¹ Nesie omusabibu kwadieri , naye Baba niye omulimi . ² Elisaga liosi mwisie elirama ebiamo abanjulanga : naye buli lisaga eliama ebiamo alibanjuliranga mbwe limede okhwama lukali . ³ Bulano muli balafu okhubirira mulikhuwa eliababoolere . ⁴ Mwikhale mwisie , nange mweng'we , ngolwa elisaga liranyala okhwama ebiamo liene , arali nilikhala mumusabibu : simunyala khaba , arali nimwikhale mwesie. ⁵ Nesie omusabibu, nang'we muli masaga : oyo owikhala mwesie , nasie muniye , oyo yama ebiamo biingi : okhuba sibulao esiamunyala nimurali nasie . ⁶ Omundu narekhala mwesie , asukunwanga ngelisaga , niyoma , nabaandu balibusia , nibalisukuna mumuliro , nilisambwa. ⁷ Nimwikhala mwesie , namakhuwa kange kekhala mweng'we , munasaba esiamwenya sioosi , nimukholerwa. ⁸ Abwene awo Baba wange aberesibwa luyali, nimwamire ebiamo biingi : eliene elio linekesia mbwe muli abeeka baange . ⁹ Ngolwa Baba yakhera , nilwo nga siesi bakherere : Muchiririre mubukheri bwange . ¹⁰ Nimulinda malako kange , munekhala mubukheri bwange : ngolwa ndalinda amalako kababa ,nende khwikhala mubukheri bwaye . ¹¹ Ebiindu bino baboolere , mbwe isangalo yange idong'e mweng'we , khandi mbwe isangalo yeng'we ichule . ¹² Lino nelilako liange mbwe mukherane , ngolwa ndabakhera . ¹³ Aumao omuundu oli nobukheri obukhongo obukhira buno , mbwe omuundu ara obulamu bwaye asi khulwa beecha baye . ¹⁴ Muli abeecha bange , nimukhola koosi akababoolera . ¹⁵ Okhuchakira ano sibalanga abarumwa : okhuba omurumwa samanyanga akomukhongo waye akhola : arali balangire abeecha : okhuba ebiindu bioosi ebiambulira khu Baba mbekesianga. ¹⁶ Sineng'we mwandoboola , arali nesie owabaloboola , khubakhire mafura , mbwe muchie mwame ebiamo , ne mbwe ebiamo bieng'we bimenye : mbwe esia mureba Baba mulira liange , ababeresie . ¹⁷ kario balagira , mbwe mukherane . ¹⁸ Nikali mbwe sialo sibasiula , mumanye mbwe siasiula imberi nisiiri obasiula . ¹⁹ Kaba mbwe mwali abesialo , esialo siakhakherere abasio : Nokhuba simuli besialo , ne ndabaloboola khuruula musialo , kario esialo siabasiula . ²⁰ Ichulisie elikhuwa lia ndababoolera , omurumwa sakhira omukhongo waye : nikali mbwe basandia mwesi bachia okhubasandia: nibalinda elikhuwa liange , mwesi banalinda elieng'we liosi . ²¹ Arali Kano koosi banabakholera okhubera elira liange , okhuba sibamanyire owanduma . ²² Kaba mbwe sindecha ndalomaloma nabo , sibakhabere hence imbi : ne bulano babula esifunikha imbi yabwe . ²³ Ousiula yasiula Baba yesi . ²⁴ Kaba mbwe sindakholere munibo emirimo kio omuundu undi asiiri okhukholakho , sibakhabere nende imbi :arali bulano barubwene nibarusuula alala nende Baba wange . ²⁵ Ne kano keecha okhwekhola mbwe likhuwa liandikwa mulilako liabwe liulirire , baasiula arali sifune . ²⁶ Naye omulemesi niyeecha , owa ndakhabarumire khurula khu Baba , Roho owa bwadieri , urula khu Baba , anarusia buloli bwange . ²⁷ Ne mwesi munarusia buloli , okhuba mwakhaba ninasie khurula mukhuchaka .