¹ Naye Saulo niyeeyamane nokhufwa khwa Stefano, mana khwali nende okhunyasibwa okhukali khukanisa, nabo Abarume nibasalasibwa tsimbeka tsiosi etsia Ebuyahudi nende Samaria,halali Abarume tawe. ² Mana abandu abamuritsanga Nyasaye,nibabukula omubili kwa stefano nibakuyabila,nibamwikhula obutinyu. ³ Mana Saulo nanyasia Likanisa muno, natsia buli mutsu natiila abasatsa nende abakhasi nokhubara mumbohe. ⁴ Khulweyako yabo abasalana tsimbeka tsiosi,batsia bario nibakamba likhuwa lio Omwami. ⁵ Mana Filipo nakholomokha mwitokho lia Samaria,nabakambila Kristo. ⁶ Mana abandu nomwoyo mulala bahulilisia Filipo nakambanga nende okhulola akamakana kekholekha okhubilira khuye. ⁷ Okhuba amadimoni kakhupa tsimbungu nikarula mubandu abakali nikamenya mwo, nabo abateshere nende abamakara nibahona. ⁸ Mana nikhubaho okhwikhoyo okhukali mwitokho yimwo. ⁹ Ne khwali nende omundu owelira mbu Simoni, omwene oyo yaloka abandu ba Samaria nobulosi bwe,neyelanga mbu omulakusi omukhongo. ¹⁰ Owa abandu bosi bahulilisia okhuchaka khu mutiti okhula khumukali,nibabola mbu,omundu uno nowobunyali obukali obwa Nyasaye. ¹¹ Kho bamuhuliranga shichila khulwo oluhono olurambi yali niyabaloka nobulosi bwe. ¹² Nebutswa olwa basuubira Filipo nakambanga, amakhuwa ko bwami bwa Nyasaye,nende khandi Kristo,babatisibwa bosi abasatsa nende abakhasi. ¹³ Kho Simoni mwene yesi nasuubila,mana natsililira nende Filipo nalolanga akamakana nende aka ebilolero biekholekha. ¹⁴ Mana olwa abarume bahulira mbu Samaria bali nibeyamile likhuwa lia Nyasaye,babarumila Petero nende Yohana. ¹⁵ Nabo olwaboola yo,babasayila mbu banyole omwoyo omwetsienukhu. ¹⁶ Okhuba yali nashiri okhubeshelakhwo kata mulala wabo, nebutswa bali nibabatisibwa butswa mulira lia Yesu. ¹⁷ Mana nibabarakhwo amakhono,nabo nibanyola omwoyo omutsienukhu. ¹⁸ Ne olwa Simoni yalola mbu khulwa okhurebwa khwo amakhono kabarume,omwoyo omutsienukhu kwahanwa,yabahelesia amapesa. ¹⁹ Nababolela mbu mumbekhwo siesi obunyali buno,mbu mana siesi owerakhwo omukhono anyole omwoyo omutsienukhu. ²⁰ Mana Petero namuhalabira,namuboolera mbu eywe nende amapesa koko mutibe shichira oparire mbu eshihanwa shia Nyasaye shikulungwa amapesa. ²¹ Obulakhwo omukabwa kata eshitonye muma khuwa kano tawe,shichira omwoyo kwo shikuli habwene imbeli wa Nyasaye tawe. ²² Khulwaeshio wikanile ,osaye Nyasaye mbu haundi liparo lio mwoyo kwo liibi lino linyala okhulesherwa. ²³ Shichira ehulilanga mbu omwoyo kwo kuli mubululu obuunji khandi mukhunyakhana okhukali. ²⁴ Mana Simoni nababolera mbu,musayire khu Nyasaye ,mbu kachire likhuwa kata elala khukamwakhabola kano lileshe okhundira. ²⁵ Mana olwa bali nibahanile akobuloli nende okhukamba,bakalukha nibakamba injili mumaataala amanji kebu Samaria. ²⁶ Mana malaika womwami namuboolela Filipo mbu,"buukha otsie khunjira ye mwalo eyirula Yerusalemu niyitsia Gasa."Eyili eshitsimi. ²⁷ Mana nabukha natsia,ne lola omundu omukali we Ethiopia omulate,owobunyali obukali hasi wa Kandake, omukhasi omuruchi wa Ethiopia.owali nende obunyali khwibishilo lie,ne yali niyetsere Yerusalemu khulwa okhulaama. ²⁸ Yali nakalukhanga niyekhale mwikaari lie,nasomanga amakhuwa ka Isaya omulakusi. ²⁹ Mana omwoyo kubolera Filipo mbu tsia wiyunje ninaye mwikaari. ³⁰ Mana Filipo niyelukha natsia ewa yali,namuhulila nasomanga amakhuwa ko omulakusi Isaya,namureba mbu,otiilanga khushisina shia makhuwa kosomanga kano? ³¹ Ne namureba mbu, 'nemanye endiena omundu nalanzibalire?"Mana niyenya mbu Filipo yenjire abeninaye. ³² Ne eshitonye shie lihandiko lia yasoma njieshino mbu,yemililwa shinga likondi elitsia mushisinzilo ne nalabolakhwo likhuwa liosi ta,ne khandi shinga omwana we shimeme aholera imbeli wa oyo oumuteta obwoya ne nalachinga omunwa ta. ³³ Mbu mubwitutuyi bwe,obukhalachibwe bwarusibwaho ,ne niwina oularumbula khukolwibulo lwe?khulwa obulamu bwe bwahinibwa okhurula khushialo. ³⁴ Mana omulate namubolera Filipo mbu,"ekhusaya , omundu uno abolanga khu keke omwene nomba khuko omundi undi? ³⁵ Mana Filipo niyekula omunwa kwe nachachira khwihandiko lilia eliayali nasomere ,ne namukambira Kristo. ³⁶ Ne olwa bali nibatsilililanga khunjira bola khu matsi.ne omulate oyo naboola mbu,"Lola amatsi. Nishina eshiakhatsikalira okhubatisibwa? ³⁷ Mana Filipo nakalusia mbu,noba nosuubila no mwoyo kwo kwosi,onyala okhubatisibwa,naye nakalusia namubolera mbu,esubire shinga olwa Kristo ali omwana wa Nyasaye. ³⁸ Mana nalachilisia likaari mbu lisinjire,mana nibekha bosi mumatsi,naye Filipo namubatisia. ³⁹ Mana olwa bali nibarulire mumatsi,omwoyo kwo Omwami kumuchinga Filipo nikumurusiaho,omulate nalamulola khandi ta,mana natsia euwe nachamile. ⁴⁰ Mana Filipo nalolekha Azotasi ,ne nabilanga yakamba mumataala amanji okhula olwa yola Kaisaria.