¹ Khu malaika we likanisa elia Ebuefeso yandiika: Kano namakhuwa ka ula owadiira ching'ining'ini saba chila echili mumukhono kwaye musaacha. Oyo okendaanga akari we bichibi bie idakhabu ebie chitaara saba aboola ari, ² " Manyire esio kholere nende okhwedinya khwao khwe mirimo nende obwesimirisi bwao obujiingu, ne khandi mbwe khasi onyala okhukholegana nende abo abamabi, ne wabateema boosi abelanganga okhuba abarume nikhane sinibo, balolekhane okhuba ababacha. ³ Manyire mbwe oli nende obwedemberefu nende obwesimirifu, ne wabirira mumangi khulwe liira liange, ne osiajoonga khaba. ⁴ Arali lino nilio eliandi nalio khwewe, walekha obukheeri bwao bwamberi. ⁵ Khulwesio ichulisia owawakwira, wekanire nende okhola ebikhole ebiawakhola okhurula mukhuchaaka. Norekanira ndeecha khwewe nende orusiao esichibi siao okhurula abuundu wasio. ⁶ Arali ewe oli nende lino, wasiula kala akabanikolai bakhola ne kata esie ndakasiula. ⁷ Nikali mbwe oli nende okhurwi, bulira kala aka Roho abolera makanisa. Ne khu uula okhira ndamuba obufukirirwi obwo khulia khurula khu musaala okwo bulamu okuli muparadiso ya Nasaye: ⁸ " Khu malayika we likanisa lia Simana yandiika: kano ni amakhuwa ka ula oli niye owokhuchaaka nende khandi omalirikha, owafwa khandi yalamukha. ⁹ Mmanyire amanyakhano kao nende obumanani bwao arali ewe oli muyiinda, ne obubacha bwa bala abelangaanga mbwe Abayaudi arali sinibo ni isinagogi ya sietani. ¹⁰ Oraria amanyakhano akachia okhunyoola. Lingeera! Sietani adakha okhusukuna abandi khweng'we mumboye mbwe munyoole oteemibwa, muchia osaanda khu chinyaanga ekhumi. Mube abesikwa okhula khufwa, ne njia obaberesia isiimbi yo bulamu. ¹¹ Nikali mbwe oli nende khurwi, bulira aka Roho abolera makanisa. Oyo okhira khasi achia khunyoola obudinyu bw liifwa lia khabiri. ¹² " Khu malayika we likanisa lia Pegamu yandiika: Kano niko akaboola oyo oli nende olugaanga , lwokiya khabiri, ¹³ " manyire abundu wa wamenya abuundu we sisaala sio buruki bwa sietani sili. Kata kario ewe wadiira lukali eliira liange ne siwakhaya obusuuburi bwao obuli khwesie, kata chiinyaanga chila echia Antipasi omuloli wange, omwesikwa wange, owerwa mweng'we, awo niwo owa sietani yamenya. ¹⁴ Arali ndi nende amakhuwa madidi khwewe: ol eyo nende abaandu badiiranga ameekesio ka Balamu, oyo owekesia Balaka okhura ebiikirisio imberi wa Isiraili, mbwe balie ebiakhulia ebirusibwe ebisakhiro khu minasaye nende emagoombe. ¹⁵ Mumbeera eyo sa, kata ewe oli nende abandi khwabo abadiraanga amekesio ka Banikolai. ¹⁶ Kario wekanire! Ne norakhola orio, njicha lwangu, ne njia okhola eliye khunibo khu lugaanga lurula mumunwa kwange. ¹⁷ Noli nende okhurwi, bulira ak Roho abolera makanisa. Oyo okhira, njia khumuba imana ilia eyakiswa, khandi ndamuba elikina lilafu eliandikwakho eliira liyiakha, he abulao owalimanya arali ula olinyoola. ¹⁸ Khu malaika we Tiatira yandiika kano niko amakhuwa ko Mwana wa Nasaye, oyo oli nende chimoni chiaye kori injeserie yo muliro, ne amakulu kori omugasa okwarudwa lukali: ¹⁹ Manyire bukheeri bwao nende obusubiri bwao nende obukhalabani bwao nende obusubiri bwao obujiingu, ne khandi mbwe sila esiawakhola ambi ano sikhira esiawakhola mukhuchaaka. ²⁰ Arali ndi nende lino khwewe: wesimirisirianga omukhasi Yesebeli owelanganga omwene mbwe omunabii mukhasi. khumekesio kaye akosianga abakholi bange mubuyeyi nende okhulia ebiakhulia birusibwe ebisakhiro khubifwanani. ²¹ Ndamuba ebikha bio khwekanira, arali siali omwerekefu okhwekanira amabi kaye. ²² Lingeera! Njia omusukuna khusitaanda sia malwaye, nende bala abakholaanga obuyirani naye khumanyakhano malulu, arali sa nibekanira ebiayakhola. ²³ Njia okhuya abaana baye bafwe ne makanisa koosi kachia omanya mbwe esie nesie okhosianga amapaaro nende obwekoombi. Njia okhuba buli mulala weng'we esikero sie bikhole biaye. ²⁴ Arali khu bandi khweng'we mu Tiatira, khu bala boosi abaradiira eliekesio lino, nende abaramanya sila esia bandi balanga mbwe echingaado chia sietani, mbolera mbwe, khsi ndageenga akulu weng'we omukuku kwosi kwosi; ²⁵ Khu likhuwa liosi liosi, okhuula mube abadinyrifu okhuula olwanjia khwicha. ²⁶ Yeesi yeesi okhira nende okhola silia esia ndakhola okhula obumalrikhi, ndamuba obunyala akulu we bialo. ²⁷ Achia oruka khundaukhi ye yichuma, kori ebikaye bie liloba, achia khubafunaka ebidonye bidonye; ²⁸ kori olwandanyoola khurula khu Baba wang, njia omuba yeesi ing'ining'ini ye yichuli. ²⁹ Noli nende okhurwi bulira sila esia Rokho abolera makanisa.