¹ Lunyuma lwa makhuwa kano ndalingera, nindola mbwe omuliango kwali kwikulwe mwikulu. Idoboosi yamberi yila, niyilomaloma nange kori olwika, niyiboola yiri, " icha ano, ndakhwekesia akachia orulirao lunyuma lwa makhuwa kano." ² Ebikha bilala ndali muroho, ndabona khwaliwo nende esisala sio buruki sirerwe mwikulu, ne omuudu asikhalekho. ³ Mulala owali asikhalekho yalolekhana kori elikina lia yasipi nende akiki. Khwaliwo nende oluyiingi lwe yifula nilibudokhane esisala sio buruki. Oluyiingi lwe yifula lwalolekhana kori isumaridi ⁴ Okhubodookhana esisaala sio buruki khwali nende ebisaala bindi ebio buruki makhumi kabiri nende bine ebiekhalwa abakofu abafwalire ebiefwalo bilafu nende chisimbi chie idakhabu khu mirwe kiabwe. ⁵ Okhurula khusisala sio buruki chiarula echimiesu chielikulu, omwadulukho nende likulu. chitaara saba chiali nichiadukha imberi we sialo sio buruki, chitaara echio nichio echiroho chia Nasaye. ⁶ Khandi imberi we sisaala sio buruki yaliwo inyaanja, injakhanyu kori irang'io. Akari we sisaala sio buruki nende chimbeka chioosi echie sisaala sio buruki baliwo abo bulamu bane, abechulakho chimoni imberi nende inyuma. ⁷ Esilonge siamberi esiobulamu siali kori idalangi, esilonge sio khabiri esio bulamu siali kori imoosi, esilonge sia khadaru esio bulamu siali nende obweni kori obwo muundu, ns ula owo bulamu wa khane yali kori ingosia yiburukha. ⁸ Ebilonge bio bulamu bane buli mulala yali nende amabaya kasasaba, akechulakho chimoni akulu nende asi wabwe. Esiro nende sidere khasi balekha oboola mbwe " Omutakatifu, mutakatifu, omutakatifu ni Omwami Nasye, omuruki akulu wa boosi, owaliiwo , nende oliwo, nende ochia okhwicha." ⁹ Buli sikha ebilonge bio bulamu olwa barusia oluyaali, esiriibwa, nende okhwebasia imberi wa ula owali yekhale khusisaala sio buruki, owamenya obumeri nende obuliribwayo, ¹⁰ abakhulundu makhumi kabiri nende bane benama abene imberi waye owekhala khu sisaala sio buruki. Benama asi khuyie owamenya obumeri nende oburilibwayo nibasukuna asi chisiimbi chiabwe imberi wesisaala sio buruki nibaboola bari, ¹¹ "Okhoyera ewe, Omwami wefwe nende Nasaye wefwe okhunyoola oluyaali nende esiriibwa nende amaani. Khulwo khuba walonga ebiindu bioosi, ne khulwe lienya liao, bialiwo nebialongwa".