¹ Bulanu nga babisiao mbwe khuchie Italia khubirire mumachi, baara Paulo nende ababoye bandi asi wa omundu we lira liaye liali mbu Yulio omukhongo wa simeka sia basikari ba Augusto. ² nikhwakhanina mu meli ya Adramito, khwachaka lukendo, nikhuchomere okhuchia mumadokho kali khundulo khwa Asia; Aristariko mundu wa Makedonia ya Thesalonike, yesi yali nafwe. ³ Inyaanga yalondakho khwola Sidon, Yulio namwingisia Paulo ebilayi, mani namuberesia obulekhule khuchia ewa beecha baye anyoole okhusangasia. ⁴ Nga khwacha olukeendo okhurula ao, khwachia khubirira emwalo wa Kipro khubeera emiyaka kiauchaanga mbwe kirukalusie owakhurula. ⁵ Nikhwamala okhwambukha injaanja ya Kilikia nende Pamfilia khwola Mira elidokho lia Likia. ⁶ Abwene ao omukhongo wa simeka sia basikari yanyoola imeli ya Iskanderia eyali ichia Italia; yamala nargengamwo ⁷ Nikhwakherukha kaala chinyaanga chinyiingi, khwanyoola ebiidi bingi khula kori khwola Nido, khubeera omuyaka kwarwikaliranga khubira, khwakhengao khubirira emwalo wa Krete, nikhulingalana nende Salmone. ⁸ Khwabira ao khubirira mubudinyi bungi, nikhwola abuundu wa balaanga mbwe esikobera esilayi; ambi nende ao khuli nende elidokho lilangwa mbwe Lasea. ⁹ Bulano ebikha bingi biecha biabwa mani olukeendo niluba oludinyu khubeera bikha bia okhusiiba biali bimalire okhubira, Paulo nabalabula. Nababolera abaami, ndola mbwe ¹⁰ lukeendo luno luchia khuba olwa bidinyu, nende okhukosia khungi, sikali mbwe khu mikuku kiefwe nende imeli khaba, arali nende obulamu bwefwe. ¹¹ kata kario omukhoongo wa simeka sia basikari yabulira mumakhwa ka omwirusi we imeli nende omwene imeli okhukhira makhuwa ka Paulo yaboola. ¹² Bulano khulwa khubeera esikobero khasi siali silayi abaandu okhumenyamo chinyaanga chia imboo, abaandu bali khulukeendo babola mbwe badiire sa lukeendo barula ao mbwe banyoole okhula Foinike, mani bekhale eyo ebikha bia imboo , ao niwo esikobero sia Krete eyiri emwalo wa lubeka lwo mukhono mukaada nende mukulu wa lubeka lwa omukhono musaacha. ¹³ Bulano omuyaka kwa emwalo kwauchaanga kaala, nibapaara bamalire okhunyoola esiabali nende elichoomo okhunyoola bachaka lukeendo nibachia ambi nende Krete. ¹⁴ Ebikha bidiidi nibiakhabwa omuyaka omukhongo okwa maani kwaucha, okulangwa mbwe Eurakilo. ¹⁵ Bulanu nga imeli yadiirwa, niikhaya okhukeenda mumuyaka, khwalekhana nayo yeyirusie . ¹⁶ Nga khwali nikhubira khusisinga sindi silangwa mbwe Kauda khwali nende emirimo mingi okhwiicha nende eliaro. ¹⁷ Nga bali nibakhamala okhwingiramo, beyambania nende abakhonyi, nibaboya imeli nende mikoye okhubirira asi wayo; nibali bari mbwe banyala bebira boola asi khumusenye, bamala nibabukula amaro, nibabafuka. ¹⁸ Nekhulwo khubera khwali khusindikhwa muno nende amafwinda, inyanga yalondakho bachaaka okhutupa mikuku mumachi mbwe imeli inyole okhwanguya. ¹⁹ Inyanga yakhadaru khwachaaka okhutupa ebindu bia imeli khumakhono kefwe. ²⁰ Bulanu nga olwa eliuba kose ching'ining'ini chakhaya khubao echinyanga chinyingi, khandi kata busubiri budiidi khasi bwarulimo khweecha khwakhaya khuba nende elinaya liosi mbwe khunyala okhuwona. ²¹ Arali lunyuma lwa okhumenya muburambi nibaralia Paulo yema akari wabwe, namala naboola ari, abaami mwakhabere mbwe mwambulira mani mwakhaya okhurula Krete khasi mwakhanyolere bidinyu bino nende