¹ Agripa yamala naboolera Paulo, oli mulekhuule oboola amakhuwa kao, paulo yalekhula omukhono kwaye tiiri nachaka okhweyosia khurula mumusango. ² Ndebulira ndi omusangafu, omuruki Agripa khubeera njia okhweyosia mumusango kuno imberi wao inyanga ino nindira khu makhuwa koosi aka Bayaudi banderekho omusango. ³ Lukali muno khumanyire nga omukesi wa milukha kiosi nende amarebo akali mubayaudi, khulwa khubera ako khuusaba ombulire mubwedemberefu. ⁴ Khubeera ingeri ya obulamu bwange bwosi khurula nindi omuraaga, mukhurangirira khu baandu bange ba musialo siange Yerusalemu, Abayaudi boosi babumanyire. ⁵ Abamanya khurula mukhuchaka, nibebulira okhurusia obuloli, mbwe ndali omufarisayo, mungeri ya khukonya nende okhulonda emikanda kia idini yefwe ekiali kiadieri. ⁶ Bulanu nyema ano khalakirwe khubeera elinaya lia elakano lia baba befwe baberesibwa nende Nasaye. ⁷ Elia echimbia chefwe ekhumi nende chibiri, berekekhe khulira nibamukholera Nasaye mukhwedinya musiro nende musidere. Bulanu Abayaudi banderekho omusango khulwa linaya elio, omuruki Agripa. ⁸ Khulwa sina liakhabukulwa okhuba elikhuwa libulamo maani, nende eng'we, mbwe Nasaye alamusianga abafu?" ⁹ Obwadieri ndapara omwene, biali bikhoyera okhukhola ebindu bingi ebiyingana nende, elira lia Yeso wa Nazareti. ¹⁰ Kata aka ndakhola Yerusalemu, ndaboya abatakatifu bangi nibekalira mumboyero, nga ndalichingi ninyolere omunwa okhurula khu bakukhani bakhongo khandi nga olwa balichingi niberwa, siesi ndaba khalakiranga endio. ¹¹ Khandi ndabasandianga buli muchisinagogi, nibayika okhunyeka Nasaye, khandi ndabechanga mulukali nga omulalu khunibo, ndabasandia kata nibali mu madokho ka ebialo bia erwanyi. ¹² Bulanu nga ndacha Damaski nindumirwe, khandi nindi nende omunwa khurula khu bakukhani bakhongo; ¹³ Mubikha bia esidere omwami, ndalola nindi khu ingira obulafu okhurula mwikulu obukhira obulafu bwa eliuba, nibumenamena khandi nibumbodokhana nende aba ndali nabo khulukendo. ¹⁴ Bulanu nga khwali fwesi nikhukwire asi khuloba, nda ulira idoboosi nimbolera mululimi lwebrania Sauli Sauli khulwa sina usandia? nibidinyu khu ewe khuracha olwanda. ¹⁵ Nange ndaboola endi, ewe newe wina omwami? Naye yabola ari, esie nesie Yeso owa osandianga. ¹⁶ Bulanu bukha weme nende amakulu kao; khubera ndakhulorekhera khulwa lichomo lino, okhukhola obe omukholi nende omloleri wabindi bino ebiwakhalola, nende ebindu bilia ebia ndelolesia khu ewe. ¹⁷ Ndakhununula khurula mubaandu bao nende mu banasialo, aba ndi bulanu okhurumamo. ¹⁸ Mbwe obekuleo chimoni chiabwe khandi nende okhubakalukhania okhurula musirima, mani bachie mubulafu, nende khurula mumani ke sikhieno khuchia mumani ka Nasaye, mbwe banyale okhunyola esilekhero sia chimbi, nende ebilame akarikari wa bala abosibwa nende obusubiri obuli mu esie. ¹⁹ Khulwa ako omuruki Agripa, khasi ndalikho mukhayi wa malolo ko mwikulu; ²⁰ Arali imberi ndekesia balia aba Damaski nende ela Yerusalemu, nende Yudea yoosi, nimalilikhira khu Banasialo, mbwe banyole okhwekanira manu bamukalukhira Nasaye, manu bakhole amakhuwa kafwanana nende okhwekanira. ²¹ Khulwa kene kano Abayaudi bandira nindi mukanisa nibenya mbwe banjire. ²² Nga ndanyola bulanu bukhonyi bwa Nasaye, sirini njiririranga khula inyanga ino, nindusiria obuloli khu boosi abadiidi nende abakhongo nindarabolakho amakhuwa kandi arali aka musa nende abanabii baboola mbwe kakheche. Mbwe Kiristo akhoyera asandisibwe, mbwe khandi niye wakhabe owamberi okhubukha khurula mubafu ²⁴ Nga olwa yali nachiririraga okhweyosia mumusango, Festo yaboola mudoboosi ya akulu, Paulo oli rwanyi wa maparo kao, okhusoma khwao khungi khukera oli okhulalukha. ²⁵ Naye yaboola khasi ndi omulalu, Festo owa luyali lukhongo; arali ndi okhulomaloma amakhuwa ako obwadieri nende aka ngali. ²⁶ Khubeera omuruki amanyire amakhuwa kano owa ndi imberi waye nomanoma nende obulekhule; khubeera ndebulira mbwe sibulao mumakhuwa kano sidakha sikhaye khumanyikhana ninaye; khubeera sindu sino khasi siekholekhana mukhwekisi. ²⁷ Omuruki Agripa osubira mubanabii? manyire mbu osubira. ²⁸ Lunyuma Agripa yaboolera Paulo, ambi ano oli khungalukhania khuba mukiristo?. ²⁹ Paulo naye yamala naboola, fukirira endio mu Nasaye mbwe khasi newe sa weng'ane, arali balia bosi abambulira inyanga ino, boosi babe ambi khandi mubiosi babe kori ngandi, arali baraaba mubiboye bino. ³⁰ Bulanu olwa yali yakhamala okhulomaloma, omuruki yasingira, nende omukhongo wa simeka sia buruki obwo, nende Bernike, nende bosi bali bekhale ambi nabo. ³¹ Bamala nibasuda elubeka, nibachia okhulomaloma bene khubene, nibaboola, omundu uno khasi ali okholanga sindu siyera lifwa kose okhuboywa minyororo. ³² Lunyuma Agripa yaboolera Festo, omundu uno yakhabere yalekhulwa, nikali mbwe khasi yaliyasaba omusango kwaye kusude akulu khu Kaisari.