¹ Emioyo kieng'we kiranyakhana : musubire mu Nasaye , musubiriremo siesi . ² Munyumba ya Baba khulimo nobwikhalo buungi : karakhabere kario , ndakhababoolere . Njia okhubareresiria abuundu . ³ Ne ninjia ndabareresiria abaandu , ndakalukha khandi , babukule : mbwe amba nindi , mwesi mubeo . ⁴ Naye owanjia mumanyire , khandi ingira muimanyire . ⁵ Tomasi namuboolera , Omwami , khukororwe owochia : khwakhamanya khurie ingira ? ⁶ Yeso namuboolera , esie nisie ingira , obwadieri , nende obulamu : abulao owakheche ewa Baba , arali khubirira khwisie . ⁷ Muba mumanyire , mwakhamanyire Baba yesi : ne okhuchaka bulano mumumanyire , khandi mumubwene . ⁸ Filipo namuboolera , Omwami , rwekesie Baba , esio sinaruyera . ⁹ Yeso namuboolera , ndakhaba ninang'we ebikha birambi , niungorerwe , Filipo? Ombwene abwene Baba : ne wakhabola orie , mbwe rwekesie Baba ? ¹⁰ Simusubirira mbwe ndi mubaba , ne Baba ali mwisie? Amakhuwa kababoolera sinikange : arali Baba oumenyeremo , niye okhola emirimo . ¹¹ Musubirire mbwe ndi mubaba , naye Baba ali mwisie : arali awo musubirire khubikhole . ¹² Obwadieri ,obwadieri , ebaboolera ousubiriramo emirimo kiakhola yesi anakhola , khandi khukhirakho , khulwo khuba njia ewa Baba . ¹³ Naye liosi elia muchia okhusaba mulira liange , ndalikhola , mbwe Baba aberesibwe luyali mu mwana . ¹⁴ Nikali mbwe musaba sioosi mulira liange , ndakhola . ¹⁵ Nimwakhera mulinde amalako kange . ¹⁶ Ne ndasaba Baba , ababeresie omukhonyereri undi , mbwe abechenge ninang'we bulilwosi. ¹⁷ Oyo Roho wo bwadieri wesialo siranyala siamanyirisia , okhuba sisimulola khaba , kata khumumanya : naye eng'we mumumanyire : okhuba amenyanga mwing'we khandi anaba mweng'we . ¹⁸ Sindabalekha nimubula omukhonyi : Ndeecha owamuli . ¹⁹ Bisiri ebikha bididi , Ne esialo sisinandolola khandi : naye eng'we munandola okhuba menyere , mwesi munamenya . ²⁰ Inyanga eyo mwakhamanye mbwe ndi mubaba , nang'we mwesie , nasie mweng'we . ²¹ Ouli nende amalako kange , ne khandi akalindanga, oyo niye owakhera: ne oyo oukhera anakherwa nende Baba wange , ne ndamukhera nende okhweyekesia khuniye . ²² Yuda ( ourali Iskarioti ) namuboolera , Omwami , kakhaba karie mbwe wakhelolesie khwefwe , ne siwakhelolesie khusialo? ²³ Yeso namukalusia namuboolera , omuundu niyakhera , analinda amakhuwa kange : ne Baba anamukhera , ne khunecha muniye , nikhumenya ninaye . ²⁴ Ourakhera sabikhanga amalako kange : naye likhuwa eliamubulira sineliange khaba , arali niliababa owanduma . ²⁵ Kano baboolere , nisiiri ninang'we . ²⁶ Naye omukhonyi, ouli Roho Mulafu , owa Baba anaruma mulira liaye , anabekesia biindu bioosi , nende okhubechulisia ebiindu biosi , bioosi ebiandababoolera . ²⁷ Omulembe mbalekhera , omulembe kwange baberesia : Simbaberesia ngolwesialo siberesanianga . Emioyo kieng'we kiranyakhana , kose kiraria. ²⁸ Mwabulira ngolwa ndababoolera , mbwe mbwao , khandi ndabakalukhira , muba mwakhera mwakhasangalire , khuba ndaboola , njia ewababa : okhuba Baba nomukhongo khuukhira . ²⁹ Ne bulano baboolere nikasiekholekha , mbwe nikekholekha munyale khusuubirira ³⁰ Lunyuma lwano sindaboola maangi ninang'we : okhuba omuruki wesialo sino yeecha , ne siali nasie elikhuwa liosi . ³¹ Arali mbwe sialo sinyole khumanya mbwe ndakheera Baba : ne ngolwa Baba yamberesia malako , siesi mbaberesia , bukhe khubweo.