¹ Olunyuma lwa yako Yesu yamala natsia injerekha olubeka lwa eGalilaya, eya omwalo kwa Tiberia. ² Mana abaandu abanji nibamulondakhwo, shichira balola ebikhole ebikhongo ebiayabakholera abalwale. ³ Naye Yesu naniina khushikulu ne niyekhalayo nende abeechibe. ⁴ Mana Ipasaka inyanga ingali eyabahudi, yali niyulire. ⁵ Yesu olwa yachingula tsimoni tsie ne nalola abandu abaanji nibamwitsilanga, ne nareeba Filipo ari, "nikhure hena emikate bano banyole okhulia?" ⁶ Ne yareeba ario khulwa okhumuteema shichira yali namanyire omwene ishiayetsa okhukhola. ⁷ Filipo namukalusia ari, emikate chietsitinari tsimia tsibili shichinyala okhubahera mbu, buli shia mulala anyolekhwo shititi ta. ⁸ Ne mulala khubeechibe oulanga mbu Andereya, Omusiani wabo Simoni Petero amuboolera mbu, ⁹ "aliho Omwana ali nende emikate chirano nende tsinyeeni tsibiri, halali shino ni shiina khubandu bano bosi?" ¹⁰ Yesu naboola ari, "ikhasie abaandu hasi, ne bwaliho obunyali obunji abwene yaho, kho abasaatsa nibekhala hasi abayera sielefu tsirano boosi halala. ¹¹ Mana Yesu nabukula emikate chilia, nakhupa orio, mana nabakabulira abali nibekhale, natsio tsinyeeni shinga olwa behulira. ¹² Ne olwa bali nibeekure, baboolera abeechibe mbu buunjeresie ebitonye biosi shilatomg'akhwo eshindi shiosi tawe. ¹³ Mana nibabunjeresia ebimwero ekhumi nende bibili, ebitinye biemikate biali nibitonyeere khubali nibaliire. ¹⁴ Mana abaandu yabo olwa balola eshilolero eshia yakhola, baboola mbu obwatoto uno niye Omunabii owetsa mushialo. ¹⁵ Mana Yesu namanyirisia mbu bali betsere okhumutiira mbu kho bamukhole okhuba Omuruchi, yarula khandi natsia khushikulu yenyene. ¹⁶ Ne olwa khwola khulukholoba, abeechibe bakholomokha nibatsia khu khumwalo, ¹⁷ Nibenjira muliaro nibachaaka okhwambukha batsia eKaperinaumu, ne bulano eshiro shiali shiakhenjira, naye Yesu yali nashiili okhubolakhwo. ¹⁸ Nako amatsi nikatuubukha khulwa omuyeka omunji okwachaka okhuhutsa ¹⁹ Ne olwa bali nibakhafuka eliaro shinga tsimailo tsitaru tsine, balolaYesu nachendanga khumatsi, niyeetsanga ahambi ninabo, ne nibaria muno. ²⁰ Naye nababoolera mbu, mularie tawe, nisie. ²¹ Mana nibamwinjisia muliaro ne olwenolo eliaro niliula khulukuku habali nibeenyanga okhuula. ²² Inyanga yakhabili, omukmanda kwali nikusinjire olucherekha womwalo balola mbu eliaro lindi shilialiho tawe, habula elala lionyene; khandi Yesu shiyenjila muliaro elo nende abeechibe ta, halali batsia bonyene. ²³ Halali ketsa amaro kandi okhurula Tiberia niketsa ahambi nende habundu wabaliira emikate olwa Omwami yakhupa orio. ²⁴ Mana omukanda olwa kwalola mbu Yesu shialiho ta, kata abeechibe ta, beenjira muliaro abeene, nibatsia eKaperinaumu nibamukhabanga Yesu. ²⁵ Ne olwa bamulola olucherekha lwomwalo bamureeba mbu, "Rabi, ewe wetsire hano lina?" ²⁶ Yesu nabakalusia naboola ari, "bwatoto ebaboolela mbu, enywe shimukhabanga khulwa ebilolero tawe halali khulwa mulia emikate mimwikura." ²⁷ Mulakholera emilimo ebiokhulia bisasikhanga tawe, halali eshiliibwa eshibetsangao eshiomwana waAdamu yetsa okhubaheresia, shichira niye owarebwakhwo eshibalikho nende Papa, yaani Nyasaye. ²⁸ Mana nibamureeba mbu, khukhole khuriena khokhunyale okhukhola emilimo chia Nyasaye? ²⁹ Yesu nakalusia nababoolera ari kuno nikwo omulimo kwa Nyasaye mbu mumusuubilile ulia owaye yaruma. ³⁰ Ne nibamureeba mbu, neshilolelo shiina eshia okhola khulole mana khukhusuubile? ³¹ Abakuuka befwe balia imana mushiangalamwe shinga olwa kahandiikwa, "mbu Yabaheresia eshiokhulia shio Mwikulu mbu balie." ³² Yesu nababoolela mbu, obwatoto baboolela , shiali Musa owabaheresia eshiokhulia shiomwikulu tawe, halali Papa wanje abaheresia shiokhulia eshiobwatieri eshirula mwikulu. ³³ Shichira eshiokhulia shia Nyasaye ni shilia eshikhaanga okhurula mwikulu nende okhuheresia eshibala shiosi. ³⁴ Mana nibamuboola mbu, Omwami; tsinyanga tsiosi okhweresia eshiokhulia shino. ³⁵ Yesu nababoolela ari, "Nisie eshiokhulia eshiobulamu, yesi owitsa khuisie shieyetsa okhuba nende