¹ Yaho mutsinyanga yitso Herode omuruchi yanyiira omukhono okhunyasia abandu bomukanisa. ² Niyeera Yakobo omusiani wabwe Yohana nolukanga. ³ Ne olwa yalola shinga olwa kachamisia abaYahudi, yatsililila namutiira Petero yesi. Ne tsiali tsinyaanga etsia omukate okubulamwo limera. ⁴ Ne olwa yali namutilire yamura mumbohe namura mumakhono kabasikari emikanda chine ne buli omukanda nende abasikari bane mbu bamulinde, napaara mbu yakhamurusie olunyuma lwa Pasaka. ⁵ Kho Petero yalindwa mumbohe, ne abelikanisa bali nibamusaayilanga mbu Nyasaye amukhoonye abohololwe. ⁶ Ne olwa Herode yali nali okhumurusia elwanyi, mushilo shienesho Petero yali nali mundoolo, nali hakari wabasikari babili nabooyilwe neminyololo chibiri, abalindi abali imbeli womuliango nibalinda imbohe. ⁷ Mana lola Malaika wOmwami nasinjila ahambi ninaye obulafu nibwakha mushikoro eshia yalimwo, naye namutuya Petero mumbafu, namubusia naboola mbu " Buukha bwangu. Eminyoololo echiali nichili khumikhoono nichikwa hasi. ⁸ Malaika namubolela mbu wifwale ebilarobio mana obibohe. Naye nakhola ario, namubolera mbu wifuubele ingubo uondekhwo. ⁹ Narula elwanyi, namulondakhwo kho namanya mbunakatoto akakholwa nende Malaika uyo mbu nakatoto akali nikekholere habula yali naparire mbu alolanga amalooro. ¹⁰ Ne olwa bali nibabirire omulindi wambeli nende owakhabili, niboola khushilibwa eshieshibia eshitsia mwitokho, nasho nishibekushila eshiene nibabira khunjila ndala habwene yaho Malaika namulekhuula. ¹¹ Ne olwa Petero yali yakhalaba tsimoni yalola mbu bulaano amanyire mbu toto mwene Omwami arumire Malaika namuyinia mumakhono ka Herode, nende mukoosi aka abaYahudi bali nibamunayilanga. ¹² Olwa yanyola obumanyirisi , yatsia munzu wa Mariamu owali nyinamwana Yohana, owakulikhwa mbu Mariko, ewa abandu abanji bali nibakhung'anire mwo nibasayanga. ¹³ Ne olwa yakhong'onda omuliango kweshiribwa; omukholi weshikhana owalangwa mbu Roda yetsa okhumwikulira. ¹⁴ Naye olwa yamanyirisia omwoyo mbu nokwa Petero, obusangali bwachira nalekula omuliango ta; obukhala bwene, yerukha niyenjira munzu; nababoolera mbu Petero wusinjire khushiribwa. ¹⁵ Kho nabo nibamukalusia mbu, Eyuwe olalushe omurwe. habutswa naye nakalusia nalumirira mbu kali kario. Nibamukalusia mbu, Nimalaika wuwe. ¹⁶ Habutswa naye Petero yatsiririra okhukhong'onda, ne olwa bekula nibamulola bamala nibang'ang'aala. ¹⁷ Petero naye nabahotseresia nomukhono mbu baholeere, mana naye nachaka okhubatoonyera shingana Omwami yali namurusiiye okhurula mumbohe. Naboola mbu, Muboolere Yakobo nende abana befu bandi. mana nabalekha natsia ebundu wundi. ¹⁸ Bulano olwa bwali nibwakhashia, shikhwalikhwo nende indoboyo yosi yosi mubasikari okhulondana nende akali nikekholeshere Petero ta. ¹⁹ Olwa Herode yali namukhabire nalamunyoola tawe, yabanoneresia abasikari mana nalaka mbu beerwe. ²⁰ Bulano Herode yamala nasinyishira abandu abeTiro nende Sidoni. Nibamala nibamutsiira nelichomo elala, ne olwa bali nibamalire okhumuserera Blasto, omukhonyereri womuruchi, abakhoonye, okhuba bali nibasabire omulembe shichira eshialo shiabo shinyolanga ebiokhulia okhurula mushialo shiomuruchi weshialo yesho. ²¹ inyanga yeene olwa yali niyuulire Herode yefwala ingubo yobwami mana niyekhala khushifumbi shioburuchi; nahana obubooli bwe khubo. ²² Abandu nibakhupa obuyoka nibaboola, Kuno nomwoyo kwa nyasaye, shikuli okwomundu tawe! ²³ Yaho na yaho omumalaika wOmwami yamukhupa, okhuba shiyali naheresiiye Nyasaye oluyali tawe; yalibwa nende tsinyende mana nafwa. ²⁴ Habutswa likhuwa lia Nyasaye liametekha khandi nilinyayira. ²⁵ Kho olwa Barnaba nende Paulo bali nibamalire oburume bwabo, bacherera okhurula eYerusalemu, nibetsa nibali nende Yohana, owali niyakulikhwa mbu Mariko.