¹ Omukohani omukhulundu namureeba ari, "Amakhuwa kano kali kario.? ² Naye Sitefano naboola mbu," " Baane befwe nende baPapa banje, recheresiekhwo,Nyasaye woluyali yaloleshela kuuka wefwe Ibrahimu olwa yali Mesopotamia nashiri okhutsia okhumenya Harani. ³ Mana namuboolera ari,"Rula mwiloba lienywe nende mubeebulwa bo,witse mwiloba liandalakhumanyia." ⁴ Kho yarula mwiloba lia bakaldayo mana namenya mushiibala shia Harani.okurula yaho,olwa samwana yali nafwire ,Nyasaye yamuhuyia namurera Mushibala shino,eshiamumenyanga mwo bulano. ⁵ Ne shiyamuheresiakhwo kata walanga mbu ahuwe nomba kata wokhuseena eshilenje ta,halali yamulachilisia mbu,kata naba nashibula omwana,yakhamuheelesia liloba elo mbu libe elirie okhula khulwibulolwe, olwitsanga inyuma we. ⁶ Nyasaye namubooleri mbu "Olwibulolwe lwakhamenye hatiti mushibala eshicheni,ne lwakhakholwe abasumba mushibala hisho khumiaka ebikhumi bine.(400) ⁷ Halali ndakhakhalachire Eshibala esho eshiina,mana olunyuma bakhetsa okhurumushira hano. ⁸ Mana Nyasaye namuhelesia indakano yeshishebo,kho Abrahamu niyebula Isaka mana namusheba inyanga yomunane,Isaka niyebula Yakobo,naye Yakobo niyebula balia ekhumi nababiri. ⁹ Khulwa okhubeera abaakuka bakhale yabo bali neimbalikha khu Yusufu,bamukusia atsie Emisiri,ne Nyasaye yali halala ninaye. ¹⁰ ne namuhonokosia mubusandibwibwe bwosi,namuhelesia obuchesi nende okhukoosiabwe imbeli wa Farao omuruchi wa Misiri, namukhola Kafana wa Misiri nende okhusinjilira ebieitsu ye biosi. ¹¹ Kho bulano inzala nobunyakhani obukhongo bwinjira Emisiri woosi pe nende eKanaani,mana abapapa befwe shibakhanyalile okhunyola eshiokhulia tawe. ¹² Kho olwa Yusufu yaulira mbu ebilibwa bili Emisiri,yarumayo abapapa befwe khulwokhuranga. ¹³ Olwabakalukha olwakhabiiri ,Yusufu yabeebulira abasiani babwe,mana oluhiyia lwe lumanyikhana khu Farao. ¹⁴ Yusufu naruma abasiani babo mbu batsie barere Yakobo ouli samwana,halala nende abeekho be bosi , amakhumi saba nabaraano. ¹⁵ Kho Yakobo nakholomokha natsia Emisri,ne yamala afwe , halala na bapapa befu. ¹⁶ Nibachingwa nibairwa Shekemu, nibayabirwa mushilindwa eshia Abrahamu yakula obukusi bwetsifeetsa okhurula khu baana ba Hamori. ¹⁷ Olwa inyanga ya Nyasaye yalachilisia Abrahamu yali ahaambi,inyanga yobusubisie,Abandu bakhula, nibebulana, mana bametekha mu Emisiri. ¹⁸ Okhula olwa omuruchi uundi yaanjingukha okhuruka Emisiri, oulamanyile Yusufu tawe. ¹⁹ Omuruchi huyo nakholera abandu befu kobubi nokhubanyasia mbu basukune abaana babwe abatoro mbu baleshe okhuba abalamu. ²⁰ Ne khutsinyanga etso,Musa yebuulwa,yali omulayi embeli wa Nyasaye,nabiikhwa mutsu ya samwana emiiesi chitaru, ²¹ Ne olwa yasukunwa olwanyi,omukhana wa Farao yamutola mana namulera shinga omwana