¹ Khu malaika we likanisa lia Saridi yandiika: kano niko akaboola oyo owadiririra echiroho saba echia Nasaye nende ching'ining'ini saba. " Manyire ebikhoole biao, mbwe oli nende eliira eliokhuba omulamu, araali wafwa. ² Sisimukha obe meeso odinyisie akadoong'ere, kali ambi khufwa, khulwo khubeera sindabweene ebikhoole biao nibiulirire mumoni chia Nasaye wange. ³ Khulwesio yichulisia ngolwa wanyoola, nende nga wabulira. Kadiire nende okhwekanira. Araali noraba meeso, ndeecha kori nga omwibi, ne khasi onamanya ebikha bianjia okhwichira akulu wao. ⁴ Araali khuli nende ameera madiidi aka baandu mu Saridi abaramaliya chingubo chiabwe. Banakeenda alala nange, nibefwalire chingubo hindafu, khulwo khuba bakhoyeera. ⁵ Oyo okhira anafwalwa ebiefwalo bilafu, ne sindafuta eliira liaye okhurula musitabo sio bulamu, ne ndarumbula eliira liaye imberi wa Baba wange, nende imberi wa bamalaiaka. ⁶ Ola oli nende okhurwi, abulire aka Rokho aboolera makanisa." ⁷ Khu malaika we likanisa lia Filadelifia yandiika: Amakhuwa ka ula oli mutakatifu nende owobwadieri oli nende olufunguo lwa Daudi, yekulaanga ne abulao owikala, yekalaanga ne abulao onyala okhwikula. ⁸ Manyire bikhole biao. Lingeera, ndere imberi wao omuliango kwekulwa okwa abulao onyala okwikala. Manayire mbwe oli nende amaani madiidi, araali obuliranga elikhuwa liange ne osiakhaya eliira liange. ⁹ Liingeera! Boosi abali aba sinagogi ya sietani, ababolaanga mbwe ni Abayaudi ne khane khasi nibo, araali babacha. Ndabakhola beeche nende okhwiinamira imberi wa makulu kao, ne banamanya mbwe ndakhukheera. ¹⁰ Khulwo khuba wdiira elako liange mukhwesimirisia khulimo bujiingu, ndakhuliinde khaandi mubikha biao ebiokhteemibwa ebili okhwicha musialo siosi, okhuteema bala boosi abamenya musialo. ¹¹ Njicha lwangu. Diririra lukali sila esioli nasio mbwe arabao omuundu obukula isimbi yao. ¹² Ndakhola oyo okhira okhuba isiiro mukhekalu ya Nasaye wange, ne khasi achia orula erwanya khaba. Ndamwandiikakho eliira lia Nasaye wange, eliira lia idookho lia Nasaye wange ( Yerusalemu injakha eyikha asi khurula mwikulu khu Nasaye wange ), nende liira liange liyakha. ¹³ Oyo oli nende okhurwi abulire aka Rokho aboolera makanisa: ¹⁴ " Khu malayika we likanisa lia Laodikia yandiika: Amakhuwa ka ula oli Amina, owokhwesika nende omulolereri omwesikwa, omuruki akulu we biloonge bia Nasaye. ¹⁵ Manyire bikhole biao, mbwe ewe soli omunyifu kose omubafu, ndekoomba mbwe wakhebeere munyifu kose mubafu! ¹⁶ Kario, khulwo khubeera ewe oli omudundumu, soli omubafu kose omunyifu, ndakhusala orule mumunwa kwange. ¹⁷ Khulwo khuba obolaanga mbwe esie ndi muyiinda, ndi nende emiandu miingi, sinyenya esindu sioosi." Araali okorerwe mbwe ewe oli mudekhere lukali owobererwa, omumanani, omuwoofu nende omusiekenye. ¹⁸ Rekeresia amakerako khwesie: kula khwesie idakhabu eyosibwa mumuliro mbwe onyoole okhuba omuyiinda nende chingubo chindafu echiokhung'enang'ena mbwe wefwale omwene ne oreekesia chisoni chie siekenye siao, nende mafura kokhubakha mumoni mwao onyoole okhubona. ¹⁹ Buli yeesi owandakheera mwalabiraanga nende omuba sinyasio, kario khola amani wekanire. ²⁰ Lingeera nyemere mumuliango khongonda. Yesi yesi obulira idoboosi yange nende okhwikula omuliango, ndeecha nende okhwingira munyuumba mwaye, nende okhulia ebiakhulia naye nende yie alala nange. ²¹ Oyo okhira, ndamuba obunyali bwokhwikhala alala nange khu sisaala siange sio buruki. Kori olwo esie ndakhira nende okhwikhala alala nende Baba wange khu sisaala sio buruki. ²² Oyo oli nende okhurwi, abulire esia Rokho aboolera makanisa.