1 Bulano mwikanisa liali eAntiokia, khwalio nende abanabii nende abechesia. Bano bali Barnaba Simoni (owalangwa Niger), Lukio omuKirene, Manane (omusiani owakhusibwa halala nende Herode wakhataru), nende Saulo. 2 Olwa bali nibashinamiranga Omwami nende okhuhonga inzala, Roho Omutsienukhu naboola, Munzaulire erubeka Barnaba nende Saulo, khulwa emirimo chiandabalanjira. 3 Nibamalire okhuhonga inzala, nibasayire, khandi nibarere amakhono kabo khu abasatsa yabo, bamala babarume batsie. 4 Kho Barnaba nende Saulo, nibamalire okhurumwa nende Roho Omutsienukhu, bakholomokha eSelucia; okhurula yo nibatsiira muliaro okhuula Cyprus. 5 Nibashiri mwitookho lia Salamis, bakamba likhuwa lia Nyasaye mutsisinagogi tsia Abayahudi. Bali nibali nende Yohana shingana omukhonyereri wabo. 6 Olwa bali nibatsiire okhubira mwushikhalachiinga shia Pafos, banyoola yo omufumu wundi, omunabii wobubeyi weshiYahudi, owelira lie mbu Baryesu. 7 Omufumu wuno yali nobulina nende kafuna, Sergio Paulo, owali omundu wobuchesi. Omundu wuno yalanga Barnaba nende Saulo, shichira yenya okhuhulira likhuwa lia Nyasaye . 8 Habutswa Elymas, omufumu (yisho nishio eshisina shieliira lie) yabayiinga; khandi nateema okhuhunzula kafuna mbu shialasubira tawe. 9 Habutswa Saulo, owalangungwa mbu Paulo, niyetsuulemwo Roho Omutsienukhu, yamumiriakhwo tsimoni. 10 Mana namuboolera, Eyuwe omwana wa shetani, wetsulamwo tsimera tsiosi tsiobubeyi nende obumayanu. eyuwe omusuku wobulunjishi bwosi. Sholilekha okhushiamia injira ingololofu yOmwami? 11 Lola bulano, omukhono kwOmwami kuli khuyuwe, mana nawe olaba omubofu. Khulwa eshise shinolole eruba tawe. Yaho nende yaho liresi nende eshirima nibimukwiira Elymas; nachaka okhubotokhana nakhaba abandu bamutiire omukhono bamwimirire. 12 Olunyuma olwa kafuna yalola akali nikekholeshe, yasubira, shichira yali nahuchisibwe po khumechesio kOMwami. 13 Paulo nabalina bebe babukula eliaro okhurula ePafos nibatsia Perga yePamfilia. Habutswa Yohana yabalekha nakalukha eYerusalemu. 14 Paulo nende abashie nibarula ePerga nibetsa Antiokia ya Pisidia. Nibaliyo batsia nibenjira musinagogi inyanga yeisabato mana nibekhala hasi. 15 Olunyuma olwa okhusoma khwa amalako nende abanabii, abemiriri beisinagogi babarumasia, nibaboola mbu, Abasiani befu, mwakhaba nimuli nelikhuwa liokhutinyisia khu bandu bali hano bano, muli boole. 16 Kho Paulo yasinjira mana nabasumira nomukhono kwe naboola mbu, Abandu ba Israeli, nende balia abamuriitsanga Nyasaye, muhulirisie. 17 Nyasaye wa abandu bano aba Israeli yahula basefwe, mana nabachingula olwa bali nibashiri mushialo shia muburumwa Emisiri, nomukhono kukwe nikuchingushire yabemirira nibaruia mwo. 18 Khulwa emiyika amakhumi kane yabefiira mushitsimi. 19 Olunyuma olwokhumululusia amahanga saba mushialo shia Kaanani, yaheresia abandu befu eshialo shiobulaame. 20 Ebindu bino biosi biekholekha khuluhoono olwa emiyika 450, okhuula khu Samweli omunabi. 21 Mana nabo nibekomba okhuba nomuruchi; mana Nyasaye nabaheresia Saulo omwana wa Kishi, owoluyia lwa Benjameni, naye naruka emiyika amakhumi kane. 22 Olwa Nyasaye yamurusia khubwami, yechingulira omwene Daudi okhuba omwami; mbu khubo yabayiniria obuloli, naboola, Emalire okhunyoola Daudi omwana wa Yesse, omundu oukhabanga omwoyo kwanje, oukholanga kalia koosi akandienya kekholeshe. 23 OKhurula mulwibulo lwomundu wuno, Nyasaye mubulache bubwe yachingulira Israeli Omuhonia, Yesu; 24 Olwa Yohana yaranjirira okhukamba obubatisi bw0khwikanira khu bandu boosi aba Israeli. 25 Mana olwa Yohana yali namaliriranga emirimo chichie, yaboola mbu, Enywe mupaaranga mbu esie endi wiina? Shiendi ye tawe. Habutswa, lole, aliyo mulala owitsanga inyuma wanje, owa kata emikoye chiebilaro bibie shendi oukhoyere okhubolola tawe. 26 Abana beefu, abana abobwibulo lwa Abrahamu, nende balia boosi abamuritsanga Nyasaye hakari wenyu, nikhufwe aba oburume buno bwobuhonia bwetsera. 