¹ Olunyuma olwa amakhuwa kano, Paulo Narula Athene niyetsa ebuKorinzo. ² Ebweneyo yakanayo omuYahudi owalangwa Aquila owebulwa eponto, owali niyarulire Italia halala nende omukhasiwe oweliira mbu Prisilla: (shichira Claudio yali nalachirisiye Abayahudi boosi mbu barule ebuRoma:) kho niyoola ewabo. ³ Ne shichira yali nobukhala bufwanana nende obwabo, yamenya yinabo nakhola emirimo, okhuba bosi bali abokhunaba amaheema. ⁴ Naye nayingana ninabo musinagogi buli khusabato, nateemanga okhuhunzula Abayahudi nende Abayunani. ⁵ Ne olwa Sila nende Timotheo beetsa okhurula Makedonia,Paulo yerusia muno khu likhuwa, nakholeranga Abayahudi obuloli mbu Yesu niye Kristo. ⁶ Habutswa olwa bamuyiinga nibamuranga, Paulo yabungulula tsingubo tsitsie nababoolera, Amatsaayi kenyu kabe khumirwe chinyu abene; eshie embula eshikha okhurula inyanga enzia khu Abamahanga. ⁸ Krispo, omwimirisi weisinagogi, yasubira mu Omwami, halala nende abeinzu yiiye boosi, mana obunji bwa Abakorinzo bahuliranga nibasubira, nibabatisibwa. ¹⁰ Okhuba esie endi ninawe, khandi abulaho kata mulala owitsa okhukhusalisia, okhuba endi nende abandu abanji mwitookho lino. ¹¹ Paulo namenyayo omwihika mulala nende emiesi chisasaba, niyechesinjia likhuwa hakarikari wabo. ¹² Habutswa olwa Galio yali Kafuna wa Akayia Abayahudi bamusanjira Paulo nomwoyo mulala nibamuyira imberi weshifumbi shiobuyaasi, ¹³ Ne nibaboola, Omundu wuno ahunzulanga abandu okhwinamira Nyasaye munjira yilali eyamalako tawe. ¹⁴ Ne olwa Paulo yali nali ahambi okhuboola, Galio yaboolera Abayahudi mbu, Enywe Abayahudi, nikakhabeere ne likhuwa libi nohomba limayanu, likhabere lilayi mbu ndakhabefwiire. ¹⁵ Habutswa okhuba kano namareebo khulwa amakhuwa nende ameera nende amalako kenyu abene, abene muyaasie, esie shinditsa okhuba omuyaasi wamakhuwa kano tawe. ¹⁷ Mana nibatiira Sosthene, omusinjiriri omukhongo weisinagogi, mana nibamukhupira imberi weshifumbi shiobuyasi. Naye Galio shiyateeba akabali nibakholere tawe. ¹⁸ Olunyuma lwa kano Paulo yamenyayo khandi oluhoono, namala nasebula abaheerwa nabukula eliaro okhutsia eSiria, yali halala nende Priscilla nende Akula; olwa yali nashiri okhurula, yabechera liswi eKenekerea khulwa eshitsubo shia yali nakholere. ¹⁹ Mana niyetsa ebuEfeso, mana nabalekha habwene yaho: habutswa ye niyenjira muSinagogi, mana nayingana nende Abayahudi. ²⁰ Ne olwa bamureeba mbu amenye khwo ninabo oluhoono, shiyeeyama tawe. ²¹ Mana nabasebula, nababiira mbu, Ekhoyere mbu okhuula endie lisabo liitsanga lino eYerusalemu; habutswa ndakhabakalushire khandi, Nyasaye naba nachama. Mana Narula natsia ebuEfeso. ²² Ne olwa yali niyolere eKaisaria, natsiire nashesiye likanisa, yakholomokha natsia Andokia. ²³ Olunyuma olwa okhubayo ebise ebitiiti, yarulayo, nabirira mutsimbeka tsia ebuGalatia nende Pagia, nibatinyisinjia abeeka boosi. ²⁴ Khandi omundu wundi omuYahudi oweliira Apollo, omwibule wa Aleksandaria, yetsa ebuEfeso. Yali omumemu mukhuboola nali owobunyali mumahandiko. ²⁵ Apollo yali niyechesibwa mutsinjira tsiOmwami: nali oweshinani mu roho, yaboola habwene amakhuwa aka Yesu, habutswa yali niyamanya obubatisi bwa Yohana bwonyene. ²⁶ Apollo yachaka okhwechesia neitswoni musinagogi neshinani: olwa Aquila nende Prisila bamuhulira, nibamubukula nibatsia ninaye elubeka, mana nibamwibalira muburambi injira ya Nyasaye obulayi. ²⁸ Okhuba ye yahunzula Abayahudi mubunji, mana mbu habulafu, nabamanyinjia mumahandiko mbu Yesu niye Kristo.