¹ Buno nobufwimbuli bwa Yeso Kirisito obwa Nasaye yamuba okhuwekesia abakholi baye amakhuwa akachia khurulirao oburachweya. Yakakhola kamanyikhane khulwo muruma malaika waye khumukholi waye Yokhana. ² Yokhana yarusia obuloli bwa buli siindu esiayabona khulondana nende ekhuwa lia Nasaye nende khu buloli bwarusibwa khulondana nende Yeso Kirisito. ³ noweyikhabi oyo osoma khudoboosi nende bala boosi ababulira amakhuwa kobunabii buno nende okhuria esiandiikwamo, khulwo khuba ebikha bisudire ambi. ⁴ Yokhana, khu makanisa saba akali mu Asia: Obukosia bube khweng'we nende omuleembe khurula khuye oliwo, owliiwo, nende ochia okhwiicha, nende okhurula khu Roho saba abali imberi we sisala siaye sio buruki, ⁵ nende okhurula khu Yeso Kirisito oli omuloli mwesikwa, omwibulwa wamberi wa abafwa, nende omuruki wabaami bo khusialo sino. Khu oyo owarukheera ne narukhola abalekhule okhurula mu chimbi chiefwe khu mabaanga kaye, ⁶ arukholere okhuba obwami, abakukhani ba Nasaye nende Samwana waye- Khuye lube oluyaali nende amaani obumeri oburalibwayo. Amina. ⁷ Lingeera, yeecha nende maleesi; buli imoni ichia omubona, alala nende boosi abamufumira. ne echimbia chioosi echio musialo chichia oberera khuyie. Amina. ⁸ Esie ndi Alufa nende Omega; aboola Omwami Nasaye, oyo oliwo, nende owaliwo, nende owiicha, owa amaani. ⁹ Esie, Yokhana omusiani weng'we nende mulala osangirana alala nang'we mumanyakhno nende obwami nende obwesimirisi bujiingu obuli mu Yeso; ndali khusikiinga silangwa mbwe Patimo khulwe ekhuwa lia Nasaye nende obuloli khulondana nende Yeso. ¹⁰ Ndali murokho inyaanga yo mwami. Ndabulira inyuma wange idoboosi yaakulu kori eyo liuka, ¹¹ niyiboola iri " yandiika musitabo akooli khubona, ne okarume khu makanisa saba, khuchia Ebwefeso, khuchia Simana, khuchia Pegamo, khuchia Tiatira, khuchia Sadi, khuchia Filedelufia, nende okhuchia Laodikia. " ¹² Ningalukhana okhubona mbwe idoboosi ya wina owali nalomalomaanga nange, ne olwandakalukhana ndabona esichibi esie idakhabu esie chitaara saba. ¹³ Akari we sichibi esie chitaara yalimo mulala kori Omwana wo muundu, niyefwalire ikaanju indaambi eyola asi wa makulu kaye, nende olukhoba olwa idakhabu khubodokhana esirifu siaye. ¹⁴ Omurwe kwaye nende elifwiri liaye biali ebilafu kori ipamba indafu, nga elinaangoong'o, ne echimoni chiaye chiali kori ngaenjeserie chio muliro. ¹⁵ Amakulu kaye kali kori omugasa okwaruudwa lukali, kori omugasa kula okwamala okhubisibwa mumuliro, ne idoboosi yaye yali kori idoboosi ya maachi mangi akakhulukusianga lukali. Yali nadiriire ching'ining'ini saba ¹⁶ mumukhono kwaye musacaha okhurula mumunwa mwaye mwali nende olugaanga olwokiywa khabari, obweni bwaye bwali nibungiya kori obulafu bululu obwe liuba. ¹⁷ Ngolwa ndamulola, ndakwa mumakulu kaye kori omuundu ofwire. Nara omukhono kwaye muluungi akulu wange naboola ari, " oraria! Esie ndi owamberi khandi omalirikha, ¹⁸ khandi oli mulamu, ndali ndafwa, arali lingeera, ndi mulamu obumeri! ne ndi nende chifunguo echieliifwa nende magoombe. ¹⁹ Khulwesio, yandiika akawabona, akaliwo bulano, nende kala akachia khurulirao lunyuma lwa kano, ²⁰ khulwo khwekesia ekekisa khulondana nende chining'ing'inii saba echia wabona mumukhono kwange musaacha, nende esichibi sila esi idakhabu esie chitaara saba: ching'ining'inii saba nibo abamalaika ba makanisa kala saba, ne esichibi sie chitara saba ni kala amakanisa saba."