¹ Toto mwene ebaboolela mbu, omundu oulenjilila mushiribwa eshieshiko shiamakondi ta, ne nanina niyenjilila haundi, omwenoyo nomwifi khandi nomunuli. ² Nebutswa omundu owinjira nabirira mushilibwa niye omwayi wamakondi. ³ Omulindi weshiribwa amwikulira eshiribwa niyenjira, nako amakondi kahulira omwoyokwe olwa akalanga ameera, nakayila okhwaya. ⁴ Ne olwa aba nakarusiye kosi elwanyi, akemililanga, nako nikamulondakhwo okhuba kamanya omwoyokwe. ⁵ Shikanyala butswa okhulokndakhwo khumundu hundi omucheni ta, kalamwirukha, okhuba shikamanyile omwoyokwe tawe. ⁶ Yesu yachera oluchero luno nebutswa shibamanyirisia eshisina eshiamakhuwa yako tawe. ⁷ Ne khandi Yesu nababoolela mbu toto mwene ebaboolela; nisie omuliango kwa makondi. ⁸ Ne abandi boosi abaraanjirira nabeefi khandi abanuuli, ne amakondi shikalabahulira tawe. ⁹ Esie nisie eshiribwa shiamakondi, omundu yesi owitsa nabirira khwisie alahonibwa; alenjiraanga khandi alarulaanga khandi alanyoola obwayiro. ¹⁰ Omwifi yetsaanga khulwa okhwiba, okhwira nende okhwonoonia khwonyene. Esie ndetsa mbu munyole obulamu, khandimube ninabwo mubwitsulu. ¹¹ "Esie nisie omwayo omulayi; Omwayi omulayi afwiraanga amakondike. ¹² Ne omwayi ulia oulali mwene amakondi tawe, olwa alola Libwe nilitsanga, yerukha nalekha amakondi mana Libwe yilo likakwakhwo nende okhukasalasia. ¹³ Omwayi yerukhanga shichila nomwayi womurungo, shahendelanga amakondi tawe. ¹⁴ Esie nisie Omwayi omulayi, ndamanya amakondi kanje, nako kamanya esie, ¹⁵ Shinga olwa Papa yamanya, nasi ndamumanya Papa, nolwa amakondi kanje kamanya mana enyala okhukafwila. ¹⁶ Ne kalia amakondi kandi akalali akanje ne shikali mushiko muno tawe, okhuula ekakhung'aasie koosi khandi koosi kalahulila omwoyo kwanje, mana kalaba lituuli elala elili nomwayi mulala. ¹⁷ "Papa yaheela esie shichila ndeyama okhuhaana obulamu bwanje buno, mbu ebunyoole khandi. ¹⁸ Shaliho omundu owakhanuula obulamu bwanje tawe, Ebuhaananga khukhwenya khwanje omwene. Endi nobunyali okhubuhaana, khandi endi nobunyali okhububukula. Kano niko aka Papa wanje yandachirisia okhukhola." ¹⁹ Obwabukhani khandi ibubaho mubaYahudi khulwa amakhuwa aka Yesu yali naboolele. ²⁰ Ne obunji bwabo nibaboola bari, " Ali neshishieno! Alaluushe! Eshichilanga nimurecheresia akabolanga nishi?" ²¹ Nebutswa abandi khubo babolanga mbu, "Omundu uli neshishieno shiyakhaboola ario tawe! Eshishieno shinyala shiriena okhukhola abandu ababofu balole?" ²² Mana lisabo liokhwitsulila obwahuli biYerusalemu okhuba inzienukhu nilibaho mutsinyanga yitso etsia obushindu. ²³ Yesu yali nachendanga muHekalu mushisika shia Sulemani. ²⁴ Abayahudi nibakhung'ana ewa yali nibamureeba mbu,"Olatsirira okhulekha nikhukanakaninjia okhuula lina? Khuboolere habulafu niwe Masihi mwene?" ²⁵ Yesu nabakalusia mbu, "Ndamanya okhubaboolera nibutswa, shimusuubilanga ta. Akekhoolanga khulwa obunyali bwa Papa wanje, nakobuloli khwisie; ²⁶ nebutswa enywe shimusuubilanga ta, okhuba shimuli amakondi kanje tawe." ²⁷ Amakondi kanje karecheresinjia omwoyo kwanje, nasi ekamanyire nako kanondangakhwo. ²⁸ Ekaheelesinjia obulamu obulahuaho ta, mana shikalifwa tawe. ²⁹ Plapa wanje owamberesia kano koosi nomukhongo okhushila boosi. Ne shialiho kata mulala ounyala okhukabukula okhurula mubulindi bwa Papa uyo tawe. ³⁰ "Papa ninasi khuli eshindu shilala." ³¹ AbaYahudi nibatoola amachina mbu bamulase. ³² Yesu nababoolela mbu, "Ndakholele ebikhole binji ebilayi mumoni tsienywe ebia Papa yamberesia mbu ekhole,kho neshileena khubienebo eshiamwenya okhundasirakhwo amachina?" ³³ Nibakalusia mbu, "Shikhwenyanga okhukhulasa amachina khulwa ebikhole ebilayi ta, nebutswa khulwa okhwenyeka Nyasaye! nende okhwikhola mbu niwe Nyasaye." ³⁴ Yesu nabakalusia mbu, "Shikahandikwa mumalako kenywe mbu ndboola mbu muli abanyaasaye? ³⁵ Khumanyire akamalako kaboolanga buli lwosi nakatoto, naye yalanga abandu yabo abaNyasaye, abo oburumebwe bwetsela. ³⁶ Ne khulwa esie, Papa yanzahula mana niyaruma mushialo. Kho nenywe mwakhaboola murie mbu esie enyekanga Nyasaye shichila emboolee mbu endi Omwana wa Nyasaye? ³⁷ Kho muleshe okhusuubilila nemba nendakhola aka Papa wanje yenyanga ekhole. ³⁸ Nebutswa nekakhola, ne kata nenyu nimulasuubila ta mukhoyere okhusuubila ka ekholanga, mbu kachile mumanyere elala mbu Papa ali mwisie, khandi nasi endi muPapa." ³⁹ Nibeenya khandi okhumutiila Yesu, nebutswa yarula mumikhono chiabwe. ⁴⁰ yesu yamala akalushe injelekha womwalo kwa Yorodan, awa Yohana yali niyebatisiliyenje, mana namenyaho. ⁴¹ Abandu abanji bamwitsila nibaboola, "Yohana shiakhola ebilolelo ebiamakana tawe, nebutswa akayaboola koosi khumundu uno nakatoto. ⁴² Mana abandu abanji ebweneneyo nibasuubila muye.