¹ Olunyuma lwa makhuwa kano ndabulira idoboosi eya omulango mukhongo okwa abaandu bangi mwikulu nikuboola " Khaleluya! Obuwonia, oluyali nende obunyala ni bia Nasaye wefwe. ² Obukhalaki bwaye nobwa obwadieri khandi nobwa obulungikhi, khulwa okhubeera amukhalakire omuyeyi mukhongo owanyasia esialo nende obuyeyi bwaye. Yekhola olwibulo khu mabanga aka bakholi baye, akayedisia omwene. ³ Nibaboola makhabi ka khabiri khaleluya;! Omwosi kwaye kwarula khuniye bumeri nende bumeri. ⁴ Abakhulundu balia amakhumi kabiri nende bane nende ebilonge bilamu bine bimwinamira nibimulaama Nasaye owikhale khu sisaala esia oburuki. Nibabolanga , kabe kario khaleluya! ⁵ Nilwo ngolwa idoboosi yarula khu sisaala sioburuki, ni, niboola mumwechomie Nasaye wefwe, eng'we abakholi baye boosi, eng'we abamurichanga boosi abarakhoyera nende abali nende amaani amakhongo. ⁶ Nilwo olwandabulira idoboosi kori idoboosi eya omukanda mukhongo okwa abaandu, kori khududuma khwa machi mangi, khandi kori khududuma khwa elikulu, niiboola " Khaleluya Omwami ni Nasaye wefwe omuruki akulu wa boosi orukanga. ⁷ Khwekhoye nikhusangala nende okhumuberesia oluyali khulwo khubeera siserero nende isangalo ya omwana we likondi yichire, ne mukhasi we siserero ari mwerekehe; ⁸ Yafukirirwa okhufwasibwa ingubo indafu ing'enang'ena ( ingubo indafu ne bikhole ebia obulungikhi ebia abasubira) ⁹ Malaika niyambolera kandiike kano: baberesibwa chikhabi abalangwa musiserero esio mwana we likondi ,"khandi kario nabolera, kano nimakhuwa okobwadieri aka Nasaye, ¹⁰ "Ndasigama imberi wa makulu kaye ndamwinamira, arali, yaboolera, orakhola orio, esie siesi ndi sa omukholi wasio nende basiani beng'we abadira obuloli bwa Yeso. Mwechomie Nasaye, khubeera obuloli bwa Yeso ni rokho oyo bunabii. ¹¹ Lunyuma ndabona elikulu nilikukha ndalingera khwali nende ifarasi indafu! ne ula owali niyekhalekho yalangwa omwesikwa nende omubwadieri.yali nende obwadieri bwo khukhalaka okhola liyee. ¹² Emoni chiaye chiali nga echinjesere chiomuliro,ne khu murwe kwaye khuli nende chisiimbi chinyiingi. Ne elira liaye liandiikwa akulu waye elia omuundu yesi yesi aramanyire arali ye omwene. ¹³ Afwalire esiefwalo esienikhwa mumabanga, neliira liaye yalangwa likhuwa lia Nasaye. ¹⁴ Abamayie akomwikulu bali nibamulondanga nibekhaale akulu khu ifarasi indafu, niyefwalire ikanju indayi, indafu. ¹⁵ Mumunwa kwaye lwarulamo oluganga lwoki olusasianga ebialo, naye achia okhubaruka khu indaukhi eya esichuma, naye asenanga ebindu bia ifini khulirima lilulu elia Nasaye, owamaani. ¹⁶ Ne yandikwa akulu wesiefwalo siaye nende khurango liaye liira, "Omuruki wa baruki khandi Omwami wa baami". ¹⁷ Ndabona malaika niyemere muliuba. Nalanga muidoboosi ikhongo mayoni akaburukhanga akulu mwiche, mukhung'ane alala khusiakhulia sikhongo esia Nasaye. ¹⁸ Mwiche mulie inyama ya abaruki, inyama ya bakhongo abamayie, inyama ya abaandu abakhongo, inyama ye chifarasi nende abachininirekho, nende inyama ya baandu boosi, abali balekhule nende abali ababoye, nende abakhoyera nende abamaani. ¹⁹ Ndailola isolo nende abaruki be sialo alala nende abamayie babwe. Bali nibebusisie khulwe eliiye nende mulala owali niyekhaale khu farasi nende abamayie baye. ²⁰ Isolo yadiirwa nende omunabii wayo owobubacha owakhola ebilolero imberi waye. Mubilolero bino yababacha bala abanyola sibalikho esia esolo nende okhwinamira esifwanani sieyo, boosi babiri basukunwa nibasiiri abalamu munyanja yomuliro. ²¹ Bala abandonga beerwa khulupanga olwarula mumunwa okwa mulala owekhala khu ifarasi, amayoni kosi kalia emilambo kie emibiri kiabwe.