¹ Yesu yaboola amakhuwa kano mana nachingula tsimoni mwikulu naboola ari Papa ebise biulire, chingula Omwanao mbu Omwanao yesi anyale okhukhuchingula. ² Shinga olwa omweresiye obunyali khubandu bosi mbu abaheelesie obulamu bweinziayo abo bosi aba wamuheelesia. ³ Ne mbu mubulamu bweinziayo buno banyale okhukhumanya ewe wenyene Nyasaye watoto nende Yesu Kristo owa waruma. ⁴ Ndakhuchinguulire khushialo' emalire omulimo kwa wamberesia okhukhola. ⁵ Ne bulano Papa ungalusirieoluyali halala ninawe omwene, oluyali lwenolo olwa ndalinji ninalwo halala ninawe, eshialo nishishiili okhubaho. ⁶ Ndabamanyia eliiralio abandu beene abo aba wambeelesia mushial; balinji abobo, ne nobamberesia ne bahuliile likhuwalio. ⁷ Ne bulano bamanyirisiye mbu ebindu biosi ebiaumberesiye nebibio. ⁸ Okhuba ndabaheeresiye amakhuwa kawamberesia nabo nibakafuchirira ne bamanyirisie toto mbu ndarula uwo ne basuubile mbu toto waruma. ⁹ Ebasayiranga, shiesayianga eshialo ta habula balia abawamberesia shichira nibo abobo. ¹⁰ Ne biosi ebili ebianje nebibio, nabio ebibio nebianje, nasi eheebwa oluyali mubo. ¹¹ Ne bulano shieshili mushialo khandi ta ne habutswa bo bali mushialo nasi nzitsa ewa oli. Papa Omutakatifu obalinde khulwa elliralio abo abawamberesia mbu babetsenje mulala shinga olwa khuli. ¹² Olwa ndali ninabo mushialo ndabalinda khulwa elliralio abo abawamberesia, nebateetsa kata abulaho khubo owatiba, habula Omwana wobukori oyo; mbu amahandiko ktusibwe. ¹³ Ne bulano enzitsa ewoli, ne amakhuwa kano emboola mushialo mbu babe nende okhwikhooya nikhusiilisibwa mubo. ¹⁴ Ndabaheeresia likhuwalio ne eshialo, shichira shibali abeshialo ta; shinga sie olwa endali weshialo ta. ¹⁵ Shesaaya mbu obarusie mushialo ta ne mbu obalinde khumubi oyo. ¹⁶ Shibali abomushialo ta shinga olwa endali womushialo. ¹⁷ Obatsienule mubwatoto obwo. ¹⁸ Shinga olwa waruma sie mushialo, nasi nendio ndabaruma mushialo. ¹⁹ Ne Khulwabo, nditsienula omwene mbu bosi banyale okhwitsienula okhuburira mubwatoto. ²⁰ Shembasaayira bano bonyene ta, habula nende abenabo abasuubilila esie khulwa likhuwa liabwe. ²¹ Mbu bosi babe mulala shingana olwa Papa ali mwisie nasi muye, mbubosi banyale okhuba mulala mwifwe mbu eshibala shisuubile mbu khane niwe owaruma. ²² Mbu oluyali olwamberesia ndabaheeresia mmbu babe mulala shinga olwa fwesi khuli mulala. ²³ Esie mubo nawe mwisie mbu bakholwe abalunjishi mubulala, eshialo shimanye bu niwe owaruma, ne wabaheela shinga olwa waheela sie. ²⁴ "Papa ndikoomba mbu balia abawamberesia babe ninasi ewa endi, mbu balole oluyali olwa wamberesia shichira mbu waheela kata eshialo nishishiili okhubaho." ²⁵ "Ee Papa omulunjishi, eshialo shishiakhumanya ta; ne halali esie ndakhumanya ne nabo bamanyire mbu niwe owaruma. ²⁶ Ne nasi ndabamanyia eliiralio, khandi ndalalimanyisia, mbu obuheeli obwa waheela bube mubo, nasi mubo.