inzala tawe, ne yesi ousuubila shiyetsa okhuhulira obulo tawe. ³⁶ Nebutswa ndababoolera mbu, mwandola halali shimusubila tawe. ³⁷ Bosi aba Papa yamberesia betsa khwisie khandi yesiyesi owitsa khwisie, shinditsa okhumusukuna elwanyi tawe. ³⁸ Khulwa okhubeera mbu esie shindayekha okhurula mwikulu mbu ekhole akelihanga lianje tawe halali kaulia owaruma. ³⁹ Mana elienya lia ulia owaruma ndielino mbu, khu boosi abayamberesia endeshe okhukosia kata mulala khubo ta, habula mbu emulamusie khunyanga yobumalilishi. ⁴⁰ Khulwa lienya lia Papa ndielino mbu, yesi oumuhenga omwana namusuubila abe nende obulamu bweinziayo, nasi nditsa okhumusimulukusia inyanga yokhumalilikha. ⁴¹ Mana abaYahudi babulula shichira yaboola mbu nisie ehiokhulia shiekha okhurula mwikulu. ⁴² Nibaboola mbu uno shali Yesu, omwana wa Yusufu, owakhumanyire Papa nende mama wuwe, kho aboolanga arie bulano mbu ndekha nirula mwikulu. ⁴³ Mana Yesu nakalusia nababoolela ari Shimulabulule tawe. ⁴⁴ Abulaho omundu ounyala okhwitsa khwisie, habula Papa warula, nasi ndiitsa okhumulamusia khunyanga yokhumalilikha. ⁴⁵ Kahandikwa mubunabii, ne bosi betsa okhuba nibechesibwe nende Nyasaye, bulano yesiyesi ouhulira nende okhweka khuPapa yetsa khuisie. ⁴⁶ Shikali mbu omundu yesi yamulola Papa ta halali ye ourula khu Nyasaye, uyo niye owamulola Papa. ⁴⁷ Obwatoto ebaboola mbu, ulia ousubila, ali nende obulamu bweinziao. ⁴⁸ Esie nisie eshiokhulia shiobulamu. ⁴⁹ Abapapa benyu balia amana mushiangala mana nibafwa. ⁵⁰ Shino neshiokhulia eshirula mwikulu mbu omundu nalia shialafwa tawe. ⁵¹ Esie nisie eshiokhulia shiobulamu, eshiekha okhurula mwikulu, omundu nalia eshiokhulia shino, yetsa okhumenya inziayo ne eshiokhulia shianditsa okhuinia esie nomubili kwanje khulwa obulamu bweshialo. ⁵² Mana abaYahudi nibayingana abeene khubene nibareeba mbu; kanyalikha kariena omundu huno okhuheresia omubili kukwe mbu khulie? ⁵³ Mana Yesu nababoolela mbu, obwatoto, ebaboolela nimuraliakhwo omubili kwOmwana wa Adamu nende okhunywa amatsai keke, shimuli nende obulamu tawe. ⁵⁴ Ounywa amatsai kanje nende okhunywa amatsi kanje ali nende obulamu bweinziayo, nasi nditsa okhumusimulukusia inyanga yokhumalilikha. ⁵⁵ Shichira omubili kwanje neshiokhulia shiobwateri khandi amatsai kanje neshiokhunywa shiakatieri. ⁵⁶ Oulia omubili kwanje nende okhunywa amatsai kanje yekhala mwisie nasi muye. ⁵⁷ Shinga olwa Papa ouli omulamu yaruma esie nasi endi nobulamu khulwa Papa nendio oundiakwo yetsa okhubetsanga omulamu khuisie. ⁵⁸ Shino nishio eshiokhulia eshirula mwikulu shibili shinga ebiabaPapa balia nibafwa tawe, halali oulia eshiokhulia shino shino alamenya inziayo. ⁵⁹ Amakhuwa yako yaboola musinagogi olwa yali niyechesinjia eKaperinaumu. ⁶⁰ Kho abanji khubeechibe olwa bahulira obubolibwe baboola bari, "kano namakhuwa amatinyu, niwina ounyala okhukahulira." ⁶¹ Naye Yesu namanyirisia mumwoyo kukwe mbu abeechibe babululanga khulwa likhuwa lienelo, ne naye nababoolela mbu linyalikhana. ⁶² Nikabe kariena bulano nimulola Omwana wa Adamu ebweneyo owali wambeli? ⁶³ Roho niye ouhana obulamu, omubli shikukhoyeele eshindu ta, ne amakhuwa kandababoolele; niko roho khandi obulamu. ⁶⁴ Halali khuli nende abandi hakari wenyu abalasubila ta, shichira Yesu yamanya okhurula mubuchachiro balia abalasuubilanga ta, nende ulia owitsa okhumukhoba. ⁶⁵ Ne naboola mbu khulwesho ebaboolela mbu shialiho omundu unyala okhwitsa khuisie halali okhunyalilwa nende Papa tawe. ⁶⁶ Ne khulwa akene yako, obunji bwa abeechibe bakalukha inyuma, nibaloba okhumulondakhwo. ⁶⁷ Mana Yesu nabareeba ekhumi nende babili mbu, "mwesi mwenya okhutsia?" ⁶⁸ Mana Simoni Petero namukalusia namureeba mbu, "Omwami, khutsie khuwina? neyuwe ouli nende amakhuwa kobulamu bweinziayo. ⁶⁹ Nefu khusubile mbu eywe niwe omutsienukhu wa Nyasaye." ⁷⁰ Yesu nabakalusia ari; esie shindabahula enywe ekhumi nende babili ne mulala wenyu ni setani. Naboolanga khu Yuda Isikarioti, shichira uyo niye owitsa okhumukhoba naye nimulala mubalia ekhumi nababili.