¹ Olwa khwali nikhusebulane yinabo nikhusimula oluchendo khunyanza, nikhutsia shirunji mwitookho lia Kos, inyanga yalondakhwo nikhuba mwitookho lia Rodos, khurula yo nikhutsia mwitookho lia Patara. ² Olwa khwanyoola imeli yokhutsia eFoinike, khwaniina mwo nikhuchaaka oluchendo. ³ Ne olwa khwalolera ehale Kipiro, khwashileshera omukhono omukata, mana nikhwinjira eSiria, khandi nikhusinjira eTiro: okhuba ebweneyo imeli yali mbu yiruule yo emisiiko. ⁴ Ne olwa khwanyoola yo abaheerwa, khwekhala yo tsinyanga saba: nibamusaya Paulo mu Roho mbu shalatsia eYerusalemu tawe. ⁵ Tsinyanga tsiefu olwa tsiauwa, khwarulayo nikhutiira injira; mana nabo boosi nibakhukooba nikhutsia khuluchendo, halala nabakhasi babo nende abana bakhukooba okhuula erwanyi welitookho: mana nikhusikama khulukuku lweinyanza mana nikhusaya. ⁶ Mana nikhusebulana, efwe nikhuniima mu meli, nabo nibakalukha ingo. ⁷ Ne olwa khwali nikhumalire oluchendo okhurula eTiro, khwola eTolomai, nikhushesia abaheerwa, mana nikhubayo oluhoono lweinyanga ndala. ⁸ Inyanga yalonda khwo efwe bali nende Paulo, khwachaka oluchendo, mana nikhwitsa eKaisaria: mana nikhutsia nikhwinjira munzu mwa Filipo omwinjilisti, owali mulala khu balia saba; nikhumenya yinabo. ⁹ Naye yali nende abakhana saba abali, abashisira, abali abahana obunabii. ¹⁰ Olwa khwamenyayo tsinyanga tsinyinji, omunabi wundi yarula ebuYahudi oweliira mbu Agabo. ¹¹ Olwa yali niyoolere ewakhwali, yabukula omushipi kwa Paulo, mana niyeboya amakhono nende ebirenje, mana naboola, Kano niko aka Roho Omutsienukhu, Endi nilwa olwa Abayahudi ba Yerusalemu balaboya mwene omushiipi kuno, mana nabo balamuhana mumakhono aka Abamahanga. ¹² Mana olwa khwahulira amakhuwa kano, efwe fwesi, nende balia abali habundu yaho, bamusaya mbu aleshe okhutsia Yerusalemu. ¹³ Mana naye Paulo nabakalusia, Mukholanga shiina nimwikhuula khandi nimunzira omwoyo? Shichira esie endi shindirecheshe okhuboywa khwonyene tawe, habutswa kata okhufwa mu Yerusalemu khulwa eliira eliOmwami Yesu. ¹⁴ Ne olwa yakhaya okhumuhunzulwa, khwalekhana ninaye, nikhuboola, Elienya lia Nyasaye likholeshe. ¹⁵ Olunyuma lwetsinyaga yitso khwabukula emisiiko chiefu, mana nikhutsia okhuula mu Yerusalemu. ¹⁶ Abeeka bandi aba Kaisaria beetsa ninefu okhurula eKaisaria, beetsa nende omundu weliira mbu Munasoni owokhurula eKipiro, omweeka wali weimberi, owa khwali khumenye ninaye. ¹⁷ Olwa khwali nikhulire Yerusalemu, abaheerwa bakhwinjisia nobusangali. ¹⁸ Inyanga yalonda khwo Paulo yatsia ninefu khu Yakobo, khandi abakhulundu boosi baliyo. ¹⁹ Nikhumalire okhubashesia, yamala abetoonyere likhuwa elala elala kalia aka Nyasaye yali nakholere hakarikari wa Abamahanga okhubirira mubukhalabani bubwe. ²⁰ Nabo nibamalire okhukahulira, nibaheresia Nyasaye oluyali, nibamubiira, Lola, omusiani wefu, ne abandu etsihelefu abamalire okhusuubila hakarikari wa Abayahudi; nabo bali neshinani khulwa amalako. ²¹ Ne babiirwa khu yuwe obechesinjia Abayahudi boosi abamenyere mubaYunani mbu balekhane nende Musa, nobabiira mbu baleshe