¹ . Olwa inyanga ya Pentakosti yali nimalire okhuula, bali boosi nibali halala mubulala. ² Mana metsukhana nibahulira obuyoka okhurula mwikulu shinga obwomuyeka omukhongo nikuhutsanga, mana nikwitsula munzu yoosi mwabali nibeekhale. ³ Mana tsinimi shingana tsiomuliro nitsilolekhana, nikuyeera khubuli mulala waabo. ⁴ Mana boosi nibetsulwamwo nende Roho omutakatifu, nibachaka okhoboola mutsinimi tsindi shingana Roho yabanyalira okhuboola. ⁵ Ne bulano buno khwalio nende Abayahudi abamenyanga muYerusalemu, abandu baritsanga Nyasaye, okhurula mubialo biosi hasi welikulu. ⁶ Olwa obuyoka buno bwahulirikhana buli habundu, emikanda chitsa halala, mana nabo nibahuchusibwa, shichira buli shamulala yabahulira nibaboolanga mululimi lulwe. ⁷ Mana nabo boosi nibahuka nende okhuchenya, nibaboolerana mbu, Lole, ababoolanga bano boosi shibali abaGalilaya? ⁸ Shichira shiina khubahuliranga fwesi mutsinimi tsiefu abeene etsia khwebulirwamwo? ⁹ Abapathia nende Abamedesi nende abaelamite, nendee boosi okhurula Emesopotamia, ebuYuda nende Kapadokia, muPontas nende Asia, ¹⁰ Phrygia nende Pamfilia, mumisiri, nende tsimbeka tsia Libya nochomere ebukerene, nende abacheni okhurula ebuRoma, ¹¹ Abayahudi nende abali nibakalukhasibwe, Abakrete nende Abaarabu, khubahulira nibaboolanga mutsinimi tsiefu amakhuwa amakhongo aka Nyasaye.uu ¹² nabo boosi nibahuka nibachenya, nibareebana abeene khu bene mbu, Shino nishiina? Eshifune shiako ni shiina? ¹³ Abandi nibabatsesherera niboola mbu, Abandu bano bamerere idiveyi imbia. ¹⁴ Habutswa Petero nabuukha nasinjira nende ekhumi nende mulala balia, mana nachiingula omwoyo ikulu mana naboboolera mbu, Enywe abandu bebuYahudi, nende enywe mwesi abamenyi bomuYerusalemu, mukhoyere okhumanya kano, khandi muhulire amakhuwa kaje: ¹⁵ Okhuba abandu bano shibamerere tawe, shinga olwa mupaaranga tawe, lole kho khuli khwisa liakhataru lieinyanga. ¹⁶ Habutswa kano niko akali okhuboolwa nende omunabi Yoweli; ¹⁷ Tsiakhabe tsinyanga tsiokhumalirikha, nilwa aboola Nyasaye, Olwa ndiakhasundule Roho wanje khumibiri chiosi: mana abana benyu abasiani nende abakhana bakhaboole obunabii; nabo abasiani abaraaka bakhalole amalolo, nabo abakofu benyu bakhaloore amaloro. ¹⁸ Khandi khubasumba banje abeshisatsa nende abeshikhasi ndakhabatsushire Roho wanje mutsinyanga yitso; nabo bakhaboole obunabii: Nasi ¹⁹ Ndakhalolesie akamakana mwikulu hekulu, nende ebilolero mushialo hasi; amatsayi nende omuliro, nende omuya kuyiire kwoomwosi: ²⁰ Eliuba likhakalukhasibwe okhuba eshirima nakwo omwesi okhuba amatsayi, inyanga ikhongo yOmwami niyishiri okhuula: ²¹ Mana kakhetse okhubira, mbu yesi yesi oulalanga khuliira lia Omwami alahonibwa. ²² Enywe abandu ba Israeli, wulire amakhuwa kano, Yesu weNazareti, omundu weyamwa nende Nyasaye hakari wenyu nende amangalimwa nende akokhuhuchia nebilolero, ebia nyasaye yakhola hakari wenywe, shingana mwesi mumanyire khandi: ²³ Omwene wuyo, owahanwa nende abeshiina abali nibeyiiniye khandi khubumanyirisi bwa Nyasaye, enywe mwamubukula, nemikhono emimayanu mwamala ni mumwiira khulwa okhumubamba khumusalaba: ²⁴ Omwene wuyo Nyasaye yamalire okhumubuusia, namukhola okhuba omulakhuule okhurula mubululu bwelifwa: okhuba shikakhanyalikhane mbu atiirwe