¹ Mana Pilato namubukula Yesu ne namukhupa. ² Ne abasikari nibakasia ingara ya mahua nibamura khumurwe, nibamufwala ingubo yeisabarau. ³ Nibamushesia mbu mulembe Omuruchi wAbayahudi nibamukhupa tsikhofi. ⁴ Pilato nakalukha khandi ne nababoolera mbu emukalusia khunywe khandi halali mumanye mbu shemunyolerekhwo nende eshikha shiosi tawe. ⁵ Mana Yesu niyetsa nafwalire ingara ya mahua ne ingubo yeisambarau ne Pilato nababoolera ari ngwoyo. ⁶ Olwa abakhulundu babakuhani nende abakhalabani yabo bamulola bayiba obutinyu mbu abamwe! abambwe! Naye Pilato nababooleraari mubukule mumubambe habutswa shemulolerekhwo neshikha shiosi tawe. ⁷ Abayahudi nibamukalusia bari khuli nelilako ne khulio akhoyere okhufwa shichira yekhola okhuba Omwana wa Nyasaye. ⁸ Olwa Pilato yahulira ario, yaria muno. ⁹ Niyenjira khandi muPraitorio nareba khandi Yesu mbu warula hena? Naye shiamukalusia tawe. ¹⁰ Pilato namureba mbu shiwenya okhuboola ninasi tawe, shiomanyirekhwo mbu endi nende obunyali bwokhukhubamba khandi obunyali bwokhukhukhola omulakhule. ¹¹ Yesu namukalusia ari sholikhwo nobunyali bwosi khwisie tawe halali obwoheresibwe okhurula mwikulu, niko kachira oyo owayareere mumukhonokwo ali nobwonooni obukhongo okhushira. ¹² Ne okhurulana nende yako, Pilato niyenya okhumulakhuula, habutswa abAyahudi nibayiiba obutinyu nibaboola mbu nolakhuula omundo oyo natsia shiwitsa okhuba omulina wa Kaisari tawe, okhubera mbu yesiyesi owikhola okhuba Omuruchi, akhola shibeka nende Kaisari. ¹³ Ne olwa Pilato yahulira ario, yarusia Yesu erwanyi, niyekhala khushifumbi shiobuyaasi, habundu halangwa mbu Obweru ne muluHeburania mbu Gabatsa. ¹⁴ Ne yali inyanga yokhwikhoyera Pasaka, ne yali shinga khusaa yakhasasaba naye naboolera abaYahudi mbu Omuruchi wenywe ngwoyo! ¹⁵ Nabo nibayiba mbu murusie! murusie! mubambe! naye Pilato nareeba ari emubambe omuruchi wenywe? Ne abakhulundu babakuhani nibakalusia bari shikhuli nende omuruchi ta halali Kaisari. ¹⁶ Ne namulakhuula mbu bamubambe, nibamubukula nibatsia ninaye. ¹⁷ Mana nachinga omusalabakwe natsia habundu alangwa muluHeburania mbu Goligotsa yani mbu habundu weshianganga. ¹⁸ Ewa bamubamba nende abandi babiri Yesu nali hakari wabwe. ¹⁹ Mana Pilato nahandika eliira nara khumusalaba, nilihandikwa liri; "YESU WE NASARETI, OMURUCHI WABAYAHUDI." ²⁰ Ne abanji bokhubaYahudi nibasooma okhuba habundu wayabambwa yali ahambi nende litookho, nalio liahandikwa muluHeburania, mululatini nende muluYunani. ²¹ Kho abakhulundu babakuhani babaYahudi nibamukania Pilato mbo shiolandika mbu Omuruchi wabaYahudi ta; habula mbu Ye yekholanga ari Nisie Omuruchi wabaYahudi. ²² Ne Pilato nabakalusia ari eliehandiche emalire okhuhandika. ²³ Olwa balindi bali bakhamubamba Yesu khumusalaba, babukula ebifwalobie nibabikabulamwo khane, buli omulindi omukabo khandi nende inguboye yomukari, ne ingubo eyo shiyali nende obunabiro bwosi ta, yalikhwa yosi okhurula ikulu. ²⁴ Nibaboolerana bari shikhulakusia ta halali khuchiupire ikha khulole niwina oubukula mbu amaandiko katusibwe akaboola mbu; bakabana ebiifwalo bianje, Nibakhupa ikha khungubo yanje, niko akabalindi bakhola. ²⁵ Maria nyinamwana Yesu nende omukhana wabwe mbu Maria omukhasi wa Kiliopa nende Maria Magadalina bali nibasinjire hamusalaba kwa Yesu. ²⁶ Olwa Yesu yalola nyina nende omwechi wayali niyachama nibasinjireho yaboolera nyina ari Mama omwanwo ngwoyo! ²⁷ Mana naboolera omwechi oyo mbu mawo ngwoyo; ne yaho yaho omwechi namuyira ewuwe. ²⁸ Ne olunyuma lwa kanoolwa Yesu yamanya mbu buli shindi shiwere ne amaandiko katusibwe, yaboola mbu, "ndaalashe." ²⁹ Ne isiongo yeidivai yali niyirenjekhweho, nibabukula eshiangwe nibeena mudivai iranyire eyo ne nibashira khuluusi nibayira khumunwakwe. ³⁰ Olwa Yesu yamala okhubukula idivai iranyire, yaboola mbu, "kahwere," niyenamia omurwekwe ne nakhalaka omwoyo. ³¹ Ne okhubera mbu yali inyanga yokhwikhwanira, abaYahudi basaba Pilato mbu bafunakwe ebirenje nibarusibwaho mbu emilambo chileshe okhuton'a khumusala khunyanga yeisabato tawe shichira inyanga eyo yali ikhongo mmuno. ³² Kho abalindi nibafunaka ebirenje bio wokhuranga nend oundi owabambwa ninaye. ³³ Ne olwa boola khu Yesu yali namalire okhufwa ne nibalamufunaka ebirenje ta. ³⁴ Nebutswa mulala khubalindi yamutsoma mulubafu ne habwene nahabwene amatsai nende amatsi nikarulamwo. ³⁵ Ne ulia owalola ali nobuloli ne obulolibwe nobwatooto ne amanyire mbu akaboola nikatooto mbu akasuubira. ³⁶ Kano kekholekha mbu liandiko litusibwe. Likumbalie lirifunakakhwo ta. ³⁷ Ne lihandiko lindi liboola lirinanwa, Balimuhenga oyo owabafumira. ³⁸ Olunyuma lwa kano, Yusufu wa Arimathae, omwechi wa Yesu halali muburii khulwa abaYahudi yamwisaya Pilato mbu abukule omubiri kwa Kristo ne Pilato namwiyamira. Naye niyetsa nbukula omubiri kwa Kristo. ³⁹ Khandi naye Nikodemo owali namwitsire Yesu mushiro nali nende amatsokasio mane mane nende tsisubili ebihela shinga tsiratili eshikhumi. ⁴⁰ Nabo nibabukula omuhmiri kwa Yesu nibakuboha musanda eikitani halala nende amalesi shinga eshiima shiabaYahudi eshiokhuyabira abafu shinga olwa kali. ⁴¹ Ahambi wayabambwa, khwaliho nende omukunda ne mmukunda okwo kwalimwo ing'ani imbia eyomindu ashiriri okhuyabirwamwo ta. ⁴² Omo Nimwo omwabayabira Yesu khulwa okhwipanjira inyanga ikhongo yabaYahudi, shichira ing'ani eyo yali ahambi.