa Baba ? ¹⁸ Kario , nisina sino esia abolanga, ebikha bididi ? khasikhunyala khuboola esiabolanga . ¹⁹ Ne bulano Yeso namanya mbwe bekomba khumureba , nababolera , muli khurebananga esiambolere , ebikha bididi , simucha khumbona : khandi , ebikha bididi , nimumbona? ²⁰ bwadieri bwadieri, baboolera , mbwe munalira , nimwekanyirisia , nasio sialo silisangala ; ne munaberera , naye okhuberera khweng'we khuchia khwekalukhania khube isangalo . ²¹ Omukhasi nalumwa aberereranga , okhuba ebikha biaye biakhola; naye olwa amala khwekhonya omwana , siyechulisianga khandi obuchuni, khulwe isangalo mbwe omuondu yebulwe musialo . ²² Naye eng'we bulano muli nokhuberera ; Ne ndabalola khandi , ne mwoyo kweng'we kunasangala , naye isangalo yeng'we omuundu siyakhabarusiakho . ²³ Indalo eyo sibulao esiamwakhandebe , bwadieri bwadieri , baboolera , siosi siosi esiamureba Baba mulira liange , anababeresia . ²⁴ Okhuula ebikha bino musiiri khurebakho liosi mulira liange ; Reebe , ne munanyola , mbwe isangalo yeng'we yulirire . ²⁵ Ebindu bino mbabolere muchingado ; naye ebikha bichanga , sindakhalomelome ninang'we khandi muchingado , arali ndakhabamanyie mubwakhakhu akalondana nende Baba . ²⁶ Inyanga eyo mwakhasabe mulira liange ; Ne sibaboolera mbwe ndilisaba Baba khulwa eng'we; ²⁷ Okhuba Baba mwene yabakhera , okhuba mwakhera , khandi mwasubirira mbwe ndarula ewa Nasaye . ²⁸ Ndarula khu Baba , ne ndeecha musialo ; khandi , ndula musialo , nifunya khu Baba . ²⁹ Abeeka baye nibamubolera , awo bulano olomaloma mubwakhakhu , ne sobola chingado . ³⁰ Bulano khusubirira mbwe omanyire makhuwa koosi , ne sikenyekhana omuundu yesi khukhureba ; Khulwa kano khusubirira mbwe orula ewa Nasaye . ³¹ Yeso nabareba , bulano musubirira ? ³² Lola , ebikha bicha , eeh , bulano biolere , mbwe munasalanisibwa , buli muundu khulwaye . Ne munandekha sieng'ene ; naye sindi sieng'ene , okhuba Baba ali ninasie . ³³ Ebindu bino nomanome ninang'we , mbwe mwesie mube nomulembe , musialo munaba nobunyakhani ; arali mweberesie omwoyo ; okhuba ndakhira esialo .