huuwe omwene. ²² Musa yechesibwa akobuchesi bwosi bwa Emisiri, mana yali waamani mububoli bwe nende mumilimo. ²³ Ne nali okhuula emiaka amakhumi kane,omwoyo kwe kwanaya okhuchendera abaasiani babwe, bolwibulo lwa Isreali. ²⁴ Ne olwa yalola mulala khubo naminuungwa nomuMisiri,yamuhabina namumalila eshikwoli oyo owasandibwa namuupa Omumisiri oyo. ²⁵ Ne yakaala mbu aboluuyiabe banyala okhumanya shinga olwa Nyasaye yenya okhubahonia okhuburira khumukhono kwe , ne shibanyala okhumanyilisia tawe. ²⁶ Inyanga yalondakhwo,yabalola nibakhupananga ,mana natema okhurera omulembe hakari wabwe,naboola,"Abashianje,muli aboluuyia lulala;Shichira shina mukosaniranga abeene?' ²⁷ "Ne mulala owali naraanjire owaashie namuluuma eyo,nokhuboola mbu,'Niwiina oukhuloboole okhuba omuruchi khandi omukhalachi weshina hakari wefwe? ²⁸ wenya okhunzira shinga olwa wamwirire Omumisiri eshiabeere?' ²⁹ Mana Musa okhuulira endio,niiyerukha natsia naaba omucheni mushibala shia Midiani,naba samwana abasiani babiri. ³⁰ Ne olwa emiaka amakhumi kane chiabila,Omumalaika yamuloleshera nali mushitsimi shieShikulu shia Sinai,mulumemu lwomuliro mushitsakha. ³¹ Ne olwa Musa yalola omulilo iko,yauka muno mana olwa yasuta ahambi,omwoyo kwomwami nikumwitsira, nokhuboola mbu, ³² Esie nisie Nyasaye wabapapa bo,Nyasaye wa Abrahamu,Isaka nende Yakobo.;Musa natechera ,kata shiyatsaalikha okhhenga yo tawe. ³³ Omwami namuboolela mbu,'wifwalule ebilaaro mubilenjebio,khulwa okhubera abuundu woosinjire nikhwiloba litsienukhu. ³⁴ Khubwatieli enduutsi okhusandibwa khwa abandu banje bali Emisiri;Euliire okhulira khwabwe,mana ndishire hasi hano khulwa okhubahabina.'bulano itsa,Ekhurume Emisiri.' ³⁵ Musa huno owabafukula,olwa baboola mbu, "niwina wamwaaula okhuba omuruchi khandi omukhalachi weshina?'naye niye owaNyasaye yaruma okhuba omuruchi khandi omununuli khulwa omukhono okwoMumalaika wamuloleshera nali mushitsakha. ³⁶ Musa yabeemilira nabarusia erwanyi waMisiri, niyakhakhola amangalimwa nende ebilolesio Emisiri khandi khunyanza inzakhanyu,nende mushitsimi tsinyanga tsiemiaka amakhumi kane. ³⁷ Ni Musa mulala oyo owaboolela abandu ba Isreali ,'Nyasaye alabachingulira Omulakusi okhurula mulwibulo luno,Omulakusi shinga esie.' ³⁸ Huno niye owali nomukhungano mushitsimi nende Omumalaika owaboola ninaye khushikulu shia Sinai,owali nabapapa befu,khandi owanyola amakhuwa kobulaamu mbu akhuhelesie. ³⁹ Ne abapapa befwe bakhaya okhumuhulira ,nibamusindikha eyo okhurula khubo,mana mumioyo chiabwe nibakalusia Emisiri. ⁴⁰ Khutsinyanga yitso nibaboolela Haroni mbu, 'Khukasilie ebinyasaye ebilakwimilila,Narali Musa uno, owakhuiinia mushibala shia Misiri,shikhumanyile eshikholeshe ninaye tawe.; ⁴¹ Khulwa yako nibakasia eshimosi