¹ Ne olunyuma lwamakhuwa yako, lisabo lindi liabaYahudi lialiho, Yesu natikulukha eYerusalemu. ² Ne ebweneyo, ahambi neshiribwa shiamakondi khwali nende litiba elilangungwa mushihebrania mbu Bethezatha nalio liri nende emiliango chirano. ³ Mana mukarii mwenomo khwali nende abalwale abaanji ibakoneremwo, abalenyalila tawe; ababofu, abalema, nende abafwokoya nibalindiriranga amatsi okhutubukha. ⁴ Shichira khwali nende ebise ebia malaika kekhanga, nikenjila mwitiba elo mana katubule amatsi, ne ulia owinjiramwo wokhuranga amatsi nikakhatubulwa, alahona amalwale koosi akaali ninako. ⁵ Ne yaho khwali nende omundu owali nalenyalila tawe khubise biemiaka amakhumi kataru nende munane. ⁶ Ne olwa Yesu yamulola nakonere, naye namanyirisia mbu yakhaba habundu yaho oluhono, ne namureeba ari wenya okhuhona? ⁷ Omulwale ulia namukalusia ari, "Omwami, esie shendi nende omundu onzinjisia mwitiba ta olwa amatsi kaba nikatubuulwa, ne olwa embatsanga mbu ndinjiremwo, ne oundu yaranjirira lwangu. ⁸ Yesu namuboolela mbu, Sinjira witushe omukothoro kukwo mana otsie." ⁹ Mana omundu uyo namala naba nobulamu, niyetuukha omukothorokwe natsia ne inyanga eyo yali Isabato. ¹⁰ Ne khulwesho abaYahudi nibamuboolera owali namalire okhuhona mbu, Luno nisabato, neshichira shibuli obulayi eyiwe okhwituukha omukothoro kukwo ta. ¹¹ Nabalakusia mbu ulia umbonie niye khandi umboolere mbu wituukhe omukotho kukwo mana otsie. ¹² Mana nibamureba mbu, "Oukhuboolere mbu wituushe mana otsie ni wina?" ¹³ Halali omundu wahona shiyamumanya owamuhonia tawe, shichira Yesu yalikhwo ehale ninaye khulwa abandu baliho abanji. ¹⁴ Ne olunyuma lwa yako Yesu yamala namunyoola muhekalu, namuboolera mbu, "lola, oli omulamu bulano, shiolakhola tsimbi khandi tawe mbu likhuwa libi lileshe okhunyoola." ¹⁵ Omundu uyo namala natsia mana naboolera abaYahudi mbu ni Yesu owakhola okhuba omulamu. ¹⁶ Mana khulw yako abaYahudi bamusandia Yesu shichira yakhola yako inyanga yeisabato. ¹⁷ Naye Yesu nabakalusia mbu, "Papa wanje akholanga emilimo okhuula ebise bino, nasi sesi ekholanga." ¹⁸ Mana khulwa yako abayahudi nibatsiririra okwenya okhumwira, shichira shiaunaka tsa isabato tawe, halali halala nende akene yako yamulanga Nyasaye mbu Papa wuwe, niyekhola okhuyerana nende Nyasaye. ¹⁹ Naye Yesu nabakalusia nababoolera ari, "Obwatoto ebabolela, Omwana shinyala okhukhola likhuwa omwene ta, halali lilia elialutsi Papa wuwe nakholanga, shichira koosi akakholanga ye niko khandi komwana akhola ario. ²⁰ Shichira Papa yamuhela omwana, naye mumanyia koosi akaye akholanga omwene, naye yetsa okhumumanyia emilimo emikali okhushira chino mbu munyale okhuhuchisibwa. ²¹ Shichira shingana olwa Papa abasimulukusia abafu nende okhubakhola abalamu nindio shinga omwana ababusia balia abayenyere. ²² Khandi Papa ayaasia shiabuli mundu halali ahelesia omwana obuyaasi bwosi. ²³ Mbu shiabuli mundu