khukosia emiandu kino. ²² Bulanu mbakeraka mbwe mweberesie omwoyo; khubeera khasi khuchia okhubakho nende elifwa lia omuundu yesiyesi khaba akari weng'we arali imeli yong'ene. ²³ Khubeera musiro malaika wa Nasaye yemere ambi nange, owa esie ndi omuundu waye, khandi owakholeranga. ²⁴ amboleere, ari Paulo, okhoyere oyirwe imberi wa Kaisari arali lola Nasaye akhuberesie abaandu boosi abali khuchia olukendo nende ewe. ²⁵ Khulwa ako, abaami mweberesie omwoyo, khubeera subira Nasaye mbwe bichia okhuba nga olwa mboleere. ²⁶ Bulanu biri sa mbwe khuula khunarebwa musisinga nabulebe ²⁷ Nga esiro sia ekhumi nende khane siola, nga olwa khwali nikhusindikhwa asi nende akulu munyanja ya Adria, nibiakhoola ebikha bia akari wesiro abakholi ba imeli bapaara mbwe bali ambi okhuula khulukongo. ²⁸ Nibachia okhukera obwoloberefu bwa inyanja sikero sia mukhumi kabiri; khandi nga olwabasidakho imberi budiidi, nibakera, nibanyola sikero sia ekhumi nende chirano. ²⁹ Bulanu beecha baria mbwe binyala imeli yekuda khumakina. Beecha nibalekhula chinanga chine okhurula owa chingiranga mbwe chemesie imeli, mani nibamala nibalama mbwe sialo bukhie. ³⁰ Nga olwa bakholi be imeli bali ambi okhwirukha khurula mumeli, nga olwa bali nibakhekhia asi eliaro munyanja, nibekaadia mbwe bali khuchia okhura chinanga chia okhwemesia imeli. ³¹ Paulo yaboolera omukhongo wesimeka sia abamayie nende abasikari mbwe abaandu bano nibaradong'a nibalindire imeli khasi munyala okhuwona. ³² Lunyuma abasikali bakhenga emikoye ekie liaro nibalilekha likwe. ³³ Nga sialo siakhia, Paulo yekweeda baandu boosi mbwe balie, naboola ari inyanga ino niyo eya ekhumi nende khane eya mubere nimuchiririranga okhusaba musiri okhuliakho sindu dawe. ³⁴ Khulwako basaba mulie; khubera lino ni khulwa obulamu bweng'we; buli sia mulala khu eng'we abulao ochia okhukosia lifwiri kata elala liong'ene. ³⁵ Bulanu nga yali niyakhalomaloma ario, yabukula omugaati namala yebasia Nasaye imberi wabwe boosi; niyakhamala okhudonyola, yachaaka okhulia. ³⁶ Lunyuma boosi beberesia omwoyo, mani nibachaaka okhulia. ³⁷ Abandu bali mukari mumeli khwali echimia chibiri nende makhumi saba nende basasaba. ³⁸ Nga bulanu bali nibakhalia nibakhekura baduduyia obusiro bwa imeli, nibasukuna ingano munyanja. ³⁹ Esialo nga olwa bwakhia, khasi banyalirwa okhumanya esialo sia baliimo, arali beecha baloola akhasiinga kha inyanja akhali nende musenye khulukongo lwayo, owabapaara mbwe, nibinyalikhana bachie bemesie imeli ao. ⁴⁰ Ngolwa balekhuula chinanga mumachi, nibachilekha munyanja alala budiidi mbwe niyakhadiira miyaka, banachiira esikobero sila. ⁴¹ Arali boola abundu wa chinyanja chibiri chambanira, berusia imeli nichia niyekhuya khumakina asi weinyanja; mani imberi wayo niyanda, nidong'a niredengeya ne inyuma wayo yafunikha okhubeera amaani ka mafwinda. ⁴² Abasikari boola khubisiao mbwe beere ababoye mbwe baranyala okhusoga kata mulala khu nibo mani beyibe baone. ⁴³ Arali omukhongo wesimeka esia basikari, yadakha okhuwonia Paulo yabakaira okhola lienya liabwe elio, namala nalagira mbwe balia abanyala okhusoga barangirire besukune munyanja, mani bachie khulukongo. ⁴⁴ Ne abadong'a abandi bali khuchimbao, abandi khubitundu bia imeli yali ifunikhefunikhe bulanu bia maliirikha mbwe boosi boola khulukongo nibali abalamu.