¹ Olunyuma olwa induli yali niyiweere, Paulo yalanga abeeka bebe, naye nabatinyisia, mana narulayo natsia e Makedonia. ² Ne olwa yali nabirire mutsimbeka yitso, naba tinyisiye emioyo, yetsa Ebuyunani. ³ Nibamenya yo emiesi chitaru. Mana Abayahudi bali niberecheshe nibamulindanga, olwa yali nali ahambi okhutsia eSiria muliaro, yamala nakhalaka okhukalukha nabirira mu Makedonia. ⁴ Abatsia ninaye okhwinjira Asia yali Sospita owokhurula ebu Berea; abe ebu Tsesalonika, Aristariko nende Sekundo; nende Gayo wa eDerube, nende Timotheo; aba Asia, Tichikas nende Turofimo. ⁵ Bali nibakhuranjirire okhutsia imberi wefu eTroa. ⁶ Mana nikhunina eliaro nikhurula ebu Filipi olunyuma olwa tsinyanga tsia omukate kubulamwo limera, nikhubetsera eTroa mutsinyanga tsirano; khwamenyayo tsinyanga saba. ⁷ Inyanga yokhuranga yeliwiki, olwa abeeka beetsa halala khulwa okhumeka omukate, Paulo yabakambira, niyerechekhanga okhutsia oluchendo mukamba; naye natsiririra okhuula mushiro hakarikari. ⁸ Khandi khwaliho nende obulafu obunji munzu omwa bali nibakaniire. ⁹ Ne khwaliho nende omubukha wundi owalangwa mbu Eutiko, yali niyeekhale khwidirisha, tsindolo nitsimutiira: mana nalakakha okhurula khugorofa eyakhataru ikulu mana natolwa nafwiire. ¹⁰ Habutswa Paulo yatsia hasi, namwinyiirirakhwo, namufumberera baboola mbu, Shimulahenda tawe; okhuba obulamu buli muye. ¹¹ Olwa yali nakalushe ikulu khandi, mana namechere omukate, khandi naliire, yatsiririra okhuboola okhuula olwa bwashia, mana nasimukha yo. ¹² Mana nibareera omubuukha wuyo nali omulamu, nabo nibaba nende obuhotseresi obukhongo. ¹⁴ Ne olwa yakaana yinefu eSosi, khwamwinjisia, mana nikhuula eMitilene. ¹⁵ Nikhutsiirira mumeli okhurula yaho, ne inyanga yalondakhwo khwali nikhuchoomane nende Kio; inyanga yalonda khwo khwoola eSamosi, nikhusinjira eTogilam; inyanga yalondakhwo kwetsa eMileto. ¹⁶ Okhuba Paulo yali nachomere mbu abirire ebu Efeso, shichira shiyali niyenya okhumala ebise ebinji mu Asia tawe: yali nayobere, nikakhanyalikhane khu ye, mbu abe mu Yerusalemu khu nyanga eya Pentekote. ¹⁷ Mana okhurula Melito, yarumana batsie Efeso, mana nalanga abakofu belikanisa. ¹⁸ Ne olwa bali nibamwiitsire, nababoolera mbu, Enywe mumanyire, okhurula inyanga yokhuranga eyandenjira mu Asia, imera yandamenyera mwo hakari wenyu tsinyanga tsiosi, ¹⁹ Nekhalabaniranga Omwami mubwitutuyi bwosi bwo mumapaaro, nende amasika amanji, nende amateemo, ebianyoola okhurula khu Abayahudi bangonesheranga: ²⁰ Nenyu mumanyire shingana olwa shindalekha okhubabiira koosi akali amalyi akokhubakhoya enywe, habutswa ndabechesia habulafu, khandi munzu khu yindi, ²¹ Nekholanga obuloli khu Abayahudi, nende khandi Abayunani, mbu bekanire nibatsiira Nyasaye, nende obusubiri mu Omwami Yesu Kristo. ²² Ne bulano, lole, enzitsanga Yerusalemu nemboyirwe nende Roho, nindalamamnyire aketsa okhunyoola yo tawe: ²³ Nikali Roho Omutsienukhu shiaboola eshia emboola mubuli litookho mbu eminyololo chinindanga. ²⁴ Habutswa shembukulanga obulamu bwanje okhuba obwobukhala khulwaje sienyene, mbu embe uonyala okhumala oluchendo nomwikhoyo, nende oburumushi bwndanyoola okhurula khu Omwami Yesu, mbu ekhole akobuloli bweinjili khulwa obukosia bwa Nyasaye. ²⁵ Lola bulano, emumanyire nywe mwesi, aba hakari wenyu ndachendanga nengamba obwami, shimwakhalole obwami bwanje khandi tawe. ²⁶ Kario emuboolera Inyanga yino, mbu esie embula eshikha shiamatsayi akomundu yesi. ²⁷ Okhuba shindayekalira okhubabiira elienya liosi Elia Nyasaye. ²⁸ Kho mube meeso abene, nende lituuli liosi, Elia Roho Omutsienukhu yamukholere okhuba abasinjiriri, mulisie likanisa lia Nyasaye, elia yakula namatsayi komwana we. ²⁹ Esie emanyire mbu olwa enzitsanga, ne amafunyisi akoburasi kaletsa hakarikari wenyu ne shibalabererera lituuli tawe. ³⁰ Kata khandi balarula hakari wenyu abandu abetsa okhukoyasia obwatoto okhukhwesa abeeka betse babalonde khwo. ³¹ Kario mwiyenje, khandi mwitsulire, mbu khulwa oluhoono olwa emiyika chitaru shindayekalira okhubachetsiiyia buli shiamulala wenyu eshiro ne shiteere namasika. ³² Ne bulano, abaheerwa, ebahaana khu Nyasaye, nende khwikhuwa elia obukosia, obuli nobunyali bwokhumbakha nywe, nende okhubaheresia obulaame hakarikari wa yabo boosi abatsienulwa. ³³ Esie shindayekomba ifetha yomundu yesi, kata ithahabu, ingubo tawe. ³⁴ Kata mwesi mumanyire, mbu amakhono kano kakhalabanira amenya kanje, nende balia abandali ninabo. ³⁵ Ndaabamanyiye omufwano mubindu bioosi, shinga olwa mukhoyere okhukhonya abali abateshere mukhukhola emirimo endio, ne nimwitsulira amakhuwa aka Omwami Yesu, shinga yaboola, Nobulayi okhuyiinia okhuyoomba okhuhebwa. ³⁶ Ne olwa yali naboolere kano, yasikama hasi, mana nasaya ninabo boosi. ³⁷ Mana nabo boosi nibalira mubutinyu, nibamukwa mwikosi, nibamutsunzuna, ³⁸ Nibabereranga khulwa amakhuwa kalia aka yali nababoolere, mbu shibakhalole obweni bubwe khandi tawe. Mana nibatsia ninaye okhuula olwa yaniina mumeli.