¹ Bulanu kori Festo yecha musimeka sia oburuki obwa chinyanga chidaru nichakhabwa, yanina khurula Kaisaria khucha Yerusalemu. ² Omukukhani mukhongo nende omukhongo wa Bayaudi bamuboolera amabi okhulondana nende Paulo, khandi nibamwekweda. ³ afukirire , mbwe barere Paulo Yerusalemu, okhubeera bali barekekhe okhumukhoba bamwiire khungira nasiri okhuula Yerusalemu. ⁴ Festo naye yabakalusia ari, Paulo akhoyere okhubikhwa Kaisaria khandi Festo mwene achia khuchiayo ambi ao. ⁵ Bulanu yaboola ari, lekha balia akari weng'we abanyalirwa, bachie nafwe baboole obubi bwa omundu uno, nikali alikho nende obudekhere bwosi bwosi. ⁶ Niyakhamala okhuba nabo khulwa chinyanga ekhumi, yeekha nachia Kaisaria inyanga yalondakho, niyekhala mu sisala sia obukhalaki nalagira mbwe Paulo areerwe. ⁷ Nga Paulo yeecha, abayaudi beecha okhurula asi Yerusalemu, bema ambi naye nibaboola amakhuwa mabi khu Paulo, akabaranyala okhurusia nobwadieri bwako. ⁸ Paulo yakalusia nineyosia mumusango ari, mumalako ka Bayaudi, kose khulikanisa, kata khu Kaisari, sindakoserakho sindu siosi siosi khaba. ⁹ Naye Festo khubera yali adakha okhusangasia Bayaudi, yakalusia Paulo, naboola ari odakha okhuchia Yerusalemu, ebwene eyo bakhukhalakireyo omusango khulondana nende amakhuwa kano, imberi wange?" ¹⁰ Lunyuma Paulo yakalusia ari, nyemere imberi wa sisala sia bukhalaki sia Kaisari, owakhoyera okhalakirwa; khubayaudi, siiri okhola imbi yosi, kori olwa wesi omanyire ebilayi muno. ¹¹ Khubeera nikali mbwe ndi omubi, kose kholere esindu sibi esiyera lifwa, fukiriire okhufwa;arali nikali mbwe libulao mumakhuwa kano akabanderekho omusango, abulao omundu onyala khundekhula mumakhono kabwe sudia omusango kuno mubukhalaki bwa akulu khu Kaisari. ¹² Lunyuma Festo niyakhalomaloma nende olukhiikho lwa bakofu yakalusia ari, wakhasaba khusudia omusango kuno khu Kaisari? bulanu ochia khucha owa Kaisari. ¹³ Ne lunyuma lwechinyanga lebe nichakhabwa omuruki Agripa nende Bernike bachia Kaisaria okhukhesia Festo. ¹⁴ Bulanu nibakhamenyayo chinyanga chinyingi, Festo yaboolera omuruki Agripa amakhuwa ka Paulo nababoolera ari, khuli nende omundu undi owalekhwa mumboyero nende Filikisi. ¹⁵ Owa kori, ndali Yerusalemu, abakukhani bakhongo nende abakofu ba Bayaudi bambolera, nibadakha mbwe akhalakirwe musango. ¹⁶ Nange ndababoolera mbwe khasi no mulukha kwa Baroma okhukhalakira omundu yesi yesi okhufwa dawe, nikasiri okhuba kario, omuundu oyo alikho omusango abukanananga nende abamurakho omusango chimon khu chimoni, naberesibwa ibarua imufukirira okhweyosia khurula mu imbi ya omusango kwabamurakho. ¹⁷ Nga babukanana, sindakhinda dawe,inyanga yalondakho eya muchuli ndekhala khusisala siobukhalaki, ndamala nindakirisia mbwe omuundu oyo arerwe imberi wange. ¹⁸ Abamurakho musango nga bema, khasi barerakho elikhuwa liosi libi nga olwa ndali mbarire. ¹⁹ Arali bali nende amarebo khulondana nende idini yabwe bene, khandi nende Yeso omulala owafwa, naye owa Paulo yayaalanga mbwe no mulamu. ²⁰ Bulanu khubera ndali nende okhwereba khurulana nende ingeri ya marebo kabwe, ndareba Paulo nikali mbwe anyala khuchia Yerusalemu, ebwene eyo anyole khukhalakirwa khurulana nende omusango kuno. ²¹ Nga Paulo yeecha yasaba mbwe basudie omusango kwaye imberi achie abulirwe nende Kaisari, ndalagira mbwe achie abikhweyo khuula nga njia okhumuyira owa Kaisari. ²² Lunyuma Agripa yaboolera Festo, siesi ndakha okhumurekeresiakho omuundu oyo mwene, Festo namulaka mbwe muchuli ochia okhumurekeresia. ²³ Nga olwa muchuli yola, Agripa niyakhecha, nende Barnike, nende chimbindo chikhongo, nibamwingisia abundu wa khuyaalira, nali nende abakhongo ba akulu ba basikari nende abandu bakhongo ba lidokho, khubirira khu munwa kwa Festo yarusia Paulo yarerwa imberi. ²⁴ Festo yamala naboola, omuruki Agrip nende baandu boosi bali ano, nende efwe, mulola omundu uno, okera omukanda kwa Bayaudi nikumsandia Yerusalemu nende ano wosi, nibayokera mbwe khasi akhoyere okhumenya dawe. ²⁵ Arali nga olwa ndaanyola mbwe siumao esiakholere esiyera afwa, khandi mbwe omwene asabire mbwe musango kwaye kusude akulu khu Kaisari, ndafukirira okhumusudia khu Kaisari. ²⁶ owa esie mbulakho likhuwa liadieri khumwandikira omwami wange khulondana nende omusango kwaye. Khulwa ako ndaka humurera khu ewe, khandi mu lukali imberi wao, omuruki Agripa mbwe niyakhamala okhurebwa marebo nyola elikhuwa lia okhwandika . ²⁷ Khubeera khwesie bimbonekhera ebibulamo makesi okhumurera omumboye nabula imbi ikera bamwikulireo omusango.