27 Khu balia abamenya eYerusalemu, nende abaruchi babo shichira shibali nibamumanyire ta, nohomba kata omwoyo kwomunabii okubasomerungwa buli inyanga yeisabato, bamala okhuhesia mukhumukhalachira eshiina. 28 Kata olwa bali nibabula eshifune shia okhumukhalachira yeerwe, banayira mbu Pilato abe oumwiira. 29 Mana olwa bali nibamalire okhuhesia koosi kalia akahandikwa khu ye, bamwishia hasi okhurula khumusaala, mana nibamwalisia mushirindwa. 30 Habutswa Nyasaye yamubusia okhurula mubafu. 31 Yalolekhana tsinyanga tsinyinji nende balia abanji abayali narulire yinabo eGalilaya okhuula eYerusalemu, abali abobuloli khubandu. 32 Kho khubakambira amakhuwa amalayi, shinga olwa obulache bwakholerwa ba Papa, 33 Nyasaye wumalire okhuhesia khulwa fwe abana baabo, mbu yamubasiiye Yesu khandi; shinga kahandikwa musaburi yakhabiri, Eyuwe oli Omwana wanje, inyanga yino ekhwibuule yuwe, 34 Okhulondana mbu yamubuusia okhurula mubafu, mbu shialakalukha mukhubola ta, yaboola munjira yino, Esie ndalakhuheresia tsikhabi tsia Daudi tsinzienukhu tsiobusubisie. 35 Shino nishio eshifune eshichira naboola musaburi yindi mbu, Sholamulekha Omutsienukhu Mulala wuyo okhulola obuboli tawe. 36 Okhuba olwa Daudi yali namalire okukhola lichomo lia Nyasaye mulwibulo lulwe, yakona tsindoolo, niyalisibwa nende basamwana, naye nabola, 37 Habutswa wulia owa Nyasaye yabusia khandi shiyaakana nende okhubola tawe. 38 Kho mukhoyere okhumanya, bana befu, mbu okhubirira mumundu wuno okhuberwa khwetsimbi mukambirungwa. 39 Mana okhubirira mumundu wuno boosi abasubira babalirwa obulunjishi okhurula khubindu bioosi, ebia shimwakhanyalire okhubalirwa obulunjishi okhubirira mumalako ka Musa ta. 40 Khulwa yako, muyenjeresie obulayi mbu ebindu bia abanabii baboola bilamwikholekha khwo tawe; 41 Lole, enywe abachayi, mana muhuche mana mutibe; okhuba ekhola omulimo mutsinyanga tsienyu, omulimo okwa muletsa okhulekha okhusubira tawe, kata kali omundu aba nabakambira. 42 Ne olwa Abayahudi bali nibarulanga erwanyi wesinagogi, Abamahanga ni babasaaya mbu nibakalushe khandi baboole khwo amakhuwa kano inyanga yeisabato yilondakhwo. 43 Olwa libukana liali nilisalanire, abayaudi abanji nende abeidini abali nibashukhasibwe balonda khu Paulo nende Barnaba: nibabatinyia mbu batsiririre mubukosia bwa Nyasaye. 44 Mana olwa isabato yalondakhwo abali mwitookho ahambi bosi betsa halala okhuhulira likhuwa lia Nyasaye. 45 Habutswa olwa Abayaudi balola emikanda, imbalikha yabatiira, nibachaka okhuboola obubi khumakhuwa aka Paulo, yaboolanga, nibachaya nibafukula. 46 Mana Paulo nende Barnaba nibanyoola itswoni, mana nibaboola, Kabere nikakhoyere mbu likhuwa lia Nyasaye likambwe olwokhuranga khu enywe: habutswa endolanga nimulira erubeka, nimwikhalachira mbu shimukhoyere obulamu bweinziaiyo tawe, lole, efwe khukalushira Abamahanga. 47 Khuiwa yako Omwami amalire okhukhulachirisia efwe, naboola mbu, Emalire okhubarechekha mube obulafu obwa Abamahanga, mbu mube abarera obuhonia okhuula khushihesi shieshialo. 48 Olwa Abamahanga bahulira kano, batsaatsala, nibaheresia oluyali likhuwa liOmwami: nabo abanji babo abali nibaulwa khulwa obulamu bweinziaiyo basubira. 49 Mana likhuwa lia Nyasaye nilinyayira mutsimbeka yitso tsiosi. 50 Habutswa Abayaudi nibatsuuba induli okhubirira abakhasi abali nibeyinia aboluyali, nende abasatsa abali abemirisi mwitookho, nibachachia obusandi khu Paulo nende Barnaba, nibabalonda okhurula mushialo shiabo. 51 habutswa nabo niba nibateng'ulula olufu lwebirenje bibo okhubayiinga. 52 Mana abechi nibetsulwamwo obutsaatsafu, khandi nende Roho Omutsienukhu.