¹ Ne lisabo lia Pasaka olwa liali nilishiiri, Yesu olwa yamanya mbu ebise bibie bimalile okhuula mbu arule atsie ewa Papa wuwe, ne olwa yali yabaheela abomushialo, yabaheelela elala. ² Ne olwa bali nibalitsanga eshiokhulia shiomukoloba, shetani yali namalile okhura mumwoyo kwa Juda Isikarioti omwana wa Simoni mbu amukhobe; ³ Yesu namanyirisie mbu Papa wuwe amwere biosi mumikhonochie, khandi mbu yarula ewa Nyasaye khandi atsitsanga ewa Nyasaye; ⁴ Yarula khubilibwa, ne naraa elubeka tsingubotsie, nabukula itaulo niyeboha. ⁵ Natsukha amatsi khulukaraya ne nachaka okhwosia aeechibe ebirenje nabapangusia nende itaulo eya yali niyeboyere ⁶ Olwa yoola khu Simoni Petero, ne Petero namureeba mbu, Omwami, wenya okhunzosia ebilenje? ⁷ Ne Yesu namukalusia namuboolela ari, shiekholanga shino shiomanya bulano ta, halali nomanye olunyumakhwo. ⁸ Petero naye namuboolela mbu, Shiunzosia ebilenje tawe; naye namukalusia nendakhwosia ta, shiolaba neshisango ninasi ta. ⁹ Petero namuboolela mbu, Omwami, shiolanzosia ebilenje bionyene ta, halali nende amakhono nomurwe biosi. ¹⁰ Yesu namuboolela mbu, ulia owisinjire omubili, yenyekha tsa okhwosia bilenje shichira nomulafu, nenyu muli abalafu, halali mwesi tawe. ¹¹ Khulwa okhubeera mbu yali namumanyirisie owitsa okhumukhoba, niko kachira naboola mbu, shimuli abalafu mwesi ta. ¹² Kho owa yali namalile okhuboosia ibilenje, yabukula tsingubotsie, niyakhekhala khandi, yabareeba mbu, mumanyire elia ebakholele shinga olwa lili? ¹³ Munanga mbu Omwechesia, khandi mbu Omwami; mubolanga obulayi shichira nendio endi. ¹⁴ Ne nikhaba mbu Esie Omwechesia khandi Omwami eboosie ebilenje, mwesi mukhoyile okhwosanonjia ebilenje. ¹⁵ Khulwa okhubeera mbu ebahesie eshilolero, mbu mwesi mukholenje shinga olwa ebakholere. ¹⁶ Toto mwene emuboolela mbu, omusumba shiayomba Omwamiwe ta; kata omurumwa shiayomba oumurumire ta. ¹⁷ Ne nimuba mumanyire kano, muli abeikhabi nimuba nimukakhola. ¹⁸ Shiembola kano khwinywe mwesi ta, emanyirisie abandalobola, halali mbu amaandiko katusibwe, oulitsanga khubilibwa bianje yanjingulile eshisisiro. ¹⁹ Ne bulano ebaboolela nikashili okhwikhola mbu, olwa kaba nikekhola, munyle okhusuubila mbu Isie Nisie. ²⁰ Toto mwene emuboolela mbu, owinjisia ulia owa eruma, yanzinjisia, ne ounzinjisia yenjisia owaruma Isie. ²¹ Ne olwa yamala okhuboola, yakhana mumwoyo, ne narumbula naboola ari, toto mwene emuboolela mbu, mulala khwinywe yetsa okhukhoba. ²² Ne abeechibe nibahengana nibakanakania mbu niwina owaboolakhwo? ²³ Ne yaliho mulala khubeebe owali nayeshile hashlifu shia Yesu, owayaheela muno. ²⁴ Simoni Petero yamusima nomukhono mbu, areebe mbu niwina owayakhaba naboolanga? ²⁵ Ulia owali nayeshile khushilifukhwe nareeba Yesu mbu, niwina owoboolanga? ²⁶ Yesu nakalusia naboola mbu, ulia owandiitsa okhumutonyera eshironje nimuheresia. Olwa yatonya eshironje, yamuheeresia Yuda Isikarioti Omwana wa Simoni. ²⁷ Ne inyuma weshironje esho, shetani namwinjiramwo, ne Yesu namuboolela ari, elia okhola, khola bwangu. ²⁸ Ne abulaho hameesa owamanya eshiachila namuboolela amakhuwa yako. ²⁹ Abandi bapara mbu olwa Yuda ali nende omufuko, Yesu amuboolelanga mbu kula ebindu biakhutambire khulwa lisabo; nohomba mbu aheeresie abamanani eshindu. ³⁰ Kho olwa yamala okhubukula eshironje, yarula ebise ebo ne shiali eshiro. ³¹ Mana ye olwa yali namalile okhurula Yesu yaboola mbu Bulaano omwana womundu aheebwa oluyali khandi Nyasaye aheebwa oluyali muye. ³² Khandi Nyasaye alamuchingula muye omwene namuheelesia oluyali yaho yaho. ³³ Abaana abatiti, endi ninenywe khubise ebititi. Mulakhaaba, ne shinga olwa ndaboolela abaYahudi, mbu wenzia shimunyala okhwitsayo ta, nendi emuboolela. ³⁴ Lilako liyia ebaheelesia mbu muhelanenje; shinga olwa emuheelile, muheelanenje murio. ³⁵ Mbu khwikhuwa lino, abandu bosi bamane mbu muli abeechi banje nimuheelana abeene khubene. ³⁶ Simoni Petero namureeba Omwami otsia hena? Naye namukalusia namuboolela ari, kata ewenzia shionyala okhutsia ninasi ebise bino ta; halali naundondekhwo olunyuma. ³⁷ Petero namureeba ari, Omwami, eshira shina ndilanyala okhukhulondakhwo bulano ta? ndalahana obulamu bwanje khulwa yuwe. ³⁸ Yesu nakalusia mbu ohaane obulamubwo khulwa esie; toto mwene ekhuboolela mbu itaywa nishiiri okhulakula, onziikana khataru.