¹ Inyanga ndala, Petro nende Yohana olwabali nibatsitsanga okhusaya muHekalu,khubise bie tsisa tisa, ² Omundu mulala,owebulwa omulema,yachingugwa buli shanyanga nokhurebwa habwinjiriro bwei Hekalu,halangwa mbu Halayi,kho anyale okhusaba ebihanwa khubenjiranga muHekalu. ³ Kho olwayalola Petro nende Yohana nibali ahembi okhwinjira muHekalu,yabasaba eshihanwa. ⁴ Mana Petro nende Yohona nibamurakhwo butswa tsimoni, nokhumubira mbu,khulenje efwe. ⁵ mana nabahenga niyerechesheranga okhunyola eshindu okhurula khubo. ⁶ Petro namubolera ari,ifedha nomba idhahabu, shendi ninabio tawe,halali shiendininasho nishio eshiekhuhesia,mbu mulira lia Yesu Kristo wa Nazareti,sinjira ochende. ⁷ Petro namutira nomukhono omusatsa,namusinjisia,mubwangu ibo ebirenje bie okhurula mumakumba komumasikamo nikanyola amaani. ⁸ Naruka ikulu,nachaka okhuchenda, mana niyenjira muHekalu ninabo,nachendanga,naruukanga niyetsomia Nyasaye. ⁹ Abaandu boosi nibamulola nachendanga niyetsomia Nyasaye. ¹⁰ Mana nibamumanya mbu ni ulia owekhalanga mubwinjiriro bwei Hekalu,obulangwa mbu Halayi,nasabanga obukhonyi, mana nibachenya muno khukali nikekholeshe. ¹¹ Olwa omulema waonibwa yarondokhana nende Petro na Yohana,abaandu bosi be bahuka okhushira ,nibetsa nibamukhunganirakhwo mulwanyi lwo khukhubunjilisia lwa Solomoni. ¹² Olwa Petro yalola akeneako,yababoolera ari,'enywe abaandu ba Israel,khulwashina muchenyeranga likhuwa lino,nokhulenga netsimoni tsiokhuukana,obeyera mbu nobunyali bwefu nomba obutsienukhu bwefu buchirire omulema huno nachenda. ¹³ Nyasaye wa Abraham nende Isaki nende Yakobo,Nyasaye wa bapapa befu,amuchingulire omwana huwe Yesu,wenywe mwara khu Pilato mbu akhalachirwe okhufwa,kata olwa Pilato yali niyenyere okhumulakhula. ¹⁴ Enywe mwamuloba hulia owali owobwatoto,mana omutsienukhu,nimwenya owali omwiri mbu alakhulwe atsie. ¹⁵ Mana nimwira wobuchachiro bwobulamu,naye Nyasaye namuzulumukusia,mana efwe khuli abakobosheri be. ¹⁶ mana mukhusubira mulira lia Yesu,elira yiro likholere omundu huno okhuchenda,wamulolanga khandi wamumanyire,mbu obusubiri bwe mulira lia Yesu ,kamukholere okhuba omulamu shinga olwa mumulolanga endio. ¹⁷ Kho bulano baana befu ,emanyire mbu ,mwakhola bulali okhumanya ta,shinga olwa abemilisi abaruchi benu bakholanga. ¹⁸ Kho Nyasaye amanyinjia akayaruma Abalakusi mbu,balakule okhunyakhana khwa Yesu. ¹⁹ Khulwayako mwikanire ,mumukalushire Nyasaye, obwoni bwenyu buiinibweo kho mube netsinyanga tsiokhusangala embeli wa Nyasaye. ²⁰ Kho anyale okhuruma Yesu Christo owali okhukambwa khale khunywe. ²¹ Owelikulu lienjisia mbu abeyo okhula olwa bulishindu shiakhakholwe eshiihya ,shinga olwa Nyasaye yali okhulachilisia okhuburira khu balakusi baliho mubuchachiro bwe Shialo. ²² Shinga olwa Musa yali okhuboola mbu,Nyasaye yakhabachingulire Omulakusi ouli shingana esie,okhurula Muluhya lwenyu mbu muhulire kosi kaba nababoolera. ²³ Mbu bulishamundu owakhaleshe okhuulira amakhuwa ko Omulakusi oyo,yakhasasibwe okhurula mubaandube. ²⁴ Katakario Abalakusi bosi okhuchaka khu Samweli nende bosi betsa inyuma huuwe,babola butswa eketsinyanga tsino. ²⁵ Enywe muli abaana ba balakusi khandi be indakano ya Nyasaye yalachirisia papa befu ,nabooliranga Abraham mbu, okhubirira khulwibulwo lulwo ,buli shamundu yakhalamirwe tsikhabi. ²⁶ Khulwa enywe mberio,Nyasaye yachingula omwana we Yesu,namuruma mbu abalaamire tsikhabi,mana abainie mutsinjira tsienywe tsiobubi.