¹ Amakhuwa kano ebaboolela nikusili, mbu mana muleshe okhusinyisibwa. ² Mana balamusukuna elwanyi wetsisinagogi, ebise biitsanga ebia balamwira nibapara mbu bamukholera Nyasaye emilimo. ³ Ne kano koosi bakhola shichira shibamumanyire Papa kata esie tawe. ⁴ Ne amakhuwa kano ebaboolela mbu olwa kaba nikekhola, mwitsulile shinga olwa ndababoolela, ne kano shindababoolela mukhuchaaka ta shichira ndali ninenywe. ⁵ Ne bulano erulaho, enzia wa oyo owaruma, ne abulaho kata mulala owureeba mbu otsia hena ta. ⁶ Ne okhuba ebaboolele amakhuwa kano, eshibeera shitsuule mumioyo chienywe. ⁷ Kata kario ebaboolela obwatoto, kali habulafu khunywe mbu erulaho, ne nimba nindarulaho khunywe ta, omuhotseresi uyo shialetsa tawe, ne nimba ninzia ndalamuruma khunywe. ⁸ Ne olwa aleetsa, alahula eshialo mushiina khumakhuwa kobwonooni, akobulunjishi nende akobukhalachi. ⁹ Akobwonooni shichira shibaasuubila sie ta. ¹⁰ Akobulunjishi shichira enzia khu Papa, nenyu shimulandola khandi ta. ¹¹ Akobukhalachi shichira Omuruchi weshialo shino amalire okhukhalachirwa eshiina. ¹² Endi nende amakhuwa amanji akokhubabolela nebutswa shimboola ta shichira shimunyala okhukenjisia ebise bino tawe. ¹³ Kario khumweno oyo owitsa, Roho tsana akalababoolela, shialabola khukeke omwene tawe, habula akalahulira niko akalababoolela ne alabafunulira akene yako aketsa okhwitsa. ¹⁴ Mana alamberesia oluyali; shichira alabukula khukanje ne alabanyia enywe. ¹⁵ Buli shindu eshia Papa ali ninashio neshianje, niko akachira nemboola mbu alabukula khukanje naye alabamanyia nywe. ¹⁶ Khushise eshiititi shimulandola ta, khandi khushise eshitiiti mulandola shichira enzia ewa Papa wanje. ¹⁷ Mana balala khubeechibe nibachaaka okhurebana mbu lino limanyisia shina, mbu khushise eshitiiti mulandola khandi khushise eshitiiti shimulandola ta shichira enzia ewa Papa. ¹⁸ Ne nibatsirira okhurebana mbu lino limanyisia shiina elia aboola mbu eshise eshitiiti shimulandola ta ne abulaho oumanyirisia tawe. ¹⁹ Mana Yesu namanya shinga olwa benya okhumureba, ne nababoolela mbu murebananga elia emboolele mbu khushise eshitiiti ta shimulandola, khandi khu shise eshitiiti mulandola khandi. ²⁰ Ebaboolela obwatoto mbu mulekhuula nimulira nashio eshialoshilekhoya, eshibeela shienyu shilametekha ne kata okhuberera khwenyu khulakalusibwa okhuba okhwikhoya. ²¹ omukhasi olwa aba nalumwa abetsanga neshibeela, ne olwa aba nikhebula, asangala niyebirira akeshibeeshie shichira omundu yebulwe mushialo. ²² Khulwa eshise shino muli nende eshibela, ne ndalabetsela khandi, mana mulasangala ne obusangafu ibo abulaho ounyala okhuburusia khwinywe. ²³ Ne khunyanga eyo shimulareba eshindu shiosi ta ebaboolela obwatooto mbu liosi liosi elia mulareba, Papa muliira lianje alabaheresia. ²⁴ Okhuula eshise shino mushiri ikhureba liosi liosi muliira lianje ta, sabe liosi elia mwenya nenyu mulakholelwa mbu mana obusangafu bwenyu bwitsule. ²⁵ Amakhuwa kano embolele ninenyu mutsinjero ne eshise shiitsanga eshia ndaletsa okhubola ninenyu mutsinjero tawe, ndaboola habulafu mbu emumanyire Papa. ²⁶ Ne inyanga yene eyo mulareeba liosi liosi muliira lianje, nasi, nasi shindalababoolela mbu enzia okhusaaya papa khu lwenyu ta. ²⁷ Okhuba Papa wanje yabaheela shichira amanyire enywe mwaheela khandi mwasuubila mbu ndetsa okhurula khu Nyasaye. ²⁸ Ndetsa mushialo nerula ewa Papa khandi endalekha eshialo nengalukha ewa Papa. ²⁹ Abeechibe nibamureba mbu lola bulano obola butswa habulafu ne nolaboola mutsinjero khandi ta. ³⁰ Bulano khusuubila mbu eywe omanyire amakhuwa kosi, ne abulaho oukhureba likhuwa liosi ta, shichira khumanyire mbu warula ewa Papa. ³¹ Yesu nabakalusia mbu, bulano musuubila? ³² Lola eshise shiitsanga ne kata shiulile eshia mulasalana buli mundu natsia injira yiye nimundekha sienyene, nebutswa shiendi sienyene ta okhuba Papa wanje ali halala ninasi. ³³ Amakhuwa kano ebaboolela mbu mutsie mana mube nende omulembe, okhubela mushialo mulaba nende okhusandibwa, nebutswa mwihelesie omwoyo shichira emalire okhuhula eshialo.