¹ Omulala khu bamalaika saba, abali nende chibakuli saba yeecha nalomaloma ninange niyaambolera ari, icha, ndakhwekesia esikhalako siomudaamba mukhoongo owikhalaanga khumaachi mangi, ² (owa abaami besialo bakhola obuyeyi ninaye obuyeyi, nabo abamenyanwa besialo bamesibwa nende ifini yobuyeyi bwaye . ³ Olunyuma malayika niyanyimirira muroho, niyanjira mulumira, ne ndalola omukhasi owali niyekhale khusolo injakhanyu , eyali niyaandikirwekho ameera khumubiri kwayo, akajara Nasaye ; isolo eyo yali nende emirwe saba nende chinjika ekhumi . ⁴ Omukhasi yali afwalire chingubo chifwa kori ngo mwamo nende chinjakhanyu , khandi yaronwa nende idhahabu , amakina kesiriibwa nende echiluulu ; yali nadirire mumukhono esikombe esiechulamo bisinyisio nende obumali buyirani bwaye. ⁵ Yali nende eliira, eliandikirwe khubweni bwaye; eliobwekisi mbwe, Babeli mukhoongo, ngina badaamba nende ebisinyisio bie sialo. ⁶ Ndalola omukhasi oyo namesiibwe nende amabaanga kabatakatifu, nende khu mabaanga kabaloli ba Yeso. Nasie ngolwandamuboona ndaukisibwa ouka okhukhoongo. ⁷ Naye Malaika ula niyamboolera ari, '' khulwasina niwesindukha? Ndakhuboolera okobwekisi bwomukhasi uno, nende akeisolo eyo eyimukingire, eyili nende emirwe saba kila nende echinjika ekhumi. ⁸ Isolo yila eyawalola yaliwo khale, na bulano khasi yiliwo, naye nomwerekekhe khunina okhurula emagombe khuchia mubusasikhi. Ne bala abamenya akulu wesialo, abameera kabwe karandiikwa musitabo siobulamu okhurula emise kiesialo nikireebwao, bachia okhuukisibwa ngolwabachia khulola Isolo yila, mbwe yaliwo, ne bulano khasi aliwo, ne khandi achia khubao. ⁹ Abwene ao niwo owamapaaro kamakesi. Emirwe saba kila nichingulu saba echiomukhsi oyo yekhalakho. ¹⁰ Ne ebiene ebio nibaaruki saba. Barano bamala okhukwa, naye mulala aliwo, naye oundi asiri okhwiicha. Naye na nachia okhwicha bimukhoyera okhumenya ebikha bidiidi. ¹¹ Ne Isolo yila eyaliiwo khasi yiliwo, niye owamwene oyo niye owamunane, naye nimulala khusaba balia, ne achia mubusasikhi. ¹² Echinjika ekhumi echiawalola chiemerera abaruki ekhumi, abasiri khunyoola oburuki, arali bakhanyoole abunyala kori abaruki alala nende isolo yila, khulwe isaa ndala. ¹³ Bano nibamapaaro malala, Nabo baberesia isolo yila amaani kabwe nende bunyaala bwabwe. ¹⁴ Bano bakhalwane eliiyie nende Omwana welikoondi, naye Omwana welikoondi yakhabakhire, khulwo khubeera ye nomwami wabami, khandi omuruki wabaruki; nabo abo abali ninaye nibo abalangwa, abalobole, nende abesikwa. ¹⁵ Olunyuma yamboolera ari, amaachi akakawalola, ao owomudaamba ula yekhala, nabaandu, nende mikaanda, nende ebiaalo, nende chinimi. ¹⁶ Ne echinjika ekhumi chila echiawalola, nende isolo yila, bachia khusiula omudaamba ula, ne bachia khumukhola okhuba omukhaya nende omusiekenye, bachia khulia inyama yaye, nende okhumulasia lukali mumuliro. ¹⁷ Khulwo khuba Nasaye yara mumioyo kiabwe okhusirisia lichoomo liaye, nende okhukhola lichomo elala, nende okhuberesia isolo obwaami bwabwe okhuula amakhuuwa ka Nasaye kolerere. ¹⁸ Naye omukhasi ula owawalola, nilidookho likhoongo lila, elioburuuki akulu wabaruki besialo.