mwo tawe. ²⁵ Okhuba Daudi yaboola kano khuye mbu, Ndaranjirira okhulola Omwami nali imberi wanje khasotsero, okhuba ali omukhono kwanje omusatsa, mbu shindalawunzulwa tawe: ²⁶ Yako nakachira omwoyo kwaje nikutsatsaala, nalwo olulimi lwanje niluchama; kata kario khandi omubiri kwanje kulahulushira mubunayi: ²⁷ Nishio eshifune shichira sholalekha omwoyo kwanje emakombe tawe, kata okhulekha wulia Omutakatifu wuwo okhuba oubola tawe. ²⁸ Eyuwe waimanyiye injira yobulamu; ne nawe olakhola nditsulemwo obwikhoyo nelikondo lirio. ²⁹ Abasatsa nende abaheerwa, leshe emboole khu omukhulu wefwe Daudi, mbu nobulamba mbu yafwa mana yayabirwa, nashio eshirindwa shishie khuli inashio okhuula inyanga yino. ³⁰ Kho nali omunabii, namanyire mbu Nyasaye yali niyamwitsubira, mbu, okhurula mumwoyo mubishienjebie, mumera yomubiri, yakhamuchinguule Kristo okhwikhala khushifumbi shiobwami; ³¹ Yalola kano akakhekholeshe imberi naboola khukhusimukukha khwa Kristo, mbu omwoyo kukwe shikwalekhwa emakombe tawe, kata omubiri kukwe okhubola tawe. ³² Yesu wuno Nyasaye yamalire okhumubuusia, naye niye owa efwe fwesi khukholeranga obuloli. ³³ Kho namalire okhuchinguulwa okhwikhala omokhono omusatsa kwa Nyasaye, khandi namalire okhunyoola Roho Omutsienukhu wa Papa yali niyamulaka, naye wumalire okhukhusundulira, nishio eshiamulolanga nimuhulira. ³⁴ Okhuba Daudi shiyatsia mwikulu tawe: habutswa yeboolera omwene mbu, Omwami yaboolera Omwami wanje, Yikhala omukhono kwanje omusatsa, ³⁵ Okhuula olwa ekhola abasuku bobo boosi okhuba eshitseni shiebirenje bibio. ³⁶ Nikali kario leshe inzu ya Israeli yoosi imanye nobusubisie, mbu Nyasasye yamalire okhumukholaYesu wuno, owa enywe mwabamba, okhuba Omwami khandi Kristo. ³⁷ Ne olwa bali nibakhahulira kano, kabatsoma mumioyo chiabo, mana nibareeba Petero nende abarume, Abasatsa nende abaheerwa, bulano buno khukhole shiina? ³⁸ Petero nababoolera, Mwikanire mana mubatisibwe, buli shiamulala wenyu, muliira lia Yesu Kristo khulwa okhuberwa tsimbi tsienyu, mana mulanyoola eshihanwa shia Roho Omutakatifu. ³⁹ Okhuba mbu obulache nobwenyu nende abaana benyu nende khubalia boosi abali ehale po, shinga abandu abanji balia aba Omwami wefu Nyasaye yakhalanje. ⁴⁰ Narumushira amakhuwa kandi amanji okhubayiniria obuloli nende okhubachinguula, Muhonibwe okhurula mulwibulo luno olwabiiya. ⁴¹ Kho balia abenjisia likhuwa lilie nobutsatafu babatisibwa: ne khunyanga yeneyo abametekha khubo bali emioyo tsielefu tsitaru. ⁴² Nibeyiinia abeene khumechesio aka abarume nende obusanjirani, nibafinaka omukate, nende mumasayo. ⁴³ Mana oburii nibutiira emioyo chiosi: mana amakhuwa kokhuhuchia nende ebilolero biekholwa nende abarume. ⁴⁴ Balia boosi abali nibasuubira balinji halala, nabo balinji nebindu bioosi mubulala; ⁴⁵ Khandi bakusinjia emikunda chiabo nende emiandu nibakabulira abandu boosi, okhulondana nende elienya lia omundu yali inalio. ⁴⁶ Mana nabo, nibatsiririra buli nyanga nobulala bwokhakana muhekalu, nende okhumeka omukate okhurula munzu ndala okhutsia khuyindi, nibalia ebiokhulia biabo nobutsatsafu nende emioyo emierereshe, ⁴⁷ nibetsominjia Nyasaye, nibanyoola eshibalikho imberi wabandu boosi. Khandi Omwami yametanga khwikanisa buli nyanga balia abali nibahonibungwa.