¹ Okhulondana nende amakhuwa akandakhuhandichira, Tsiofilas, ndakhubiira kosi kalia aka Yesu yachaka okhukhola nende okhwechesia, ² Okhuula khunyanga eya yabukulwa natsia mwikulu, olwa yali namalire okhuhana lilako okhubirira mu Roho Omutakatifu khuabarume abayali niyahula; ³ Namalire okhusanda, yelolesia omwene nali omulamu khubo halala nende amakhuwa kalanyala okhuyinganirwa tawe, nali halala yinabo khulwa tsinyanga amakhumi kane, naboolanga amakhuwa akobwami bwa NYasaye. ⁴ Olwa yali nashiri ninabo, yabalaka mbu shibalarula eYerusalemu tawe, habutswa balindirire obulache obwa Papa, bulia obwa yaboola, Enywe mwahulira okhurula khusie ⁵ Mbu toto Yohana yabatisinjia naamatsi, habutswa mulabatisibwa nende Roho Omutakatifu mutsinyana tsinditi. ⁶ Olwa bali nibetsere halala, bamureeba, nibaboola, Omwami, bino nibio ebise biokhukalusia obwami bwa Israeli? ⁷ Naye nabakalusia nababoolera mbu, Shikali akenyu akokhumanya tsinyanga kata ebise tawe, ebia Papa yererao mubunyali bwe. ⁸ Habutswa mulanyoola obunyali olwa Roho Omutsienukhu alabeetsa khwo, ne nenyu mulaba abobuloli banje okhuchachira eYerusalemu mana ebuYuda yosi nende eSamaria mana okhuula khundukho yeshialo. ⁹ Olwa yali namalire okhuboola ebindu bino, nibashiri nibamuyenganga, yabukulwa natsia ikulu; mana liresi nilimwakanira nibalamulola tawe. ¹⁰ nibashirangalire mwikulu neshinani shinga yali natsiire ikulu mwikulu, lola, abandu babiri basinjira ewabali nibefwalire tsingubo tsindafu; ¹¹ Abababoolera mbu, Enywe abandu be eGalilaya, shichira shiina musiinjire nimurangalire mwikulu? Yesu, oubukulwe okhumurulakhwo natsia ikulu mwikulu, omwene wuyo yakhacherere mumera yeneyo shinga mumulutsi natsia mwikulu. ¹² Mana nibakalukha eYerusalemu nibarula khushikulu shialangwa Emitsabibu, eshiali ahambi eYerusalemu, oluchendo luyera inyanga yeisabato. ¹³ Olwa bali nibolere, batsia mushikoro shiekulu, ewabali nibamenyanga. Bali Petero, Yohana, Yakobo, Andrea, Filipo, Tomasi, Batholomayo, Matsayo, Simoni omusiloti, nende Yudas omusiani wa Yakobo. ¹⁴ Nabo bano nibeyinia boosi khwichomo elala lia okhusaya nende okhusaba, nibali nende abakhasi, nende Mariamu nyinamwana Yesu, nende abasiani babo. ¹⁵ Mutsinyanga yitso Petero nasinjira hakarikari wabaheerwa, nibali ahambi 120 khumeera, mana naboola, ¹⁶ Abaheerwa, kali nikakhoyere mbu amahandiko okhuula koosibwe, mbu Roho Omutsienukhu yaboola khale mumunwa kwa Daudi okhulondana nende Yudas, owemirira okhutiirwa khwa Yesu. ¹⁷ OKhuba yabalirwa mulala khu fwe, khandi yali nanyoolere omukabwa muburumushi. ¹⁸ Bulano omundu wuno yakula omukunda okhurulana nende omurungo kwobumayanu; mana nakwira omurwe, niyatikhamwo hakarikari amala nikasalana erwanyi. ¹⁹ Boosi balia abali nibamenya muYerusalemu; bahulirakhwo kano, bakulikha eshikuuri yisho mbu, Akaldama, eshisina mbu, Eshikuri shiamatsayi. ²⁰ Okhuba kahandikwa mushitabu shia Tsitsburi, Leshe eshikuri shishie shitonye likuunda, naye omundu yesi yesi shalamenya mwo tawe: mana omundu wundi abukule obwimirisis bubwe. ²¹ Kho kakhoyere mbu omundu mulala owaberenje womukanda khukwe ebise bino bioosi ebia Omwami Yesu yachenderenje niyenjira narula hakari wefu, ²² Okhuchaaka mutsinyanga tsia obubatisi bwa Yohana okuula inyanga yilia eya yabukulwa nakhurulakhwo, okhuula arebwekhwo eshibalikho abe obobuloli halala yinefu khu kokhusimulukukha khukhwe. ²³ Mana nibaula babiri, Yusufu owalangwa mbu Barsabas, owapakwa eliira mbu Yusto, nende Matsias. ²⁴ Mana nibasaya, nibaboola, Yuwe, Omwami, owumanyire emioyo chia abandu boosi, khumanyie niwiina khu babiri bano owa omalire okhwaula, ²⁵ Mbu abukule habundu woburumishi nende oburume, okhurula khu Yudas owa khulwa obwononi yakwa, mbu omwene atsie habundu wuwe. ²⁶ Mana nibakhupa ikha, nayo ikha niyikwira Matsias; naye nabalirwa mulala khu abarume ekhumi nende mulala balia.