¹ Kho olwa Omwami yamanya shinga olwa abaFarisayo bali nibahulile mbu Yesu abakhola abandu abanji okhuba abeechi nende okhubabatisia okhushira Yohana, ² Habula Yesu mwene shiyabatisinjia ta halali abeechibe; ³ Yarula ebuYahudi nakalukha natsia eGalilaya. ⁴ Ne bali nibakhoyere okhuburira muSamaria. ⁵ Kho yola khwitaala lindi lia Samaria elilangwa mbu sikari ahambi nomukunda kwa Yakobo yaheelesia Yusufu omwanawe. ⁶ Ne Isebele ya Yakobo yali habwene yaho. Kho mana Yesu, nahenderanga oluchendo, yekhala butswa hasebele, yali shinga isaa yakhasasaba. ⁷ Mana omukhasi undi omuSamaria niyetsa okhutaha amatsi. Yesu namusaba ari, "umbekhwo amatsi enywe," ⁸ Okhuba abeechibe bali nibatsiire mwitaala okhukhula ebiokhulia. ⁹ Ne omukhaso omusamaria namureeba ari, "Kali karie eywe omuYahudi okhusaba sie amatsi ne endi omukhasi omuSamaria? okhuba abaYahudi shibanyeelelananga amatsi nende abaSamaria ta." ¹⁰ Naye Yesu namukalusia ari, "Niwakhamanyire eshihanwa shia Nyasaye yenya okhuha nende oukhusabanga amatsi shinga olwa ali khane nawe yakhakhuheelesiye amatsi." amalamu. ¹¹ Omukhasi oyo namukalusia ari, "Omwami, kata eshiokhuteyela obula khandi liyabo lili hasi muno kho olarusia hena amatsi amalamu? ¹² Eywe oyomba kuka wefwe yakobo owakhuheelesia liyabo lino, omwene nanywamwo nende abaanabe nende emirukochie " ¹³ Yesu namukalusia mbu, buli mundu ounywakhwo khumatsi kano, obulo bulamulia khandi; ¹⁴ Ne omundu yesi ounywa khumatsi akandalamuheelesia, obulo shibulamulia khandi tawe ne amatsi yako aka emuheelesiye kalaba muye isebele eya amatsi akafutukha okhurula khubulamu bwomumeli. ¹⁵ Omukhasi oyo namuboolela ari, Omwami umbekhwo amatsi yako, kho mana obulo buleshenje okhundia kata endeshe okhwitsanga hano okhutaha. ¹⁶ Yesu namukalusia ari, "Tsia olanje omusaatsawo mwitse ninaye." ¹⁷ Omukhasi oyo nakalusia namuboolela mbu, shiendi nende omusaatsa ta. Yesu namuboolela ari, Otechile noboola mbu shioli nende omusatsa ta. ¹⁸ Okhuba wateshibwa nabasaatsa barano ne kata owa oli ninaye bulano shialiye omusaatsawo tawe, oboolile habwene. ¹⁹ Naye omukhasi oyo namuboolela ari, Ndakhalola mbu oli Omunabii. ²⁰ Abakuuka befwe benamilanga Nyasaye Mushikulu shino, nenyu abaYahudi muboola mbu Yerusalemu nimwo omwa abandu bakhiyele omkhumwinamila. ²¹ Yesu namuboolela mbu, "omukhasi iwe suubila esie, mbu eshise shiitsanga eshia muletsa mushikulu nohomba muYerusalemu okhwinamira Papa. ²² Enywe mwinamiranga eshia mulamanyire tawe, efwe khwinamiranga eshia khumanyire shichira obuhonia burula khubaYahudi. ²³ Nebutswa eshise shiitsanga ne bulano shiulire eshia abamwinamiranga mubwatooto balamwinamira Papa muRoho nende mubwatooto; okhuba Papa akhaaba shinga na yabo bamwinamire. ²⁴ Nyasaye ni Roho ne abamwinamira bamwinamira muRoho nende mubwatooto. ²⁵ Ne omukhasi uyo namuboola ari, emanyire mbu Masihi ouli Kristo olwa aliitsa alikhuboolela kosi. ²⁶ Yesu namuboolela mbu, "Esie uboolanga ninawe, ESIE NISIE." ²⁷ Habwene yaho abeechibe nibeetsa, ne nibabulula mbu