okhusheba abaana baabo, mana khandi mbu baleshe okhuchenda mumiima tawe. ²² Bulano buno khukhole shiina? Kayunjia abomukanda okhuula bakaane halala: okhuba balahulira mbu eywe witsire. ²³ Khario olakhola aka khulakhubiira: khuli nende abandu bane abamalire okhwitsuba; ²⁴ Bukula abandu bano,mana otsie mwitakase mwesi, mana obarunjire emirungo chiabo, mbu kata babeche emirwe chiabo: nilwa bulimundu alamanya mbu ebindu bia bahulira khuywe nakobubeyi; balamanya mbu wesi omenyanyanga obulayi, nolinda amalako. ²⁵ Ne okhulondana nende Abamahanga abasubira, khwahandika khandi khwakhalaka mbu shibalaba abokhulinda ebindu bino, habutswa mbu belinde okhurula khubindu ebihanirwe emisango khubifwanani, okhurula khumatsayi, nende okhurula khu obwiilasi. ²⁶ Paulo yabukula abasatsa yabo, mana Inyanga yalonda khwo nibetienula omwene ninabo nibenjira muhekalu, okhumanyisia mbu yoosiye tsinyanga tsia okhutsienulwa, okhuula olwa eshihanwa shilahaanwa khulwa buli mulala waabo. ²⁷ Ne olwa tsinyanga saba tsili nitsiri ahambi okhuuwa, Abayahudi abali aba Asia, olwa bamulola muhekalu, bachachia induli mubandu boosi, mana nibamutiira mumakhono kaabo. ²⁸ Nibakhupanga obuyoka mbu, Abasatsa ba Israeli, khukhoonye: wuno niye abandu boosi buli habundu ebindu bili shibeka nende amalako, kata hano. Kata khandi wumalire okhureera Abayunani muhekalu nende okhwononia habundu hatsienukhu hano. ²⁹ (Okhuba bali nibamuluutsi khale khwo nali nende Turufimo omuEfeso, mwitookho, yali namurerere muhekalu.) ³⁰ litookho liosi niliba niliyobere, mana abandu niberukha halala: nibatiira Paulo, mana nibamukwesa erwanyi weihekalu: mana emiliango nichikalwa lwangu. ³¹ Ne olwa bali Nikali ahambi okhumwiira, likhuwa liolera omukhongo wabasikari, mbu litookho liri neinduli. ³² Owamala narula lwangu nende abasikari nende abasesia, berukha nibatsia womukanda kwali, nibalekha okhumukhupa Paulo. ³³ Mana omuseesia omukhulundu nasita ahambi, namubukula, nalachirisia mbu aboywe neminyololo chibiri; niyenya okhumenya wuno ni wiina, ne akholere shiina. ³⁴ . Abandi abomukanda baboolanga shino, nabo abandi baboolanga eshindi: ne olwa yali nakhayirwe okhumanya obuyoka nobwashi, nalaka mbu Paulo ayirwe mumbiinga. ³⁵ Olwa yoola khubiniiniro, abasikari bamuchiinga shichira omukanda kwali nobuyoka, Arusibweo omundu wuyo! ³⁶ Okhuba boosi bali nibamulondangakhwo nibaayula nibaboolanga mbu yerwe! ³⁷ Shinga olwa Paulo yali nali okhwinjira mumbinga, yabiira omuseesia mbu, Enyala okhwiyamirwa okhuboolera eshindu? Omuseesia namukalusia mbu, Wamanya Oluyunani? ³⁸ Eyuwe shioli omu Misiri, owetsinyanga tsiabira yareera induli, owemirira abandu etsiyelefu tsine mushitsiimi abali abeeri? ³⁹ Paulo naboola mbu, Esie endi Omuyahudi okhurula eTaruso eyomu Kilikia, omwibule welitookho elilali litiiti tawe: mana, nasi emusaya, mundeshe emboole nende abandu. ⁴⁰ Ne olwa yali nashibuula, Paulo yasinjira khubiniiniro mana nabakhomolera abandu emikhono. Olwa khwalio nende okhuhuleera okhukhongo, yababoolera mululimi olwesHiburania, naboola mbu,