amuheresia omwana oluyali shinga olwa baheresia Papa. Ne oulamuheresia omwana oluyali ta, shiamuheresinjia samwana owamuruma oluyali tawe. ²⁴ Bwatoto ebaboolera mbu yei yesi oulila likhuwa lianje mana asuubile owaruma, alinende omulamu obweinziayo, khandi shiyenjira mushiyaasio tawe, halali abilile okhurula mwifwa okhuula mubulamu. ²⁵ Bwatoto ebaboolela mbu, "ebise bitsanga, ne bulano biulile, olwabafu betsa okhuhulila oluyoka olwa omwana wa Nyasaye, nebalia abaluhulila betsa okhuba abalamu. ²⁶ Shichira shinga na olwa Papa ali nobulamu mumwoyo kukwe, nendio khandi shinga olwayaheresia omwana obulamu muwoyo kukwe. ²⁷ Naye namuheelesia alilachirisia eliokhukhola obuyaasi shichira ye nomwana wa Adamu. ²⁸ Murahuchisibwe nende amakhuwa yako tawe, shichira ebise bitsanga, ebia balia boosi abali mubilindwa betsa okhuhulira okhulanjirisia khwe, ²⁹ Nabo betsa okhurula, balia abakhola amalai khubusimulukusi bwobulamu. Ne balia abakhola amabii khubusimulukusibwe, eshiyaasio. ³⁰ Esie shienyala okhukhola likhuwa esie omwene ta, Shinga olwa ehulila nilwo olweyaasia, ne eshiyasio shianje nishiobulunjishi, shichira shikhabanga elienya lianje omwene ta, halali elienya lia ulia owaruma. ³¹ Esie nindirusiria obuloli omwene, obuloli bwanje shibuli bwatoto tawe. ³² Khuli nende oundi ourusirinjia obuloli, nasi emanyire mbu obuloli bubwe bwainia nobwatieri. ³³ Enywe mwaruma abandu khu Yohana naye nayinia obuloli bwatoto. ³⁴ Halali esie shembukula obuloli okhurula khubandu ta, halali emboola kano mbu munyole okhuhonibwa. ³⁵ Yohana omubatisi yali itaa eyakhanga nende okhwang'ang'a nenyu mwachama obulafu bubwe khubise. ³⁶ Halali obuloli bwendi ninabwo nobukhongo okhuyomba obwa yohana, shichira emilimo chia Papa yamberesia mbu ekhole, nichio echekholanga, nachio chiinia obuloli khuisie mbu Papa yaruma. ³⁷ Naye Papa owaruma ayinia obuloli khuisie, enywe shimwahulirahwo omwoyo kwe, kata okhumulolakhwo omwene tsindalo tsiosi ta. ³⁸ Khandi likhuwa lilie shilili mwinywe ta shichira enywe shimusuubilanga ulia owaruma ta. ³⁹ Muhenga mumahandiko shichira muparanga mbu khulimwo nende obulamu obweinziayo, ne yako niko akania obuloli khuisie. ⁴⁰ Khandi shimwenya okwitsa khwisie munyole obulamu tawe. ⁴¹ Esie shenyoolanga obuoli okhurula khubaaba babandu ta; ⁴² Halali ndamanya mbu mubula obuheli obuheli bwa Nyasaye muinywe tawe. ⁴³ Esie nditsire khuliira elia Papa wanje halali enywe shimwainzinjisia ta, ⁴⁴ Munyala muriena okhusuubila enywe abeyama oluyali olurula khubashienywe? ne oluyali lurula khu Nyasaye shimunyala okhukhaaba ta. ⁴⁵ Shimulapare mbu esie nditsa okhubabuula khu Papa tawe, halali aliho oubabuulanga khu Nyasaye khandi niye Musa owamwasuubilila. ⁴⁶ Shichira mulasuubila Musa, mwakhasuubile isie, shichira niye owahandika amakhuwa kanje. ⁴⁷ Ne nimuba nimulasuubiila amahandiko keke ta, mulasuubila muriena amakhuwa kanje?