¹ Nikaba mbu Paulo nende Barnaba batsia Ikonia nibenjira mu Sinagogi ya Abayahudi, mana nibakaamba, mana omukanda omukali okwa boosi Abayahudi nende abaYunani boosi basubira. ² nebutswa Abayahudi abalali nibasubiire babasakania Abamahanga, nibabakhola okhufukula nibabakhola okhuba abalulu khubaheerwa. ³ Kho nibamenya yo oluhono olurambi, nibaboola neitswoni obunyali bwa Nyasaye nibuli ninabo, owa hana obuloli khwikhuwa liobukosia bubwe, nahana ebilolero nende akokhuhuchisia akakholwa namakhono kabo. ⁴ Habutswa omukanda kwali mwitookho kwakabukhana mwo: abandi nibalonda Abayahudi, nabo abandi nibalonda khu abarume, ⁵ Mana olwa oburaasi bwakholerwa halala Abamahanga, nende khandi Abayahudi halala nende abemirisi babo, mbu babakhupe nende okhubalasa amachina, ⁶ Nabo nibamanya, nabo niberushira mwitaala lia Elisitria nende Edarube, mulukongo lwa Elikonia, nende tsimbeka tsibotokhane yo: ⁷ Khandi ebweneyo nibakaamba yo inijili. ⁸ Yaliyo omundu wundi Elisitera owali likara okhurula okhwibulwa khukwe nashiri okhuchenda tawe: ⁹ Omwene oyo yahulira Paulo naboolanga: Paulo namuchomiakhwo tsimoni mana namanyirisia mbu obusubiri bubwe bunyala bwamuhonia, ¹⁰ Paulo naboola nomwoyo omukhongo Sinjira shirunji khubirenjebio,.Omundu wuyo yaruma ikulu nachaka okhuchenda. ¹¹ Olwa abandu bomukanda yabo balola aka Paulo aka Paulo yali nakholere, bakhupa omwoyo omukhongo nibaboola mululimi lwa Elikoaoni mbu, Abanyasaye bakhwishire hasi mwikondo lia abandu. ¹² Mana nibakulikha Barnaba mbu Zeus; naye Paulo mbu Hamesi, shichira niye owali omubooli omukhongo mwene. ¹³ Omukuhani wa Zeus, oweihekalu yiiye yali erwanyi welitookho yarera tsichirushi nende amaboho kebimuli habiribwa niyenyanga mbu abahesie omusango nende abandu. ¹⁴ Olwa abarume, Barnaba nende Paulo, aka bali nibenyanga okhukhola, barandula tsingubo tsiabo nibatsia tsimbiro hakari wabandu, nibalanjirisia obutinyu, ¹⁵ Nibaboola, Enywe abasatsa, Shichira shiina mukholanga ebindu bino? Efwe khuli abandu butswa, abalongwa shinga enywe, ne khubakambiranga mbu mulekhane nende ebindu bia butswa bino mushukhanire Nyasaye umenyanga, owalonga likulu, nende eshialo, nende inyanza, nende ebindu bioosi ebirimwo: ¹⁶ Mutsinyanga tsiabira yeyamira amahanga kosi okhukhola shinga keenyanga. ¹⁷ Kata kario shi yatonga nabula omukobosheri wuwe tawe, munjira mbu yakhola amalayi, mana nakhuheresia ifula okhurula mwikulu, nende tsinyanga tsiebiamo ebinji, niyetsusinjia emioyo ne shiokhulia nende obutsaatsafu. ¹⁸ Kata namakhuwa kano koosi Paulo nende Barnaba shibanyala okhwikalira abomukanda okhubakholera omusango tawe. ¹⁹ Mana nibarulayo Abayahudi bandi okhurula Andiokia nende Ikonio nibahunzula abandu, nibakhupa Paulo namachina, nibamukhesa nibamuyira erwanyi welitookho, nibaparanga mbu afwiire. ²⁰ Ne olwa abasubiri bali nibashisinjire nibamubotokhane, yabuukha, natsia niyenjila mwitookho; inyanga yalondakhwo ye nende Barnaba barulayo nibatsia Ederube. ²¹ Mana olwa bali nibakhakamba injili mwitookho yimo, khandi nibechesiiye abanji, bamala nibakalukha khandi mwitookho lia Elisitera, nibatsia Ikonio, nende Andiokia, ²² Nibatinyirisinjia emioyo chia abeechi, nibabatsuuba mbu balumirire mubusubiri, khandi mbu okhuula khubirire mumatinyu amanji kho khwinjire mubwami bwa Nyasaye. ²³ Ne olwa bali nibamalire okhubahulira abakofu , mu buli likanisa, nibamalire okhusaya nende okuhonga inzala, nibabara imberi wa wOmwami, owabali nibasubira.. ²⁴ Mana olwa bali nibabirire mu Pisidia, boola Epamufilia. ²⁵ Ne olunyuma lwokhukamba likhuwa mu Peruga, bakholomokha nibatsia Ettalia; ²⁶ Ne okhurula ebweneyo nibatsiira mumeli okhuulaAndiokia, habundu wa bali nibahanirwa mbu obukosia bwa Nyasaye khulwa emirimo chia Nyasaye chia bali nibamalire okhukhola. ²⁷ Mana olwa bali nibamalire okhuula yo, khandi nibakhung'asiiye likanisa halala, nibabatoonyera koosi kali aka Nyasaye yali nakholere ninabo, nende shinga yali niyekulire Abayunani omuliango kwobusubiri. ²⁸ Mana nibamenya nende abasubiri yabo tsinyanga tsinyinji.