¹ Ne olwa Yesu yali nabirang, yalola omundu owali niyebulwa nali omubofu. ² Abeechibe nibamureeba mbu, "Omwechesia, nebionono bia wiina ebiachila niyebulwa nali omubofu? Nebibie omwene noho nebia abebulibe?" ³ Yesu nakalusia, shibili ebionoono bibie omwene noho ebia abebulibe ebiachila naba omubofu tawe. Yebulwa omubofu mbu obunyali bwa Nyasaye bulolesibwe muye. ⁴ Olwa shishili eshiteere shiri, ekhoyele okhukola emilimo echia uyo owaruma, okhuba eshilo shiitsanga olwa omundu alanyala okhukhlola ta. ⁵ Olwa endi mushialo, esie nisie obulafu bweshialo. ⁶ Olwa Yesu yali niyakhaboola, yafutsa amare hasi, nakasia litoyi namare yako, nabakha llitoyi elo khutsimoni tsiomundu uyo. ⁷ Namuboolela mbu, "Tsia wiyosie mwitiba lia Siloamu." Kho omundu uyo natsia niyeyosia mumoniwe mana nakalukha nalolanga. ⁸ Mana abamenyanibe nende abandu bamulolanga khale nasaba nibareeba mbu, "Uno shiali niye omundu owayekhalenje khunjila nasaba?" ⁹ Abeechi nibaboola mbu, "Niye!" Nabandi bu, "Tawe, habula afwanana butswa ninaye." Mana omwene naboola mbu, "Nisie omwene nomwene." ¹⁰ Kho nibamureeba bari, "kali karie mbu bulano oyala okhulola?" ¹¹ Naye nabakalusia mbu, "Omundu oyo oulangwa mbu Yesu niye oukasiye litoyi niyambakha khutsimoni niyamboolela enzie mwitiba lia Siloamu ndiyosiemwo tsimono tsianje. Kho enzile ne olwa emalile butswa okhwiyosia nenjaka okhulola." ¹² Nibamureeba bari," Owatsana ali heena?" Naye nakalusia mbu, "shimanyile tawe." ¹³ Kho nibamala nibayila omundu owali omubofu uyo khubaFarisayo. ¹⁴ Kho inyanga ya Yesu yalonga litoyi nahonia omubofu uyo yali Isabato. ¹⁵ AbaFarisayo nabo nibareeba omundu uyo khandi shinga olwa yali nanyalilwe okhulola. Naye nababoolela mbu, "Areere litoyo khumoni tsianje, ne nindiyosia mumoni mana bulano enyala okhulola." ¹⁶ Mana balala khubaFarisayo yabo nibaboola mbu, "omundu okhulele kano shanyala okhuba niyarula ewa Nyasaye ta, shichila shalondanga amalako keIsabato tawe." Abandi nabo nibaboola mbu, Kata kario, omundu ouli omwononi anyala okhukhola ebiamakana ebifwana biri?" Mana obwahukhani nibubaho mubo. ¹⁷ Kho AbaFarisayo nibareeba omundu uyo khani mbu, "Oboolanga mbu akhuhonie obubofubwo nahabwene, nawe bulano oboola orie khuye?" ¹⁸ Ne abemilisi babaYahudi shibasuubila mbu, toto omundu oyo yali omubofu ne bulano anyala okhulola ta okhuula olwa balanga abebulibe, ¹⁹ Nibareeba mbu, "Uno nomwana wenywe? Mubolanga mbu yebulwa nali obubofu? Ne kabere karie mbu bulano anyala okhulola? ²⁰ Abebulibe nabo nibakalusia mbu, "Toto khumanyile uno nomwana wefwe, khandi khumanyile mbu yebulwa nali omubofu. ²¹ Nebutswa shikhumanyile shinga olwa kabeele mbu bulano anyalilwa okhulola ta, kata shikhumanyile omundu umuhoniye tawe. Mumureebe omwene shichila nomundu oukhulile omwene anyala okhwinoosia." ²² Abebulibe baboola bario shichila bali nibarire abemilisi babaYahudi okhuba abaYahudi bali nibamalile okhuhulirisania mbu omundu yesi oufuchilila nasuubile mbu Yesu niye Masihi okhuula alondwe okhurula muSinagogi. ²³ Nishio eshifune shichila abeebuli yabo nibaboola mbu, "Mureebe omwene nomundu ukhulile." ²⁴ Kho nibalanga omundu owalinji omubofu uyo nibamureeba mbu, "Witsube Imbeli wa Nyasaye mbu olaboola obwatoto! khumanyile mbu omundu oukhuhoniye uno nomwonooni." ²⁵ Omundu uyo nakalusia mbu, " shinyala okhumanya naba nali omwononi noho tawe. Elienyalie nelikhuwa elala lionene mbu; Ndali omubofu ne bulaano enyala okhulola." ²⁶ Nibareeba mbu, "Akhukholeele shiina? Akhuhoiye arie obubofu bwo?" ²⁷ Naye nakalusia mbu, "Olwa ekhamalile khale okhumuboolela ne nenywe shimwenya okhuhulila tawe. Nishiina eshichila nimwenya okhukahulila khandi? Haundi mwesi mwikomba okhuba abeechibe nohomba?" ²⁸ Nabo nibamunyeka nibaboola mbu, "Iwe niwe omwechiwe, nebutswa efwe khuli abeechiba Musa." ²⁹ Khumanyile mbu Nyasaye yaboolanga nende Musa, nebutswa omundu uyo shikhumanyile warula tawe. ³⁰ Omusatsa uyo nakalusia naboola mbu, "Kano nakamakana! Enywe shimumanyilekhwo ewa arulanga ta, nebutswa yakholele nendola!" ³¹ Khumanyile mbu Nyasaye shahulilanga aboononi ta; Ahulilanga abandu abamuheresia oluyali nende okhukhola aka yeenya. ³² Okhurula khumusuule shikahulirikhanakhwo mbu omundu yesi yatimbusia tsimoni tsiomundu webulwa nali omubofu ta. ³³ Omundu uno naba mbu shiyarula ewa Nyasaye ta, khane shiyakhanyalilwe okhukhola likhuwa liosi tawe. ³⁴ Nabo nibakalusia mbu, "Ewe webulilwa khndi nokhusiribwa mubwonooni, ne bulano oteemanga okhwechesia efwe? "Mana nibamulonda okhurula Musinagogi. ³⁵ Olwa Yesu yahulila mbu balondere omundu uyo muSinagogi, namukhaaba namunyoola, namureeba mbu, "Osuubilanga omwana wa Nyasaye?" ³⁶ Naye nakalusia mbu, "Mbolera, niye wiina, Omwami kho mbu esuubile muye!" ³⁷ Yesu namuboolera mbu, "Omalile okhumulola khandi niye oubolanga ninawe bulano." ³⁸ Naye naboola mbu, "Omwami esuubile," nasikama hasi niyenamila Yesu. ³⁹ Naye Yesu naboola mbu, "Ndetsa khushialo shino okhuyasia, kho kachile abali ababofu banyalilwe okhulola, ne yabo abalolanga bakwe ababofu." ⁴⁰ Kho balala khubaFarisayo abaliho bahulila naboola amakhuwa yako, mana nibamureeba mbu, "Obolanga mbu kata efwe fwesi khuli ababofu noho?" ⁴¹ Yesu nakalusia mbu, "Nimuba nimwakhabele ababofu shimwakhabele neshikha eshiobwonooni ta; nebutswa bulano olwa mubooanga mbu munyala okhukhola, mushili butswa neshikha."