aboola arie nende omukhasi uno, nebutswa yabulaho owareeba mbu "wenya shiina." kata mbu, "osungananga nende wina," tawe. ²⁸ Mana omukhasi oyo nalekha isiongoye ne nakalukha mwitaala nababoolela abandu ari, ²⁹ Yitse mulole omundu umbooleele kosi akandakhola, shiali niye Kristo watsana? ³⁰ Nibarula mwitaala nibatsia ewa yali. ³¹ Olunyuma lwene abeechibe nibamusaaya nibaboola mbu, "Rabi yitsa olie." Naye ³² nababoolela ari, "Endi nende ebiokhulia ebiamulamanyirekhwo ta." ³³ Ne abeechibe nibaboolerana mbu, oundi akhamulerere eshiokhulia noho?" ³⁴ Yesu nababoolela mbu, ebilibwa bianje nibio okhukhola aka owaruma yeenya nende okhumalirisia emilimochie. ³⁵ Enywe shimuboolanga mbu chishili emiesi chine nelichesa liitsa, lole ebaboolela mbu, chinguule tsimoni tsienywe mana muhenje mumikunda mbu chimalire okhuba nichitushire lichesa. ³⁶ Ouchesa alia omushara nakhung'asia ebiamo okhuula khubulamu bwobumeli mbu mana ouraka nende ouchesa bekhoyere halala. ³⁷ Shichira mukene yako oluchero lutuukha mbu mulala araaka noundi achesa. ³⁸ Ndamurumire okhuchesa ebia mulanyakhanila ta, abandi nabanyakhana ne nenyu mwayenjiile mukhunyakhana khwabwe. ³⁹ Ne abaSamaria abanji abarula mwitaala omo nibamusuubilila khulwa likhuwa liomuhasi oyo. ⁴⁰ Kho olwa abaSamaria bamwitsira mamwisaaya mbu nayanza yekhalekhwo ninabo. Naye niyekhala ninabo tsinyanga tsibili. ⁴¹ Mana abanji khubo bamusuubilila khulwa amakhuwake. ⁴² Nibamuboolela omukhasi oyo bari, bulano khusuubile ne shiili khulwa okhuboolakhwo ta okhuba efwe abeene khuhulile ne nikhumanya mbu toto mwene uno niye omuhonia weshialo shiosi. ⁴³ Olunyuma lwetsindaalo tsibili, yarula natsia eGalilaya. ⁴⁴ Okhuba Yesu mwene yaboola mbu omunabii shialikhwo nende oluyali mushialo shiabwe ta. ⁴⁵ Ne olwa yoola eGalilayo, abaGalilaya nibamwinjisia shicila bali nibaluutsi akayakhola eyeYerusalemu khwisabo elo shichira bosi bali nibatsiire mwisabo. ⁴⁶ Mana niyoola khandi Kana muGalilaya, ewa yakalukhasia amatsia okhuba idivai ne yaliho omukhulundu wundi owelitookho, owa omwanawe yalwalila eKaperinaumu. ⁴⁷ Ne olwa yahulila mbu Yesu winjile mu Galilaya yatsia ewa yali namusaaya mbu atsie amuhonie omwanawe okhubera yali nali ahembi okhufwa. ⁴⁸ Ne Yesu namuboolela mbu ne mulaluutsi ebilolero biekholere shimulasuubila kata nahatutu tawe. ⁴⁹ Omundu oyo namuboolela mbu Omwami, kholomokha omwana wanje nashiili okhufwa. ⁵⁰ Naye Yesu namukalusia mbu tsia butswa omwanawo nulamu. Omundu oyok nasuubila likhuwa elia Yesu yamuboolela "tsia butswa." ⁵¹ Ne olwa yali natsitsanga, abasumbabe bamwakanila nimuboolela bari omwanawe nomulamu. ⁵² Kho niyenya okhumanyirisia okhurula khubo mbu nelisa shiina elia achachire okhusosa? Ne nabo nibamukausia mbu mukoloba khu saa yomunane olwa yaleshele okhurenga. ⁵³ Mana samwana namanya mbu neisaa yatsana olwa Yesu yamuboolela mbu omwanao nomulamu, ye mwene nasuubila halala nende abomunzuye bosi. ⁵⁴ Shino nishio eshilolero shiakhabili eshia Yesu yakhola narulile ebuYahudi niyenjile muGalilayo.