¹ Paulo yabalingala tiiri abolukhiikho, naboola, abaandu nende abakheerwa, ndakhamenya mumbera indayi ya Nasaye okhuula inyanga ino. ² Naye omukukhani omukhongo Anania yalakirisia abali bemere ambi nende Paulo mbwe bamukhuye omunwa kwaye. ³ Lunyuma Paulo yamuboolera, Nasaye achia okhukhuya ewe, eliida liabakhwa elikondo lia rachari okhubeera ewe wikhale okhukhalakira khurulana nende amalako, khandi olakirisia mbwe bakhuye ebirali mumalako. ⁴ Lunyuma balia abali nibemere ambi naye baboola , "ewe omunyeka omukukhani mukhongo?" ⁵ Paulo naye yaboola, "simbere manyire, abakheerwa, mbwe niye omukukhani mukhongo, okhubeera kandikwa mbwe, khasi ochia okhulomaloma amabi khu omuruki wa baandu bao. ⁶ Arali Paulo nga yecha yamanya mbwe lubeka lulala khu baandu abo bali Abasadukayo, no lubeka lundi bali Abafarisayo, yakingula idoboosi yaye mulukhikho ari, abaandu nende abakheerwa, esie ndi omufarisayo, omwana womufarisayo; owa linaya nende okhulamusibwa khwa bafu nibio bikira nibadakha okhukhalakira. ⁷ Bulanu nga yamala okhuboola ario, okhwali nende okhuingana akari wa Bafarisayo nende Basadukayo; mani omukanda okwo nikukabukhana. ⁸ Khubeera Basadukayo baboola mbwe khasi khuli nende obulamusi, kose malaika kata rokho mutakatifu; arali Bafarisayo bafukirira bioosi ⁹ Khwamala khwaba nende esioka sikhongo, mani abandiki bandi abali lubeka lwa Bafarisayo basingira, nibaboola, khasi khunyola imbi yosi mu mundu uno khaba; nikali mbwe rokho mutakatifu kose malaika amulomalomere, okhulekha okhukhuyana nende Nasaye. ¹⁰ Bulanu khwecha khwabao nende okhuyingana khukhongo, omusikari mukhongo, yecha yaba omuri mbwe Paulo anyala khudonywamo bitundu nende abaandu abo, yalagira abasikari mbwe bachie asi, babukuleyo Paulo nende maani koosi khurula mu baandu abo, mani bamurere musiembekho. ¹¹ Esiro sialondakho omwami yema imberi owa Paulo naboola weberesie omwoyo, Paulo khubeera kori wakhandusiria buloli Yerusalemu, khandi okhoyere khundusiria buloli Roma wosi. ¹² Ngasialo bwakhia, Abayaudi bandi beecha alala, nibalia silulu, nibaboola mbwe khasi banalia kose khung'wa khula kori bakhere Paulo. ¹³ Bali abaandu ababira makhumi kane abali nibakholere olukhobo luno. ¹⁴ Bamala nibachia khu bakhongo ba babakukhani nende abakofu, nibamala nibaboola, efwe khumalire okhulia esilulu sikhongo, mbwe khasi khuchia okhulia khuula kori khuchia okhusiinja Paulo. ¹⁵ Bulanu eng'we nende olukhikho muboolere omukhongo wa basikari mbwe amureere khweng'we muchuli,nga abadakhire okhumureba esindu silayi khulondana naye; nafwe ngolwa anecha ambi khunaba berekekhe khumwiira. ¹⁶ Naye omwana wa omukhana wabwe Paulo nga yabulira kori olwabali niberekekhe yachia mani niyengira musiembekho, naboolera Paulo. ¹⁷ Lunyuma Paulo yalanga mulala khu bakhongo ba basikari mbwe yeche owayali, namubolera mbwe yira omuraga uno owa omukhongo wao; khubera ali nende siindu sio khumuboolera. ¹⁸ Yamuyira khu mukhongo waye wa akulu, namala namubo!olera Paulo omuboye anangire mbwe njie owali, mani nasaba mbwe ndere omuraga uno khu ewe, mbwe ali nende esindu sia okhuboolera. ¹⁹ Omukhongo wakulu wa basikari yadiira omuraga oyo omukhono, niyengira mukari naye, nachaaka okhumureba masididie, "sina esia odakhire khumboolera?" ²⁰ Naye yamubolera mbwe, Abayaudi bafukirisanie mbwe baneecha okhusaba omurere Paulo muchuli imberi wa olukhiikho, kori abadakha okhumureba mubulayi amakhuwa kalondana naye. ²¹ Arali ewe orafukirira amakhuwa kabwe; khubera abandu amakhumi kane bamuliindire, abamalire okhulia eslulu mbwe khasi banalia kose okhung'wa khuula kori bakhamwire Paulo. Bulanu naberekekhe, balindiriire elako okhurula khwewe. ²² 2 Bulanu omukhongo wa akulu owa basikari yaboolera omuraga oyo mbwe abweo, namulakiirisia mbwe, omanya mbwe oraboolerakho omundu mbwe onjekeesie amakhuwa kano dawe. ²³ Yamala nalanga abadiidi baye babiri, naboola murekekhe abasikari echimia chibiri abanachia Kaisaria, nende abasikari aberusi ba chifarasi makhumi saba, nende abasikari ba mafumo echimia chibiri, musikha siaa khadaru sie siro. ²⁴ Mubaberesie chisolo, muniniekho Paulo ,mumuyire mubulindi bulayi owa Filikisi omuruki ²⁵ Yandika ibarwa okhulondana nende kene kano. ²⁶ Kilaudio Lisia khu omuruki wa oluyali Filikisi amakhesio. ²⁷ Omuundu yadiirwa nende Abayaudi, khandi yakhererwe nende Abayaudi ; lunyuma esie ndecha nende abasikari, mani nimwambula, nga olwa ndecha ndamanya mbwe nomuroma niye. ²⁸ Nga olwa ndadakha okhumanya elikosa likera bamukhalakire omusango ndamurera imberi wa olukhiikho lwabwe ²⁹ Ndanyoola mbwe bamurakho omusango okhubeera amakhuwa kalondana nende amalako kabwe, arali siumao siosi ao khulondana nende omusango kwaye esiyera bamwire kose okhumuboya. ³⁰ Khandi nga olwandabolerwa Abayaudi bali bamuboyeere olukhobo nibalindire okhumwiira mulwangu ndamuruma khu ewe, khandi ndalakirisia,mbwe abamurakho omusango balomalome imberi wao esia bali nasio khuniye. Obeo. ³¹ Lunyuma abasikari kori olwa bali balakirisibwe, babukula Paulo nibamuyira musiro khu Antipa. ³² Nibwa khakhia balekha abasikari ba chifarasi okhuchia naye, nabo nibakalukha musiembekho. ³³ Abo nga bola Kaisaria nibamuberesia omuruki ibarwa khandi bara Paulo yesi mumakhono kaye. ³⁴ Omuruki nga yamala okhusoma ibarwa, yareba mbwe arula mu simeka sina esia oburuki. Bulanu nga yeecha yamanya mbwe arula Kilikia, ³⁵ yaboola mbwe, "njia okhurekeresia, nikali mbwe balia abakhurerekho omusango bechere." Namala nalagira bare Paulo musisenge sia Herodi esia obukhalaki.