munyaanga yitso mana barera eshihanwa khushilonje esho,mana nibasaangala khumilimo chiemikhono chiabo. ⁴² Naye Nyasaye nabafutarira nabalekha mbu benamire ' tsin'ginin''gini tsiokhumalesi,shinga olwa kaandikwa mushitabo shiabalakusi mbu,'Mwandelela khwo emiruko nende ebiihanwa mutsinyaanga tsie emiaka amakhumi kane mushitsimi,enywe itsu ya Israeli? ⁴³ Mwachingula obwali bwa Moleki nende in'ginin'gini yebinyasaye bia Refani,nende ebilonje biomwakasia mbu mubinamirenje:khulwayako ndakhabaile eyale okhushira Babeli.' ⁴⁴ Abapapa befwe bali nende Liheema lioburumbusi mushitsimi,eliali nilialekhwa okhulondokhana shinga Nyasaye yebaalila Musa,okhulondokhana khushilolero shiayalola. ⁴⁵ Olunyuma bapapa befu bemilirwa nende Yoshua,benjiisia Liheema elo mukari olwa bali nibakhemanusia liloba elo,Nyasaye yabukula liloba elo okhurula khubeshialo mana nabaloonda abapapa befu nibalolanga.Liheema liatonga khwiloba elo okhuula tsinyanga tsia Daudi. ⁴⁶ Owachamwa nende Nyasaye mana nasaba mbu anyoole abundu wabeinzu ya Yakobo bamenya. ⁴⁷ Halali ni Suleimani owomboshera Nyasaye inzu. ⁴⁸ Kata kario Nyasaye shamenyanga munzu yombokhwe nomukhono kwomundu tawe,shinga olwa omulakusi yaboola, ⁴⁹ Likulu nilio eshifumbi shianje,ne Eshialo na abuundu wokhusena nebiilenje bianje. Neinzu yeimbia shina yomunyala okhunyomboshera?Omwami aboola ario,nomba nabuundu shiina wenyala okhuulushira? ⁵⁰ Shikuli omukhono kwanje kwakaasia ebiindu bioosi? ⁵¹ Enywe abamakosi amoomu,abalaashebwa mumioyo nende amaruuwi,muingananga nende omwoyo omutsienukhu,nimukhola butswa shinga bapapa benyu bakholanga. ⁵² Nomulakusi huleena wabapapa benyu balanyaasia?Beera abalakusi baranjilira omutsienukhu yenyene witsanga,nenyu khandi mubeere abakobosheri bobubeyi khandi bokhumwiira. ⁵³ Enywe abaandu banyoola amalako akalelwa nabaMalaika,ne shimwakabikha tawe." ⁵⁴ Kho olwa bahulira amakhuwa ako,batsuunwa mumioyo,mana bamukhwarulira ameno stefano. ⁵⁵ Halali ye neyetsulwemwo nomwoyo omutsienukhu, yahenga tsimoni tsie mwikulu,nalola obunyali bwa Nyasaye,khandi nalola Yesu nasinjile omukhono musatsa kwa Nyasaye. ⁵⁶ Stefano naboola,"Lola,endolanga Likulu nilikuushe,mana omwana wa Nyasaye niyekhaale omukhono omusatsa kwa Nyasaye." ⁵⁷ Khukeneako nibekala amaruwi kabwe nokhukhupa liyooka khumwoyo kweiikulu, nibamukwakhwo nelichooma elala, ⁵⁸ Nibamuinia erwanyi welitokho mana baachaka okumulasa namachina.Nabo abaloli nibara tsingubo tsiabwe hasi webiilenje biomubukha undi welira mbu Saulo. ⁵⁹ Olwabali bashimulasanga namachina,yamulanga Omwami naboola ari,"Omwami Yesu,bukula omwoyo kwanje." ⁶⁰ Nasikama hasi mana nalira nomwoyo omukhongo,"Omwami,sholabatilira eshikha khwikhuwa lino tawe."Olwa yamala okhuboola endio,nafwa.