² Shinga olwa omwima kwa Paulo kwali, yenjira mwo, ne khulwa tsisabato tsitaru yali nayiingana ninabo okhurula mumahandiko. ³ . Yali nabambulanga amahandiko mbu kali nikakhoyere mbu Kristo asande mana abuushe khandi okhurula mubafu. Naboola mbu, Yesu wengambanga wuno niye Kristo. ⁴ Abayahudi bandi bahunzulwa niboongana nende Paulo nende Sila, halala nende Abayunani bandi abanji abali nibashukhana, kata nende abakhasi bandi abanji aboluyali. ⁵ Habutswa nabo Abayahudi balaali nibasubiire, imbalikha niyibatiira, nibabukula abandu abamayanu okhurula khushiiro, nibareera omukanda halala, nibachachia induli mwitookho. Nibachooma okhuseera inzu ya Yasoni, bali nibakhaabanga bamurere Paulo nende Sila khubandu. ⁶ Habutswa olwa bachweya okhubanyoola, bakhwesa Yasoni nende abaheerwa bandi imberi ewa abobunyali bomwitookho nibakhupanga obuyoka, Abandu bano abamalire okhukalukhasia eshialo makalama bamalire okhuula hano khandi. ⁷ Abandu bano benjisibwe nende Yasoni akaleyamana namalako aka Kaisari tawe; baboolanga mbu khuli nende Omwami owundi mbu Yesu. ⁸ Abomukana nende abemirisi belitookho banyakhana olwa bahulira amakhuwa kano. ⁹ Habutswa bamutarira Yasoni nende abashie, baboola mbu batsie. ¹⁰ Mana Eshilo yisho abaheerwa baruma Paulo nende Sila okhutsia Bereya, olwa boola yo nibenjira musinagogi ya Abayahudi. ¹¹ Bano bali abandu boluyali okhushira balia abebuTsesalonika, khulwa okhuba benjisia likhuwa lia Nyasaye nomwoyo kwosi, nabo bakhabirisinjia mumahandiko buli nyanga okhulola kali nobulamba. ¹² Abayahudi abanji nibasubira, halala nende abakhasi Abayunani abamanyikha muno nende abasatsa. ¹³ Habutswa AbaYahudi ba Tsesalonika bamanya mbu Paulo akambanga likhuwa lia Nyasaye eBereya, batsiayo nibachachia induli mumikanda. ¹⁴ Mana mubwangu yibo, abaheerwa nibaruma Paulo okhutsia khunyanza, habutswa Sila nende Timotheo batong'a yo. ¹⁵ Balia abali nibamimiriranga Paulo bamuyira nibabira litookho lia Athene. Nibasebulananga nende Paulo ebweneyo, bahebwa ameebalo khulwa Sila nende Timotheo mbu bamwitsire lwangu lwangu ni kali kanyalikhana. ¹⁶ Bulano olwa yali nashibalindiranga Athene, omwoyo kwe kwanyakhana muye olwa yalola litookho niletsolwamwo nende eminyasaye. ¹⁷ Kho yayingananga nende Abayahudi bulinyanga musinagogi nende abamwinamiranga Nyasaye, kata nende abali nibali khushiiro. ¹⁸ Habutswa khandi abobuchesi bwa Epikureo nende abobuchesi bwa Stoiko bakaana yinaye. Nibareeba mbu omundu wuno arabachiranga shiina? Abandi nibaboola mbu, Afwana outeemanga okhulanga abandu okhulonda nyasaye wundi omucheni, shichira yakambirenje injili khu Yesu nende okhusimukukha. ¹⁹ Bamubukula Paulo nibamurera mumukhung'ano kwa Areopago, nibamureeba mbu, Wakhakhwinosiekhwo amechesio amacheni aka oboolanga kano? ²⁰ Shichira okhurereranga amechesio amacheni mumarwi kefu. Nikali kario, khwenya okhumanya ebindu bino nishiina. ²¹ Bulano aba Athene boosi nende abacheni bamenyanga yo barumushiranga ebise biabo khukhuhulirisia eshiba nishiri eshicheni. ²² Kho Paulo nasinjira hakarikari mu Areopaga, mana naboola, Enywe abandu ba Athene, Endola mbu enywe muli abandu beidini mutsinjlia tsinyinji. ²³ Okhuba embira birire mana enduutsi ebindu bia mwinamiranga, enyoolere obwaali bundi obwa ng'oolwakho mbu, Khu Nyasaye oulamanyiishe. Kho shilia eshia mwinamiranga nimukorirwe, wuno niye owa emuboolera. ²⁵ Kata khandi sharumushirungwa namakhono ka abandu ta, opaara mbu yenyanga eshindu shiosi, naye ye mwene ahesinjia abandu obulamu nende omuya nende eshindu shindi shioosi. ²⁶ Okhurula mumundu mulala yakasia buli lihanga elia abandu okhumenya mwo khushialo, naye naraho ebise nende tsinzakho etsiabamenyamwo, ²⁷ Mbula baaba abakhaaba Nyasaye khandi mbu babe abanyala kata okhuhabasia mana banyoole injira yokhumutsiira mana bamunyoole. Kata kario shiali ehale okhurula khubuli mulala wefu tawe. ²⁹ Nikali kario, okhuba khuli olwibulo lwa Nyasaye, shikhukhoyere okhupaara mbu obulayi bwa obunyasaye bwingana itsahabu, nohomba ifetsa, nohomba eshifwanani shiabatswa kata amayiririsio akomundu. ³⁰ Kali kario Nyasaye mutsinyanga tsiakhale yekhola mbu shialolanga ta, habutswa bulano buno alachirisia mbu abandu boosi bekanire. ³¹ Kano kali shichira ye yamala okhuraho inyanga olwa aliyaasia eshialo mubulunjishi okhubirira mu omundu mulala owayahula. Nyasaye yahana eshilolero shiomundu wuno khubuli omundu olwa yamurusia mubafu. ³² Bulano olwa abasatsa ba Athene bahulira akokhusimukukha khwa abafu, abandi nibatsesherera Paulo; habutswa abandi nibaboola, Efwe khulakhuhulirisia khandi khumakhuwa kano. ³³ Olunyuma lwene, Paulo yabalekha. ³⁴ Habutswa abandu balimana ninaye mana nibasubira, balimwo Dionisio, Areopagite, omukhasi owalangwa Damari, nende abandi ninabo.